استانالىقتار مەن قالا قوناقتارى قۇس قاناتىنداي بيىكتە سامعاپ, زەڭگىر كوكتەن قالا كورىنىسىن تاماشالاي الاتىن بولادى. استانا كۇنىندە اشىلاتىن جاڭا نىسان – اينالمالى اتتراكتسيون «شولۋ شەڭبەرى» 22 قاباتتى ءۇيدىڭ بيىكتىگىمەن بىردەي 65 مەتر بولادى. الىپ اتتراكتسيون – ەلىمىزدەگى ەكىنشى شولۋ اتتراكتسيونى. الماتىداعى وسى تەكتەس نىساننىڭ بيىكتىگى 60 مەتردى قۇرايدى.
دۇنيەجۇزىندەگى ەڭ العاشقى شولۋ شىعىرىن جاساۋ يدەياسى دجوردج فەرريسكە ءتان. عاجاپ شەشىم 1893 جىلى جۇزەگە اسىرىلىپ, چيكاگو قالاسىندا ءوتىپ جاتقان حالىقارالىق كورمەگە تارتۋ ەتىلگەن بولاتىن. سودان بەرى ءىرى مەگاپوليستەر قالا كورىنىسىن الىپ اتتراكتسيوندا تاماشالاۋدى داستۇرگە اينالدىرىپ كەلەدى.
استانالىق جاڭا «دوڭگەلەكتىڭ» اۋا باپتاعىش ءارى جىلىتۋ قوندىرعىسى ورناتىلعان 36 كابيناسى بار. بۇل اتتراكتسيوندى جىل ون ەكى اي قولدانۋعا مۇمكىندىك بەرەدى. ارقانىڭ تابيعات ەرەكشەلىگىنە قاراي, اينالمالى اتتراكتسيون جەل باعىتىنا ساي ارنايى ءتورت باعانمەن بەكىتىلگەن. بۇل قىستا 15 گرادۋستان اسپايتىن ايازدا جانە سەكۋندىنا 20 مەتر جىلدامدىقتان اسپايتىن جەلدەۋىت كۇندەردە دە سەرۋەندەۋگە مۇمكىندىك بەرەدى.
ايگۇل ۋايسوۆا
