…كوپەن كوكەم قاي كەزدە دە شىندىقتى شىرقىراتىپ ايتىپ كەلدى. كوپەننىڭ ءتىلىپ تۇسەتىن الماس قىلىشتاي وتكىر ساتيراسىنا كۇلىپ وتىرىپ, كۇرسىنىپ تە قالاتىنىمىز سول, سىنعا قۇرىلعان سىقاقتىڭ تۇبىندە اششى زاپىران مەن زارى بار ەلدىڭ شەرلى ماسەلەسى جاتار ەدى. مەملەكەتتىك ءتىلدىڭ اۋىر جاعدايىن «ءجۇز جىلدىق سوعىس» اتتى ماقالاسىندا ءجۇز جىلدان بەرى مەملەكەتتىك ءتىلىن تورىنە شىعارا الماي كەلە جاتقان قازاق بيلىگىن اششى ساركازممەن, وتكىر تىلمەن تۇيرەپ ەدى.
بەلگىلى مەملەكەت جانە قوعام قايراتكەرى, رۋحانياتقا قامقور, رۋحى بيىك ىسكەر ازامات يسلام ءابىش سۋ كوميتەتىنىڭ توراعاسى بولىپ تۇرعاندا قازىنانىڭ تريلليونىن قورعاپ قالعانى ءۇشىن جازىقسىز جالا جابىلىپ, تۇرمەگە تۇسكەندە, كوپەن اعامىز سوتىنا بارىپ قاتىسىپ ءجۇردى. جۋرناليستەرگە سۇحبات بەردى. بۇرىن يسەكەڭە كۇنىنە كەمىندە ءۇش مەزگىل تەلەفون سوعىپ, ساۋلىعىن سۇراپ تۇراتىن كەيبىر «دوستارى» قاراسىن كورسەتپەي كەتكەندە, كوپەن اعامىزدىڭ سوت وتىرىستارىنا قاتىسىپ, يسلام ءىنىسىنىڭ جاعدايىن سۇراپ, سوتتىڭ ءادىل ءوتۋىن تالاپ ەتۋى ۇلكەن ازاماتتىق ەدى. مۇنداي ەركىندىك تانىتقان ءىسى ءۇشىن «نۇر وتان» پارتياسىنىڭ مۇشەسى, ءبىر ورىسشالاۋ پارتيا شەنەۋنىگى نارازىلىق تانىتىپ, ەسكەرتۋ جاساپتى. سويتسە, سوزدەن توسىلىپ كورمەگەن كوپەكەڭ قىناپتان قىلىش سۋىرعانداي: «مەن يسلام ءىنىمنىڭ سوتىنا «نۇر-وتان» ەمەس, «براتان» بوپ بارىپ ءجۇرمىن» دەپ, اۋزىنا قۇم قۇيىپ كەتىپتى…
كوپەن كوكەمىز انا جىلى تۇركىستان وبلىسى ماقتارال اۋدانىنداعى وزبەكستاننىڭ ساردوبا سۋقويماسى جارىلۋىنان سۋعا كەتكەن ۇيلەردى بارىپ ارالادى. وسى وڭىردەن شىققان استانالىق زەينەتكەرلەردىڭ اتىنان «ۇيلەرىڭىز جارىق بولسىن!» دەپ جاڭادان سالىنعان ون ۇيگە «جاقسى ىرىم عوي» دەپ ون ليۋسترا ءىلىپ كەتتى. جۇرگەن جەرىن ازىلگە قارىق قىلىپ, كۇلكىسىمەن جارىق قىلىپ جۇرەتىن كوكەمىز سولاي ىسىمەن دە جارىق شاشىپ كەتكەن ەدى ماقتارالدىقتارعا.
كوپەن امىربەك كوكەمىز 70 جاسىن تويلايتىن كەزدە 2020 جىلى پاندەميا دەيتىن پالەكەت باستالىپ كەتتى. قاسقا مەن جايساڭدى قىناداي قىرعان ول قىرعىننان امان وتكەن ەدى… شىمكەنت ارنايى شاقىرعاندا وسى جامان كەسەلدىڭ كەسىرىنەن بارا الماي قالدى. تەك اقتوبە وبلىسىنىڭ شاقىرۋىمەن ءبىر توپ قالامگەرمەن بىرگە ەلمەن جۇزدەسىپ كەلدى. سودان سوڭ سەيىت كەنجەاحمەتوۆتى ەسكە الۋ شاراسىنا تورعايعا بارىپ قايتىپتى.
سوڭعى دەمىن جيناپ ەلمەن كەزدەسۋى ەكەن عوي بۇل. بوي جازعانى بولار…
اۋرۋحانادا جاتسام دا, ەستىپ جاتىپ, قالاي شىدايسىڭ, ەكى كۇننەن كەيىن وزىمە جۇرەگىمە كۇردەلى وتا جاسايتىنىنا قاراماي, باس دارىگەردەن سۇرانىپ, التىنباي باۋىرىمدى شاقىرىپ, كوپەن كوكەمىزدىڭ شاڭىراعىنا كىرىپ شىقتىق. ىنىلەرى بازاربەك, شۇكىر شاحاي, كەنجە جۇماعۇلوۆتار بار ەكەن. ەسىن ءبىلىپ, سويلەپ جاتىپتى. «ارا» جۋرنالىن شىعارۋ كەرەك, قاعازعا شىعارىپ قويعىن, وقۋىم كەرەك» دەپتى جەڭگەيگە. قايران, ءبىزدىڭ كوكەلەر, سوڭعى دەمى قالعانشا مىندەتىنە ادال بولعان…
كوپەن ەل اعاسى ەدى! ساتيرانىڭ ساردارى, كورنەكتى كوپەنىن ەل ەشقاشان ۇمىتپايدى.
قازىبەك يسا, اقىن, قر پارلامەنتى ءماجىلىسى دەپۋتاتى
