بۇگىندە استانا قالاسىنىڭ سارىارقا اۋدانىندا 300-دەن اسا كوپبالالى وتباسى بار. ولاردىڭ ەڭ جاسى – يمانقۇلوۆتار اۋلەتى. وتباسى كۇنى قارساڭىندا كەشە اۋدان اكىمى پاۆەل كۋلاگين 8 بالانى تاربيەلەپ وتىرعان وسى شاڭىراققا سىي-سياپات جاسادى.
نەبارى 27 جاسىندا 8 بالانىڭ اناسى اتانعان ايگۇل پىرمەنوۆانىڭ ەسىمى كوپشىلىككە بۇرىننان تانىس. بىلتىر ول ءدال 9 مامىر – ۇلى جەڭىس كۇنىندە دۇنيەگە ۇشەم اكەلگەن ەدى. باعىم, بالىم, باۋبەك ەسىمدى نارەستەلەرگە دەيىن يمانقۇلوۆتاردىڭ ءۇش بالاسى بولعان. ول كەزدە جاس وتباسىنىڭ باسپاناسى جوق ەدى. بارار جەر تاپپاعان ولار 3 جىل بويى جەرتولەنى پانالاپ جۇرگەن كورىنەدى. كوپبالالى كەلىنشەك ۇشەم بوسانعانىنا بايلانىستى ەلباسىعا حات جازىپ, باسپانا الۋعا قولعابىس ەتۋىن سۇرايدى. مەملەكەت باسشىسى ءوتىنىشتى جاۋاپسىز قالدىرماي, جاڭا ۇيدەن ءۇش بولمەلى پاتەردى سىيعا تارتادى. ءۇيدىڭ كىلتىن سول كەزدەگى استانا قالاسىنىڭ اكىمى ادىلبەك جاقسىبەكوۆ تابىستاعان. سونداي-اق, قالا اكىمدىگى يمانقۇلوۆتاردىڭ العاشقى بۇلدىرشىندەرىن بالاباقشاعا ورنالاستىرىپ, وتاعاسىنا جۇمىس تاۋىپ بەرگەن.
قۇداي – جومارت. قالاسا, ءۇيىپ-توگىپ بەرە سالادى دەمەكشى, باسپانالى بولعان سوڭ, ەندى جاس كەلىنشەك ەگىز بوسانادى. قازىر وتباسى 2 ۇل, التى قىزدى ءوسىرىپ وتىر.
ۇلكەن شاڭىراقتى وتباسى كۇنىمەن قۇتتىقتاپ كەلگەن سارىارقا اۋدانى اكىمىنىڭ ورىنباسارى تالعات راحمانبەردى اۋدان اكىمى پاۆەل كۋلاگيننىڭ ىزگى تىلەگى مەن سالەمدەمەسىن جەتكىزدى. وسى كۇنى جاس وتباسىعا توڭازىتقىش سىيلانىپ, بالالار ويىنشىققا بايىدى.
«يمانقۇلوۆتار – بۇكىل ەلدىڭ وتباسىنا ۇلگى بولارلىق ازاماتتار. اناسى استاناداعى بالاباقشانىڭ بىرىندە – تاربيەشى, اكەسى № 2 اۆتوپاركتە قوعامدىق كولىك جۇرگىزۋشىسى بولىپ قىزمەت ەتەدى. سوعان قاراماستان, ءبىر شاڭىراق استىندا 8 بالا تاربيەلەۋ – جاستار ءۇشىن ۇلكەن ەرلىك» دەيدى سارىارقا اۋدانى اكىمىنىڭ ورىنباسارى تالعات راحمانبەردى.
سونىمەن بىرگە, كەشە سارىارقا اۋدانى اكىمدىگى ۇلى وتان سوعىسىنىڭ ارداگەرى الەكساندر مورۋنوۆتىڭ شاڭىراعىن دا وتباسى مەرەكەسىمەن قۇتتىقتاپ شىقتى. اكىمدىكتىڭ ۇيىتقىسىمەن ءۇيدىڭ ءدال ىرگەسىندە «بۇل ۇيدە ۇلى وتان سوعىسىنىڭ ارداگەرى تۇرادى» دەگەن تاقتايشا ىلىنگەن. اكىمدىك ارداگەردىڭ ۇيىنە ءبىر سەبەت جەمىس-جيدەك, ءتاتتى-ءدامدى, قاپ-قابىمەن ازىق-تۇلىك سىيعا تارتتى. 65 جىلدان بەرى بىرگە كۇن كەشىپ, قول ۇستاسا قارتايىپ جاتقان اتا-اجە ەرەكشە قۇرمەتكە قۋانىپ, راقمەتىن جاۋدىردى.
«تاۋەلسىزدىكتىڭ 25 جىلدىعىنا وراي سارىارقا اۋدانى اكىمدىگى «25 يگى ءىس» اتتى شارالار لەگىن باستاپ كەتتى. بۇل جوبا اياسىندا اۋدانداعى كومەككە مۇقتاج جاندارعا جاردەمدەسەمىز. ال قىسقا جاقىن «جاقىنىڭا جىلۋ سىيلا» دەگەن اكتسيانى قولعا الامىز» دەيدى استانا قالاسى سارىارقا اۋدانى اكىمىنىڭ ورىنباسارى تالعات راحمانبەردى.
ءمادينا جاقىپ
