شاتتىققا تولى شىرشا تويى
جاڭا جىل قارساڭىندا استانا اكىمى اسەت يسەكەشەۆتىڭ اتىنان جاڭا جىلدىق شىرشا ۇيىمداستىرىلدى. وقۋشىلار سارايىندا وتكىزىلگەن شاتتىققا تولى شىرشا تويىنا ەلوردالىق 300-دەن استام بالا قاتىستى. وقۋ وزاتتارى, جەتىم بالالار, از قامتىلعان وتباسىلاردىڭ بالالارى مەن ەرەكشە قاجەتتىلىگى بار بۇلدىرشىندەر شاقىرىلعان ەرەكشە كەشكە ەلوردا اكىمىنىڭ ورىنباسارى ەرمەك امانشاەۆ قاتىسىپ, بالالاردى قۇتتىقتادى.
– وتكەن جىلعا وكپە جوق. بۇل جىلى ەكسپو حالىقارالىق كورمەسى استانامىزدا دۇركىرەپ ءوتتى. الداعى جىلدان دا كۇتەرىمىز كوپ. باس قالامىزدىڭ 20 جىلدىعىن قارسى العالى وتىرمىز. جاڭا جىلدا بارلىعىڭىزدىڭ ارماندارىڭىز ورىندالسىن! ءاربىرىمىزدىڭ ءۇيىمىزدە جاڭا جىلدىق عاجايىپتار ورىن السىن! وقۋدا وزات بولىپ, ەلىمىزدىڭ ەرتەڭى دەپ سەنەر ءبىلىمدى ازامات بولىڭىزدار! – دەدى ەرمەك ءامىرحانۇلى.
ينتەراكتيۆتى شوۋ-قويىلىمعا بالالار دا ارالاسىپ, بارىنشا اتسالىستى. وزدەرىنىڭ سۇيىكتى ەرتەگىلەرىنىڭ كەيىپكەرلەرىمەن قول ۇستاسىپ, شىرشانى بىرگە اينالعان وقۋشىلارعا توسىن سىيلار جاسالدى.
«بارلىق وقۋشىلاردى كەلە جاتقان جاڭا جىل مەرەكەسىمەن قۇتتىقتاعىم كەلەدى. ءبىزدىڭ بالالارىمىز وقۋدا وزات, ءبىلىمدى ەكەندىكتەرىن جىل سايىن دالەلدەپ كەلە جاتىر. بيىل دا 11 جىل قاتارىنان رەسپۋبليكا بويىنشا ءبىرىنشى ورىنعا تابان تىرەدىك. بارلىق بالالاردىڭ ءومىرى قۋانىشقا تولى بولىپ, باقىتتى عۇمىر كەشۋىنە تىلەكتەسپىن!» دەگەن قالالىق ءبىلىم باسقارماسىنىڭ باسشىسى ءانۋار جانعوزين بالالاردىڭ بيىلعى جەتىستىكتەرىن سارالاپ, كەلەر جىلى ودان دا ۇلكەن جەتىستىكتەر كۇتەتىنىن جەتكىزدى.
مۋزىكالىق قويىلىم رەتىندە ۇسىنىلعان شارادا بالالار اننەن شاشۋ شاشىپ, بي بيلەدى. مەرەكە سوڭى «ەكسپو-2017» كورمەسى اۋماعىندا ورنالاسقان «نۇر الەم» سفەراسىنداعى ەكسكۋرسيامەن جالعاستى.
گۇلجان راحمان