قازاقستان رەسپۋبليكاسى پارلامەنتى سەناتىنىڭ دەپۋتاتى بيبىگۇل جەكسەنباي «امانات» پارتياسى قالالىق فيليالىنىڭ جانە قالالىق قۇرىلىس باسقارماسىنىڭ وكىلدەرىمەن بىرگە ەلورداداعى ەڭ كونە, بىرنەشە جىلدان بەرى اپاتتىق جاعدايىنا بايلانىستى جابىلعان ق.مۇڭايتپاسوۆ اتىنداعى ورتالىق ستاديوندا بولىپ, سپورت ورتالىعىنىڭ جاڭا قۇرىلىس جوباسىمەن تانىستى.
ستاديونعا باستاپقىدا رەكونسترۋكتسيا جۇرگىزىپ, تەك كۇردەلى جوندەۋ جۇمىستارى جوسپارلانعان ەدى. الايدا كەيىنىرەك الەمدىك ستاندارتتارعا ساي, ۋەفا تالاپتارى بويىنشا فۋتبول بىرىنشىلىكتەرىن دە وتكىزۋگە بولاتىنداي تولىققاندى 5 مىڭ ورىندىق ستاديون سالۋ جوبالاندى. جوبا قۇنى 13,5 ملرد تەڭگەنى قۇرايدى. كۇزدە قۇرىلىس جۇمىستارىن بيۋدجەتتەن قارجىلاندىرۋ ماسەلەسى تالقىلانۋى كەرەك. جوبا بويىنشا تەك فۋتبول عانا ەمەس, ستاديون ايماعىندا جىل ون ەكى اي بويى بالالار مەن جاسوسپىرىمدەردىڭ ءارتۇرلى سپورت تۇرلەرى بويىنشا سپورتپەن اينالىسۋىنا مۇمكىندىك قاراستىرىلعان. ەسىلدىڭ وڭ جاعالاۋىندا ورنالاسقان اۋدان تۇرعىندارى ءۇشىن سپورت كەشەندەرى وتە تاپشى.
سەناتور ءبىلىمدى, تاربيەلى ءارى دەنى ساۋ ۇرپاق – ۇلتتىڭ ەڭ قىمبات بايلىعى. ولاي بولسا, بالالار مەن جاسوسپىرىمدەردىڭ وقۋمەن قاتار, ونەر ۇيرەنىپ, سپورتپەن شۇعىلدانىپ, جان-جاقتى جەتىلۋىنە قولايلى جاعداي جاساۋ – مەملەكەتتىڭ موينىنداعى بورىشى ەكەنىن ايتتى. «ەل پرەزيدەنتى بۇقارالىق سپورتتى دامىتۋدى مەملەكەتتىڭ الەۋمەتتىك ساياساتىنداعى ماڭىزدى باسىمدىقتاردىڭ ءبىرى رەتىندە بەلگىلەپ وتىر. مەملەكەت باسشىسى قاسىم-جومارت توقاەۆ VIII سايلانعان پارلامەنتتىڭ ءبىرىنشى سەسسياسىنىڭ اشىلۋىندا سويلەگەن سوزىندە دە بۇقارالىق سپورتتى دامىتۋدىڭ ماڭىزى زور ەكەنىن باسا ايتتى. سوندىقتان ەلىمىزدە بۇقارالىق سپورتتى دامىتۋ باستى نازاردا بولادى» دەدى ب.جەكسەنباي.
كەزدەسۋ بارىسىندا سەناتور استانادا قۇرىلىسى جوسپارلانعان باسقا دا نىساندار مەن شەشىلۋى ءتيىس ماسەلەلەر بويىنشا اقپارات الدى.
