باس قالاداعى ۇلتتىق اكادەميالىق كىتاپحانادا حالىق اقىنى, قازاقتىڭ انشىلىك-جىرشىلىق ونەرىنىڭ كورنەكتى وكىلى كەنەن ازىرباەۆتىڭ تۋعانىنا 135 جىل تولۋىنا ارنالعان «ەكى كەنەن تۋمايدى, الاتاۋعا ەكسەڭ دە» اتتى جىر كەشى بولدى.
كەشكە اقىن ۇرپاقتارى تورتكەن كەنەنقىزى مەن ۇلى باقىتجان ازىرباەۆ جانە زيالى قاۋىم وكىلدەرى قاتىستى. اتامىزدىڭ مەرەيتويىنىڭ العاشقى تويى بيىلعى ناۋرىز ايىندا ەلورداداعى ۇلتتىق مۋزەيدە باستالىپ, قازىر جەر-جەردە جالعاسىن تابۋدا.
بالاسى باقىتجاننىڭ ايتۋىنشا, ايتۋلى داتا اياسىندا «سارىارقاعا ساياحات» دەگەن جوبا جاسالىپ, سونىڭ ناتيجەسىندە ارقادا قونىس تەپكەن وبلىس ورتالىقتارىندا كەنەن اتامىزدىڭ شىعارماشىلىعىنا ارنالعان كەش ءوتىپ, اقىننىڭ اندەرى مەن تولعاۋلارى شىرقالعان.
«اكەمنىڭ كوپ بالاسى ومىردەن ەرتە كەتىپ قالدى. مەن سەگىز اعايىندى بولۋىم كەرەك ەدى. بازار-نازاردان كەيىن دە بىرنەشە بالاسى شەتىنەپ كەتەدى. سودان 52 جاسقا كەلگەندە اللا تاعالادان جالىنىپ سۇراپ جۇرگەندە «ءتورت كەمپىر ءبىر شال» دەگەن قىزى تۋدى. بۇل ەسىمدى ايتقاندا كوپ اعايىندار كۇلىپ جىبەرەدى. قازاقتىڭ ەسكى ادەت-عۇرپىندا بالا تۇرماعان اتا-انالار «ءتىل, كوز تيمەسىن» دەپ وسىنداي ەسىم قويعان. قازىر ول كىسى ارامىزدا وتىر, جاسى سەكسەن بەسكە كەلدى. وسى اپامنان كەيىن اكەمنىڭ بالالارى تۇرا باستادى. مەن سوعىس اياقتالعان جىلى, ياعني اكەمنىڭ 61 جاسىندا دۇنيەگە كەلدىم. شىندىعىندا, ءبىز باقىتتى ۇرپاقپىز. اكەسىنىڭ 135 جىلدىعىن كورۋ دەگەن سيرەك قۇبىلىس» دەدى باقىتجان اعا.
اقىننىڭ قىزى تورتكەن اپا ءوزىنىڭ ەسىمىن جوعارى سىنىپقا بارعاندا وزگەرتكەنىن ايتىپ بەردى. بۇل كىسى – اكەسىنىڭ مۇرالارىنىڭ ناعىز جاناشىرى. اقىننىڭ ارحيۆتە شاڭ جۇتىپ جاتقان اندەرى مەن داۋىسىن ىزدەپ تاۋىپ, ورتامىزعا قوستى.
بەلگىلى عالىم سەرىك نەگيموۆ قازاق ونەرىندەگى سال-سەرىلىك جولدى جيىرماسىنشى عاسىرعا جەتكىزگەن بىرەگەي تۇلعانىڭ شىعارماشىلىعى تۋرالى وي تولعادى. شارا بارىسىندا ءدۇلدۇل ونەرپازدىڭ اندەرى ورىندالدى.
كەشتى جۇرگىزگەن اقىن داۋلەتكەرەي كاپۇلى اقىن تۋرالى ايتا كەلىپ, «سوم التىننىڭ سىنىعى» دەگەن باعا بەردى. بۇل ءسوز بىزگە دە ۇنادى.
