360 مەتر. بۇل – جەڭىس تۋى تىگىلگەن رەيحستاگ پەن گيتلەر ءۇيىنىڭ اراقاشىقتىعى. ەكىنشى دۇنيەجۇزىلىك سوعىستىڭ نۇكتەسىن قويعان قازاقتىڭ قايسار باتىرى, لەيتەنانت راقىمجان قوشقارباەۆ پەن قىزىل اسكەر گريگوري بۋلاتوۆتىڭ جاۋ ۇياسىنا جالاۋ تىگۋى وت پەن وق تەسپەگەن كەۋدەلەرىنىڭ قۇرمەتكە لايىق ەكەنىن كورسەتەدى.
بيىل داڭقتى باتىر راقىمجان قوشقارباەۆتىڭ دۇنيە سالعانىنا – 30 جىل. حالىق قاھارمانىنىڭ اڭىزعا اينالعان ەرلىگى مەن تاباندىلىعىن, كەسكىلەسكەن شايقاستارداعى جاۋىنگەرلىك كەلبەتىن ءدۇيىم جۇرت جاقسى بىلەدى. الايدا باتىردىڭ بۇگىنگى جالعاسى – تىكەلەي ۇرپاعى, نەمەرەلەرى بار ما, جوق پا, ونى كوپشىلىك بىلە بەرمەيتىنى داۋسىز.
باتىردىڭ ەكى نەمەرەسى بار
وتباسى تۋرالى ايتا باستاعاندا داۋرەن ناعاشى اتاسى راقىمجان قوشقارباەۆ پەن باتىردىڭ قىزى, ياعني ءوزىنىڭ اناسى ءاليانىڭ اراسىندا تاربيە بەرۋ جاعىنان ۇقساستىق بارىن ايتادى.
باتىر ءوزىنىڭ جارى – قازاق اۋىل شارۋاشىلىعى ينستيتۋتىندا وقىتۋشى بولعان راحيلا سەيداحمەتقىزى ياحينا ەكەۋى ءاليا ەسىمدى ءبىر قىز تاربيەلەگەن. دەگەنمەن «ەگەمەن قازاقستان» گازەتىنىڭ 2014 جىلعى 25 ساۋىردەگى نومىرىندە جانبولات اۋپباەۆتىڭ «تۋ تىككەن» ماتەريالىندا سايا اتتى قىزى بار ەكەندىگى كورسەتىلەدى. بەيرەسمي مالىمەتتەر بويىنشا راقىمجان قوشقارباەۆتىڭ ەكى قىزى بولعان, ونىڭ ءبىرى ءاليا ەكەندىگى ايتىلسا, ەكىنشى قىزى تۋرالى ەشقانداي مالىمەت جوق. بىراق باتىردىڭ نەمەرەسى داۋرەن ءوزىنىڭ اناسى باتىردىڭ جالعىز قىزى بولعانىن, ال سايانى اناسىنىڭ وگەي اپكەسى رەتىندە بىلەتىنىن ايتتى.
ءاليا راقىمجانقىزى قوشقارباەۆانىڭ ەكى ۇلى بار. ونىڭ ءبىرى – 29 جاستاعى داۋرەن قوشقارباەۆ.
ءبىز اڭگىمەگە تارتقان باتىردىڭ بۇگىنگى جالعاسى داۋرەن «الاش مەديا گرۋپپ» مەديا حولدينگىندە جوبالار مەنەدجەرى بولىپ جۇمىس ىستەيدى. ماماندىعى ينتەرنەت ساۋدا سالاسىندا جاڭا جوبالاردى جۇزەگە اسىرۋمەن تىعىز بايلانىستى. مەكتەپتە وقىپ جۇرگەنىندە ءتۇرلى ماتەماتيكالىق وليمپيادالاردىڭ جۇلدەگەرى بولعان ەكەن.
«الماتى قالاسىندا دۇنيەگە كەلگەنمىن, سوندا ءوستىم. ون جاسىما دەيىن, ياعني 1998 جىلعا دەيىن اتامىز تۇرعان پاتەردە تۇردىق. دوستىق, 42 دەگەن مەكەنجايداعى سول ۇيدە راقىمجان قوشقارباەۆتىڭ تۇرعاندىعى جونىندە ەسكەرتكىش تاقتا ورناتىلعان» دەيدى داۋرەن.
«اتامنىڭ ۇيىنە قوناق كوپ كەلەتىن»
داۋرەننەن اتاسى تۋرالى اناسىنىڭ ەستەلىكتەرىن سۇراعانىمىزدا, ول قوشقارباەۆتىڭ سوعىس تۋرالى كوپ اڭگىمە قوزعاماعاندىعىن ايتتى.
«كوزى ءتىرى كەزىندە بيلىك ونىڭ ەرلىگىن رەسمي تۇردە مويىنداعىسى كەلمەگەن. ءويتكەنى «حالىق جاۋىنىڭ» ۇلىن, ۇلتى قازاق باتىردى قۇرمەتكە بولەۋدى بيلىكتىڭ ساياسي رەجيمى قولايلامادى. بىراق وعان بولا مەنىڭ اتامنىڭ ساعى سىنباعان. سەبەبى ول ءومىر سۇرۋگە قۇشتار, اينالاسىن شاتتىق پەن قۋانىشقا كەنەلتىپ جۇرەتىن ادام بولدى. اتامنىڭ ۇيىنە قوناق كوپ كەلەتىن بولعان. دوستارىنىڭ قاتارىن باۋىرجان مومىشۇلى, قاسىم قايسەنوۆ, ۇشقىش ا.مارەسەۆ سەكىلدى سول ءداۋىردىڭ التىن ادامدارى تولىقتىرعان» دەپ ءوزى بىلەتىن مالىمەتتەرمەن بولىسكەن داۋرەن اڭگىمەسىن ءارى قاراي جالعادى.
«الماتى» قوناقۇيىن 21 جىل باسقارعان
راقىمجان قوشقارباەۆ 1967 جىلدان 1988 جىلعا دەيىن سول كەزەڭدەردەگى ەڭ تانىمال «الماتى» قوناقۇيىن باسقارعان. قىزىعى, ءبىر كەزدەرى داۋرەن اتاسى نەگىزىن قالاعان جانە ديرەكتور بولعان قوناقۇيدە ۋاقىتشا جۇمىس ىستەگەن.
داۋرەن ۇنەمى ءوزىن-ءوزى جەتىلدىرۋگە, ءتۇرلى سالالاردا ءوزىن شىڭداۋعا كوپ كۇش جۇمساعاندى, سونداي-اق, ءوز ءىسىنىڭ شەبەرى بولۋدى قالايدى. ارقا سۇيەر ازامات, ۇلگىلى اعا, ادال دوس بولۋ ومىرلىك ماقساتتارى ەكەنىن ايتتى. ال باستى ارمانى – جاقىن ادامدارىن قورعاۋ ارقىلى جانىنا جايلى ءومىر ءسۇرۋ.
«انامنىڭ ۇيعارىمىمەن, اتامنىڭ تەگىندەمىن. بولاشاقتا مەنىڭ بالالارىم دا وسى فاميليادا بولاتىنى داۋسىز. اتامنىڭ تەگى – مەن ءۇشىن ۇلكەن جاۋاپكەرشىلىك. ەلىنىڭ لايىقتى ازاماتى بولۋ, جاقىندارىنا قامقورلىق تانىتۋ, ادامگەرشىلىكتەن اتتاماۋ – بارلىق ادامعا ورتاق پارىز» دەپ داۋرەن ءوز ويىن قورىتىندىلادى.
گاۋھاراي ەسىموۆا
