قازاقستان ازاماتتارى شەتەلگە شىققاندا نەمەسە شىعاردا نەلەرگە كوڭىل بولگەنى ءجون؟ جات ەل, جات جەردە ساياحاتتاپ ءجۇرىپ, ويلاماعان توسىن جاعدايلارعا جولىعىپ قالۋدان نەمەسە شەكارادان وتە الماي, بوسقا شىعىندالۋدان ساقتانۋ ءۇشىن مىنا تۇيىندەر قاپەردە بولعانى وڭ.
قۇجاتتاردى تەكسەرىڭىز
شەتەلگە اتتانار الدىندا, ەڭ الدىمەن, قۇجاتتارىڭىزدىڭ دۇرىستىعىن تەكسەرىپ العان ءجون. اسىرەسە, پاسپورتتاعى تەگىڭىزدىڭ, اتىڭىزدىڭ, اكەڭىزدىڭ اتىنىڭ (لاتىن تىلىندەگى ترانسليتەراتسياسى دا), تۋعان كۇنىڭىز بەن تۋعان جەرىڭىزدىڭ, بالالارىڭىز تۋرالى مالىمەتتەردىڭ دۇرىس جازىلعانىنا كوز جەتكىزىڭىز. پاسپورتىڭىزدىڭ اياقتالۋ مەرزىمىن قاداعالاڭىز. مەرزىمى ءوتىپ كەتكەن نەمەسە وتۋگە تاياپ قالعان قۇجاتتى مىندەتتى تۇردە اۋىستىرۋ قاجەت. جاڭا پاسپورتتى ءبىر اي ىشىندە اۋىستىرۋعا بولادى. ەگەر دەمالىسقا جاسى 16-دان تومەن بالامەن بىرگە باراتىن بولساڭىز, وعان دا پاسپورت راسىمدەۋ كەرەك ەكەنىن ۇمىتپاڭىز. كوپتەگەن ەلدەردە اتا-اناسىمەن بىرگە جۇرگەن بالادان دا پاسپورت تالاپ ەتەدى.
ۆيزا دايىن با؟
باراتىن ەلىڭىزدىڭ قازاقستان ازاماتتارىنا باعىتتالعان ۆيزالىق رەجيمىن بىلگەن ابزال. ەگەر ۆيزا قاجەت بولسا, سول ەلدىڭ ديپلوماتيالىق وكىلدىگىنە نەمەسە كونسۋلدىق مەكەمەسىنە بارىپ ۆيزا الۋ كەرەك. كەيبىر تۋريستىك اگەنتتىكتەر ارقىلى دا جاساتۋعا بولادى. ۆيزاداعى مالىمەتتەردىڭ دۇرىستىعى مەن مەرزىمىن, شەتەلدە جۇرۋگە رۇقسات ەتىلگەن كۇندەردىڭ سانىن دا سالىستىرىپ قاراڭىز. ال ەلىمىز ازاماتتارى ءۇشىن ۆيزاسىز رەجيم بولسا, ول ەلدە بولۋدىڭ ەڭ ۇزاق مەرزىمى مەن ءتارتىبىن انىقتاپ الىڭىز. ءبىر مەملەكەت ارقىلى ەكىنشى ەلگە بارۋدى جوسپارلاساڭىز, وندا ترانزيتتىك ۆيزا تۋرالى دا اقپارات سىزگە قاجەت.
ايىپپۇل مەن بەرەشەكتەر بار ما؟
«شەت ەلگە شىعۋى شەكتەلگەن, بورىشقورلار ءتىزىمى جانە اتقارۋ ءوندىرىسى بويىنشا بورىشقورلار ءتىزىمى بويىنشا شەت ەلگە شىعۋعا تىيىم سالىنعاندىعىنىڭ بار-جوقتىعىن تەكسەرۋ» قىزمەتى ارقىلى شەتەلگە شىعۋعا قويىلعان شەكتەۋدىڭ بار-جوعىن تەكسەرۋدى ۇمىتپاڭىز. ونى قر ادىلەت مينيسترلىگىنىڭ رەسمي سايتىنداعى مالىمەتتەر بازاسىنان نەمەسە «اتقارۋشىلىق ءىس جۇرگىزۋ بويىنشا بورىشكەرلەر ءتىزىمى» مالىمەتتەر بازاسىنان تەكسەرىپ الۋعا بولادى. اكىمشىلىك قۇقىقبۇزۋشىلىقتار مەن تولەنبەگەن ايىپپۇلداردى دا انىقتاپ الۋ كەرەك. تولەنبەي قالعان ايىپپۇلدىڭ شەكارادان شىعاردا ۇلكەن توسقاۋىل بولاتىنىن ارقاشان ەستەن شىعارماۋ كەرەك.
