استانا قالاسى اكىمىنىڭ ورىنباسارى ماليكا بەكتۇروۆانىڭ قاتىسۋىمەن «SMART ASTANA» ءموبيلدى قوسىمشاسىنىڭ جاڭارتىلعان نۇسقاسى تانىستىرىلدى. وعان «استانا INNOVATIONS» اق باسقارما توراعاسى ولجاس سارتاەۆ پەن «ەلوردانى تۇراقتى دامىتۋ ورتالىعى» جشس ديرەكتورىنىڭ ورىنباسارى ەركەبۇلان جانىبەكۇلى قاتىستى.
ماليكا بەكتۇروۆانىڭ ايتۋىنشا, كوپشىلىك «Smart Astana» ءموبيلدى قوسىمشاسىنىڭ جاڭارتىلعان نۇسقاسىنىڭ كومەگىمەن استانا قالاسىنىڭ اشىق, ماڭىزدى ءارى وزەكتى سەرۆيستەرىنە قول جەتكىزە الادى. سونداي-اق ول جوبانىڭ باستى ماقساتى اقپاراتتىق قولجەتىمدىلىك پەن ءارتۇرلى قالالىق سەرۆيستەردى ىڭعايلى ۇسىنۋ ەكەنىن اتاپ ءوتتى. ال ولجاس سارتاەۆ بولسا قوسىمشانىڭ ينتەرفەيسى, سونداي-اق, ونىڭ فۋنكتسيونالىنا بىرقاتار ەلەۋلى وزگەرىستەر جاسالعانىن تىلگە تيەك ەتتى. ماسەلەن, قالالىق سەرۆيستەردى بارىنشا قامتۋ ماقساتىندا ءموبيلدى قوسىمشا تۇجىرىمداماسىن تولىققاندى جاڭارتۋ تۋرالى شەشىم قابىلدانعان.
– بۇگىنگى تاڭدا قوسىمشادا مەملەكەت جانە قالا قىزمەتتەرى, دەنساۋلىق ساقتاۋ, ءبىلىم, تكش, قوعامدىق كولىك, تۋريزم, كوممەرتسيالىق قىزمەتتەر, ويىن-ساۋىق, حابارلاندىرۋلار, قالاداعى جاڭالىقتار مەن وقيعالار, بەلسەندى تۇرعىن سياقتى 12 سانات بويىنشا بارلىعى 30-دان استام سەرۆيس, سونىمەن قاتار ءتۇرلى پايدالى ۆيدجەتتەر قولجەتىمدى بولىپ وتىر. مىسالى, مەملەكەت جانە قالا قىزمەتتەرى مازىرىندە 109 كەزەكشى قىزمەتىنە ءوتىنىم بەرۋگە, اكىمدىككە قابىلداۋعا جازىلۋعا, ءوز ءبولىمىنىڭ پوليتسيا قىزمەتكەرىن تابۋعا جانە تۇرعىن ۇيگە كەزەگىڭدى قاراۋعا بولادى, – دەيدى ول.
سونداي-اق «دەنساۋلىق ساقتاۋ» مازىرىندە بارلىق قوسىمشالار مەديتسينامەن بايلانىستى بولادى. ناقتىراق ايتساق, مۇندا قالانىڭ بارلىق مەديتسينالىق ۇيىمدارى تۋرالى اقپارات, قالا كارتاسىنداعى ولاردىڭ ورنالاسقان جەرى قامتىلعان. اتالمىش ءمازىر ارقىلى كەرەكتى دارىگەردى تاڭداپ, قابىلداۋعا ءارى ونلاين تۇردە جازىلۋعا مۇمكىندىك پايدا بولدى.
– سونىمەن قاتار وندا جەدەل جاردەم, شۇعىل قىزمەتتەر شاقىرۋ, 1300 call-ورتالىققا حابارلاسۋ جانە تاعى دا باسقا قىزمەتتەر بار. سوندىقتان دا قالانىڭ بارلىق مەديتسينالىق مەكەمەلەرى ەلەكتروندى دەنساۋلىق ساقتاۋ جۇيەسىنە 2018 جىلدىڭ ورتاسىنا دەيىن قوسىلادى. سونداي-اق «ءبىلىم» قاتتاماسىندا تۇرعىندار ءوز بالالارىنىڭ بالاباقشاعا كەزەگىن قاراپ, قالانىڭ ورتا ءبىلىم بەرۋ ورىندارى تۋرالى بۇكىل اقپاراتتى الا الادى, – دەدى ولجاس سەرىكۇلى.
ال ەركەبۇلان جانىبەكۇلىنىڭ ايتۋىنشا, «Smart Astana» ءموبيلدى قوسىمشاسىنا جۇرتتىڭ ىقىلاسى جوعارى بولىپ وتىر. ماسەلەن, وسى ۋاقىتقا دەيىن ءموبيلدى قوسىمشانى 100 مىڭعا جۋىق ەلوردالىق تۇرعىندار جۇكتەپ العان كورىنەدى. سونداي-اق ول اتالعان قوسىمشانى Play Market (Android) جانە Apple Store-دان (iOS) جۇكتەپ الۋعا بولاتىنىن ايتىپ ءوتتى.
سەرىك
جولداسباي
