اياز اتا ورداسى اشىلدى
ەلورداداعى استانالىق ساياباقتا اياز اتانىڭ رەزيدەنتسياسى اشىلدى. ساياباقتىڭ ىشىندە ورنالاسقان ارنايى ۇيدە قالا تۇرعىندارى مەن قوناقتارى ەرتەگى كەيىپكەرلەرىمەن كەزدەسىپ, جاڭا جىلدىق كوڭىل كۇيدى سەزىنە الادى.
جاڭا جىلدىڭ قارساڭىندا باستالىپ, قاڭتاردىڭ 8-ىنە دەيىن جالعاساتىن دۋماندا بالالار اياز اتاعا تاقپاق ايتىپ, ءان شىرقايدى. ال بۇلدىرشىندەرگە ءتاتتى تاراتىلىپ, سونداي-اق اياز اتا, اقشاقار جانە اققالا ولافپەن بىرگە ەستەلىك سۋرەتكە تۇسەدى. استانا قالاسى كوممۋنالدىق مەنشىك قورى ديرەكتورىنىڭ ورىنباسارى عاني حاسەنوۆتىڭ ايتۋىنشا, اتا-انالار بالاقايعا ازىرلەگەن سىيلىعىن اياز اتا ارقىلى تابىستاي الادى. «بارلىق ەلوردا تۇرعىندارى مەن قوناقتارىن قىسقى ۋاقىتتى بەلسەندى وتكىزۋگە شاقىرامىز. اياز اتا ورداسى جۇمىس كۇندەرى 13.00-دەن كەشكى 18.00-گە دەيىن, ال دەمالىس كۇندەرى 12.00-دەن 19.00-گە دەيىن اشىق» دەيدى ول.
ويىن-ساۋىق مەرەكەگە ارنايى ورايلاستىرىپ, استانالىقتاردى قۋانتۋ ماقساتىندا تەگىن ۇيىمداستىرىلىپ وتىر.
ايتا كەتەرلىگى, ساياباق اۋماعىندا مۇز ايدىنى سالىنىپ, بيىك سىرعاناق پەن «Bubble tab» قىسقى اتتراكتسيونى جاسالدى. ادەتتە, تەك جاز ايىندا كوركەيە تۇسەتىن اتتراكتسيون ەندى قىس مەزگىلىندە دە جۇمىس ىستەيتىن بولادى. مۇزدان جاسالعان سىرعاناقتىڭ بيىكتىگى – 4 مەتر, ال ۇزىندىعى 50 مەتردەن اسادى. اينالاسى اعاشپەن قورشالعان مۇز ايدىنىنىڭ كولەمى – 600 شارشى مەتر. كەشكى جانە تۇنگى ۋاقىتتا شامدار جاعىلىپ, كەلۋشىلەر كەرەمەت رومانتيكالىق اتموسفەراعا بولەنەدى. مۇز ايدىنى مەن سىرعاناق تا بارشاعا تەگىن.
مۇنىمەن قوسا, كونكي مەن شانانى جالعا بەرۋ ورنى, ستاتسيونارلىق ءدامحانا مەن مەيرامحانا جۇمىس ىستەيدى.
استانالىق ساياباق – قالا تۇرعىندارىنىڭ سۇيىكتى دەمالىس ورىندارىنىڭ ءبىرى. ال-
لەيانىڭ باستى ارتىقشىلىعى سول, اينالاسى تولىقتاي اعاشپەن قورشالعان ساياباق سارىارقانىڭ ەسكەن جەلىنەن قورعاپ, دەمالىسقا جايلى جاعداي جاسايدى.
گۇلدانا تالعاتقىزى