مەديتسينالىق ماسەلەلەرگە ءمان بەرىڭىز
باراتىن ەلىڭىزدىڭ مەديتسينالىق ساقتاندىرۋ قىزمەتى جايلى دا ۇعىسقان وڭ. ويتكەنى ول مەديتسينالىق كومەك قاجەت بولعان جاعدايدا سىزگە شىعىندارىڭىزدى وتەۋگە مۇمكىندىك بەرەدى. ساپارعا شىعاردان بۇرىن دەنساۋلىعىڭىزدى تەكسەرتىپ, وزىڭىزدە جۇقپالى اۋرۋلاردىڭ جوقتىعى جايلى انىقتاما العانىڭىز ابزال. وزىڭىزگە قاجەتتى ءدارى-دارمەكتى (اسقازاننىڭ, ءىش اۋرۋدىڭ, تۇماۋدىڭ دارىلەرى) الا ءجۇرۋدىڭ دە اۋىرلىعى جوق. سونداي-اق تروپيكالىق ەلدەرگە بارۋ ءۇشىن ديفتەريا, سىرىسپە, پوليوميەليت, سارى بەزگەك سەكىلدى ينفەكتسيالىق اۋرۋلاردان ەكپە الۋدى ۇمىتپاڭىز.
كەدەندىك باقىلاۋدان بايقاۋ كەرەك
قازاقستاننان ءۇش مىڭ اقش دوللارىنان استام شەتەل ۆاليۋتاسىن الىپ بارا جاتساڭىز, ونى جازباشا تۇردە دەكلاراتسيالاۋ قاجەت. ەگەر دەكلاراتسيا تولتىرماي, اقشانى جاسىرىپ وتەمىن دەگەن باقاي قۋلىقپەن ءجۇرىپ ۇستالساڭىز, قاراجاتىڭىزدى كەدەندە تاركىلەپ الۋى نەمەسە اقشانى زاڭسىز الىپ وتكەنىڭىز ءۇشىن اكىمشىلىك, ءتىپتى قىلمىستىق جازاعا تارتىلۋىڭىز مۇمكىن. اۋە كولىكتەرىندە قول جۇگىندە كەسەتىن, شانشيتىن زاتتاردى, بالالاردىڭ ويىنشىعىن جانە ءپىشىنى قارۋعا ۇقساس زاتتاردى الىپ جۇرۋگە بولمايدى. كەيبىر ەلدەردە ءتۇرلى سۇيىقتىقتار مەن گەل الىپ وتۋگە دە شەكتەۋ قويىلعان.
ال مورالدىق تۇرعىدان العاندا, بارعان ەلىڭىزدىڭ زاڭ-جارلىقتارىنا قۇرمەت ەتۋ جەكە باسىڭىزدىڭ مادەني ساپاسىنا سايادى. ەگەر شەتەلدە جۇرگەندە قۇقىق قورعاۋ ورگاندارى قاماۋعا السا نەمەسە جول-كولىك وقيعاسى سەكىلدى باسقا دا جاعدايلارعا تاپ بولساڭىز, سول ەلدەگى قازاقستاننىڭ كونسۋلدىق مەكەمەسىنىڭ قىزمەتكەرىمەن كەزدەسۋدى تالاپ ەتە الاسىز. قر كونسۋلدىق مەكەمەسىنىڭ قىزمەتكەرىنسىز شەت تىلدە تولتىرىلعان حاتتامالار مەن قۇجاتتارعا قول قويماعان دۇرىس.
