سەيسەنبى كۇنى استاناعا رەسمي ءىس-ساپارمەن رەسەيدىڭ ساراتوۆ وبلىسى گۋبەرناتورى ۆالەري راداەۆ كەلىپ, قالا اكىمدىگىندە ەكى جاقتى دەلەگاتسيانىڭ قاتىسۋىمەن كەزدەسۋ ءوتتى.
ۇستەل باسىندا ءسوز العان استانا اكىمىنىڭ ورىنباسارى ۆاسيلي كرىلوۆ قالا اكىمىنىڭ اتىنان قوناقتاردىڭ قادامدارىنا قۇتتى بولسىن ايتىپ, ساراتوۆ وبلىسى مەن استانا اراسىنداعى قارىم-قاتىناستىڭ تەرەڭ تاريحىنا توقتالدى. 1998 جىلى قول قويىلعان كەلىسىمنىڭ اياسىندا قىرۋار جۇمىستار اتقارىلىپ, ەجەلدەن اۋىلى ارالاس, قويى قورالاس جاتاتىن ورىس حالقى مەن قازاق ەلىنىڭ اراسىنداعى قازىرگى ەكونوميكانىڭ مەيلىنشە دامىعانىن ءسوز ەتتى.
«بۇل كۇنى ونەركاسىپ, ءبىلىم, يننوۆاتسيا, جول-كولىك قاتىناسى سالاسىندا جەتكەن جەتىستىگىمىزبەن ماقتانا الامىز. بولاشاقتا ءالى دە الار اسۋىمىز كوپ. مىسالى, وسى جىلى 9 مەكتەپ پەن 15 بالاباقشانىڭ پايدالانۋعا بەرىلەتىنىن ەسكەرسەك, كوپ ۇزاماي الەۋمەتتىك ماسەلەلەرىمىزدى دە تولىقتاي شەشەمىز دەگەن ويدامىز» دەدى استانا قالاسى اكىمىنىڭ ورىنباسارى ۆ.كرىلوۆ.
سودان كەيىن ساراتوۆ وبلىسى گۋبەرناتورى ۆ.راداەۆ وزدەرىنىڭ استاناعا كەلگەندەگى ماقساتتارىن ايتىپ, ەكى ايماق اراسىنداعى دوستىق قارىم-قاتىناستىڭ ودان ءارى جالعاسا بەرەتىنىنە سەنىم ءبىلدىردى. ول قوناقجايلىلىعىمەن ەرەكشەلەنەتىن قازاق حالقىنا ىستىق ىقىلاسىن ءبىلدىرىپ, ەلباسىنىڭ وسىنشا جاردەمىن كورىپ جاتقان استانالىقتاردىڭ جارقىن بولاشاعىنا سەنەتىنىن جەتكىزدى. ول ءوز سوزىندە «استانانىڭ ەكونوميكالىق, الەۋمەتتىك جاعدايىمەن ءجىتى تانىستىرىپ, بىزبەن بىرگە ۇلكەن ىستەر اتقارۋعا سەنىم بىلدىرگەندەرىڭىز ءۇشىن العىسىم شەكسىز. دەگەنمەن, شەشىمىن كۇتكەن ماسەلەلەر بارلىق مەملەكەتتەرگە ءتان. سول سياقتى, بالاباقشا كەزەگى, مەكتەپ وقۋشىلارىنىڭ ەكى اۋىسىمدا ءبىلىم الۋى سىندى پروبلەمالار بىزدە دە بار. وسىنداي كەزدەسۋلەر بارىسىندا كەڭەسە وتىرىپ, الداعى جىلدارى كۇردەلى ماسەلەلەردى ءبىر-بىرىمىزبەن تاجىريبە الماسۋ ارقىلى تۇبەگەيلى شەشە الامىز دەگىم كەلەدى. سونداي-اق, استانا مەن ساراتوۆ وبلىسىنىڭ بيزنەس وكىلدەرى تىزە قوسىپ, ەكى ەلدىڭ دامۋىنا وزدەرىنشە ۇلەس قوساتىن بولادى» دەپ, اعىنان جارىلدى.
كەزدەسۋ بارىسىندا كورشى ەلدىڭ ونەركاسىپتى وبلىسى مەن ەلوردا اراسىنداعى بىرلەسكەن شارالاردىڭ جوسپارى قۇرىلىپ, بولاشاقتارى تالقىلاندى. ساراتوۆ وبلىسى ۇكىمەتى مەن استانا قالاسى اكىمدىگى اراسىندا 1998 جىلعى 23 جەلتوقسانداعى ساۋدا-ەكونوميكالىق, عىلىمي-تەحنيكالىق جانە مادەني ىنتىماقتاستىق تۋرالى كەلىسىمگە قول قويىلعان ەدى. بىرلەسكەن جوسپار ساۋدا-ەكونوميكالىق جانە ينۆەستيتسيالىق سەرىكتەستىك, ونەركاسىپ ءوندىرىسى سالاسىندا تاجىريبە الماسۋ, ساۋلەت, قۇرىلىس جانە تۇرعىن ءۇي-كوممۋنالدى شارۋاشىلىعى, جول-كولىك ينفراقۇرىلىمى سىندى نەگىزگى باعىتتى قامتيدى. سول بايلانىستىڭ ءالى دە بولسا ۇزىلمەي كەلە جاتقانى ەكى ەل اراسىنداعى تاتۋ-ءتاتتى دوستىق پەن ىنتىماقتاستىقتىڭ ىقپالى بولسا كەرەك. 2016 جىلى دا قوس تاراپتىڭ باستاماسىمەن اگروونەركاسىپ كەشەنى مەن قورشاعان ورتانى قورعاۋ سالالارىندا بىرلەسكەن شارالار وتكىزۋ جوسپارلانۋدا.
قوس تاراپتىڭ كەزدەسۋى ناتيجەسىندە رف-نىڭ قر-داعى ساۋدا وكىلدىگى مەن ساراتوۆ وبلىسى ۇكىمەتى اراسىندا ىنتىماقتاستىق تۋرالى كەلىسىمگە جانە ساراتوۆ وبلىسىنىڭ ۇكىمەتى مەن قر ۇلتتىق كاسىپكەرلەر پالاتاسى اراسىندا ىنتىماقتاستىق تۋرالى مەموراندۋمعا قول قويىلدى. ەكى ايماق ءۇشىن مۇنداي كەزدەسۋلەر جاڭا مۇمكىندىكتەرگە جول اشىپ, بيزنەس قاۋىمداستىقتاردىڭ بىرلەسە جۇمىس ىستەۋىنە كەدەرگى كەلتىرمەي, ەكونوميكالىق ورلەۋگە جەتكىزەدى. سونىمەن قاتار, استانا مەن ساراتوۆ وبلىسى اراسىندا مادەنيەت, ءبىلىم-عىلىم, تۋريزم جانە سپورت, تەحنيكا جانە مەديتسينا سالالارىندا دا مىزعىماس ىنتىماقتاستىق ورناتۋ كوزدەلىپ وتىر.
نۇريسلام قۇسپانعالي
