وتكەن جەكسەنبىنىڭ ايتۋلى وقيعالارىنىڭ ءبىرى – ەلوردامىزداعى رۇقسات ەتىلگەن شەرۋلەر بولدى. ەلوردانىڭ ەكى جەرىندە وتكەن شەرۋدىڭ دە بولمىسى ەكى ءتۇرلى بولعانى راس. «جەرۇيىق» ساياباعىنداعى شەرۋدى بىلايعى جۇرت «Nur Otan-نىڭ ميتينگىسى» دەپ باعالادى. شىنىندا دا ول جەردە نەگىزىنەن, «نۇروتاندىق» دەپۋتاتتار مەن اسسامبلەيا وكىلدەرى سويلەدى.
«جەرۇيىق» ساياباعىنداعى شەرۋ «ءبىز بىرگەمىز» دەگەن اتاۋمەن ءوتتى. زاڭدى تۇردە رۇقسات ەتىلگەن باسقوسۋ سوڭعى كەزدەرى ەلىمىزدە بولىپ جاتقان وقىس وقيعالارعا ارنالدى. شەرۋگە شىققاندار قوعامداعى قالىپتاسقان جاعدايلارعا قاتىستى وي-پىكىرلەرىن اشىق ايتتى. نەگىزىنەن العاندا, ەلدى ەلەڭدەتىپ وتىرعان الەۋمەتتىك ماسەلەلەر باستى تاقىرىپقا اينالدى.
جينالعان حالىقپەن پارلامەنت دەپۋتاتتارى, قازاقستان حالقى اسسامبلەياسىنىڭ مۇشەلەرى تىلدەسىپ, وزدەرىنىڭ ويلارىمەن ءبولىستى. دەپۋتاتتار حالىقتىڭ تالاپ-تىلەگىنە قۇلاق ءتۇردى. مىنبەدەن ءسوز سويلەگەندەر ەلدىڭ ساناسىن ۋلايتىن ءارتۇرلى جات يدەيالارعا سەنبەۋگە ۇندەدى. ونىڭ ورنىنا مەملەكەتتىڭ الەۋمەتتىك سالادا جۇرگىزىپ وتىرعان ساياساتىن قولداپ, بىرلىك پەن بەيبىتشىلىكتى تۋ ەتىپ ۇستاۋعا شاقىردى.
ال سول كۇنى شاكارىم-پۋشكين كوشەلەرىنىڭ قيىلىسىندا بولعان جيىندا سالماقتى وي-پىكىرلەر ايتىلدى. الەۋمەتتى اشىندىرعان جاعدايلار باتىل سىنالدى. «بايتاق بولاشاق» ەكولوگيالىق اليانسىنىڭ جەتەكشىسى ازاماتحان ءامىرتاي سياقتى ازاماتتار ۇيىمداستىرعان شەرۋدە ەل بيلىككە جانايقايىن جەتكىزدى. شەرۋگە شىققاندار ەل باسشىلىعىنا 22 ناقتى ۇسىنىس جولدادى. ولاردىڭ اراسىندا ارىستاعى اپات, تەڭىزدەگى تولقۋ, كوپبالالى انالار مەن جەتىم بالالارعا تەگىن ءۇي بەرۋ, اەس سالۋعا جول بەرمەۋ, ءار ادامنىڭ ءۇي سالۋعا جەر ۋچاسكەسىن تەگىن الۋى, ەلوردانىڭ اتاۋىن قايتارۋ, رەفەرەندۋم, سايلاۋ جانە شەرۋ وتكىزۋگە تۋرالى زاڭنامانى وزگەرتۋ, ءبىر پالاتالى پارلامەنت قۇرۋ, زەينەتاقى قورىنداعى قاراجاتتىڭ اشىقتىعىن قامتاماسىز ەتۋ سياقتى وزەكتى ماسەلەلەر بار.
شامامەن ەكى ساعاتقا سوزىلعان جيىن تۇسكى 13.00-دە اياقتالدى. بۇل بەيبىت جيىن بيلىك پەن بۇقارانىڭ اراسىنداعى سىندارلى سۇحباتتىڭ ءبىر ۇلگىسى بولعانى انىق.
