ەلوردامىز جايىندا اڭگىمە قوزعالىپ كەتسە, ەكىنىڭ ءبىرى بۇل قالانىڭ ماساسى كوپ ەكەنىن ايتپاي قويمايدى. شىنىمەن دە, باس قالامىزدىڭ ەكى ەرەكشەلىگى بولسا, سونىڭ ءبىرى – شىبىن-شىركەيى, سونداي-اق بورانى مەن ايازى بولسا كەرەك.
بۇل ەكەۋى قالانىڭ كوممۋنالدىق شارۋاشىلىقتارى ءۇشىن ەڭ جاۋاپتى جۇمىستاردىڭ قاتارىنان سانالادى. جىلداعى قاربالاس جۇمىس. دەگەنمەن جىلدان-جىلعا شىبىن-شىركەيدى ازايتۋعا باعىتتالعان سانيتارلىق شارالار كۇشەيىپ كەلەدى. سونىڭ ءبىر ايعاعى, كەشەگى مەرەكە كۇندەرىندە دە قالا بويىنشا ماسامەن كۇرەس جۇمىستارى توقتاۋسىز جۇرگىزىلدى.
ارنايى قىزمەتتىڭ ماماندارى ماسا-شىركەيلەردى ەكى ەسە قارقىندى كۇشپەن ۋلاۋ جۇمىستارىن جالعاستىرۋدا. بۇگىنگى تاڭدا 123 مامان دەزينسەكتسيامەن اينالىسۋدا. اسىرەسە, قالا تۇرعىندارى مەن قوناقتارىنىڭ ەڭ ءجيى باراتىن جەرلەرىنە ەرەكشە نازار اۋدارىلۋدا. نەگىزى, ماسالاردى ۋلاۋ 6 كەزەڭگە بولىنگەن. قازىر ءۇشىنشى كەزەڭ اياقتالىپ قالدى.
ەسكە سالا كەتسەك, ەلوردا كۇنىندە كەشكى سەرۋەنگە شىققان استانالىقتار مەن قالا قوناقتارى ماسا-شىركەيدىڭ كەسىرىنەن الەككە تۇسكەنىن الەۋمەتتىك جەلىلەر ارقىلى شاعىمدانىپ ايتقان بولاتىن. سودان بەرى قالاداعى قانسورعىش جاندىكتەردى جويۋ جۇمىسى توقتاتىلعان ەمەس. قاناتتى قانسورعىشتاردىڭ شەكتەن تىس كوبەيىپ كەتۋىنە اۋا رايى دا اسەر ەتكەنى ءسوزسىز. اپتاپ ىستىقتان كەيىنگى جاڭبىردان سوڭ شىبىن-شىركەيدىڭ قاراسى دا كوبەيىپ شىعا كەلدى. وسىنداي جاعدايعا بايلانىستى ءار اۋدان بويىنشا دەرەۋ دەزينفەكتسيالىق ءىس-شارالار وتكىزىلدى.
«ماسالاردىڭ پايدا بولۋى مەن كوبەيۋ مەرزىمى جەتى كۇنگە سوزىلادى, الايدا اۋا رايىنىڭ قولايسىزدىعىنا بايلانىستى ولاردىڭ جەتىلۋ مەرزىمى ەكى كۇنگە دەيىن قىسقارادى. سوندىقتان شىبىن-شىركەي كۇرت كوبەيىپ كەتكەن» دەيدى قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى سادۋاقاس بايعابىلوۆ.
شىبىن-شىركەيدى جويۋ ماقساتىندا ەسىل اۋدانى بويىنشا «جەتىسۋ» جانە «ستوليچنىي» ساياباقتارى, ەسىل وزەنىنىڭ جاعالاۋىنداعى امفيتەاتر, استانالىق تسيرك, «استانا» كونتسەرت زالى, «حان شاتىر» سوو اۋماعى, «ۇركەر» تۇرعىن الابىنىڭ №2 سەكتور ۋچاسكەسى, «ۇركەر» تۇرعىن الابىنىڭ №2 ۋچاسكەسى, «بارىس-ارەنا» سپورت كەشەنى, «استانا وپەرا», «استانا بالەت», ەكسپو كەشەنىنىڭ جازعى ساحناسى, «Happylon MEGA Silk Way» جانە «Happۋlon Keruen» ورىندارىندا ماسادان تازارتۋ شارالارى جۇرگىزىلدى. وعان 2 ەنتومولوگ, 26 دەزينفەكتور, 3 تەرموگەنەراتور بريگاداسى, 3 اۆتوكولىك, 1 ميكرواۆتوبۋس, 1 دۋ-1000 تەحنيكاسى جۇمىلدىرىلدى. الماتى اۋدانى بويىنشا وڭتۇستىك-شىعىس شاعىن اۋدانىنىڭ وڭ جانە سول جاعى تازالاندى. وعان 3 بريگادا, 3 اۆتوكولىك, 3 بيولوگ قاتىستى, ولار ءتيىستى جۇمىستى تەرموگەنەراتورلار, جەل گەنەراتورى جانە روتورلىق بۇرىككىشتەر ارقىلى جۇرگىزەتىن بولادى. سارىارقا اۋدانى بويىنشا «كوكتال-1» تۇرعىن الابىنىڭ اۋماعى وڭدەلدى. ماسا-شىركەيگە قارسى جۇمىسقا 2 تەرموگەنەراتور بريگاداسى, 3 اۆتوكولىك, 1 ەنتومولوگ جانە 1 دۋ-1000 تەحنيكاسى جۇمىلدىرىلدى. ەگەر ماسا-شىركەي تاعى دا كۇرت كوبەيگەن جاعداي بولسا, ولارعا قارسى شابۋىل كەز كەلگەن كۇنى جۇرگىزىلە بەرەدى.
– ءبىز قالانىڭ قاق ورتاسىنان وتەتىن اقبۇلاق ارناسىنا جاقىن تۇرامىز. كۇن جىلىنىپ كەتكەلى ماسانىڭ كوبەيىپ كەتكەنى بايقالادى. اسىرەسە, كەشكە قاراي شىبىن-شىركەيدەن مازامىز كەتىپ ءجۇردى. دەگەنمەن سوڭعى كۇندەرى ەپتەپ ازايعانى اڭعارىلدى. ءويتكەنى قولىنا اپپارات ۇستاعان جۇمىسشىلار كۇندىز دە, تۇندە دە دەزينفەكتسيا جاساپ ءجۇر, – دەيدى ابىلاي حان داڭعىلىنىڭ تۇرعىنى تەمىربولات مولدياروۆ.
ءيا, شىبىن-شىركەيگە قارسى شارالار ۇدەگەن سايىن ولاردىڭ قاتارى دا سەيىلە باستايتىنى ءسوزسىز. بۇل رەتتە دەزينفەكتسيا شارالارىمەن قاتار, سانيتارلىق تازالىق جۇمىستارى دا ۇزدىكسىز جۇرگىزىلۋى كەرەك.
