ەلوردانىڭ 15 كوشەسىندە جارىقتاندىرىلعان جاڭا مەكەنجاي تاقتايشالار ورناتىلدى.
بۇرىنعى كورسەتكىشتەردىڭ ورنىنا ساۋلە شاشاتىن انشلاگتار ءىلىندى. مۇنداي تاقتايشالار فوتوليۋمينەستسەنتتىك قابىقشادان جاسالعان. بۇل زاتتىڭ قۇرامىنداعى بولشەكتەر جارىق كوزدەرىنەن ەنەرگيانى جىلدام جيناپ, سودان سوڭ ەلەكتر قۋاتىن پايدالانباي, تۇندە ۇزاق ۋاقىت بويى جارىق بەرە الادى. جاڭا تاقتايشالار 4 ساعاتتان 12 ساعاتقا دەيىن ساۋلەلەنىپ تۇرادى.
بايقوڭىر اۋدانىنىڭ اكىمى ەرلان قاناليموۆتىڭ ايتۋىنشا, قازىر اۋدانداعى كوشەلەردىڭ اتاۋى مەن ۇيلەردىڭ رەتتىك ءنومىرى جازىلعان انشلاگتاردى ورناتۋ جۇمىستارى جۇرگىزىلىپ جاتىر. اتاپ ايتساق, ج.تاشەنوۆ, ا.باراەۆ, رەسپۋبليكا, ا.يمانوۆ, كەنەسارى, اباي, ج.دوسمۇحامەدۇلى, اسان قايعى, ا.يانۋشكەۆيچ, ا.پۋشكين, ا.كراۆتسوۆ, ءا.سەمبينوۆ, ا.جۇبانوۆ, م.عابدۋللين, ش.ءۋاليحانوۆ كوشەلەرى مەن داڭعىلدارىنداعى ءۇي تاڭبالارى جارقىراۋدا. بۇگىندە بارلىعى 360-تان اسا جارىق جيناعىش قاباتى بار تاقتايشا اۋىستىرىلدى.
