باس قالادا قۇرىلىسى باستالاتىن ستۋدەنتتىك جاتاقحانانىڭ ىرگەتاسىن سالتاناتتى قالاۋدىڭ ءراسىمى ءوتتى.
ستۋدەنتتەر ءۇيى كەشەنى – ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اۋقىمدى جوبالارىنىڭ ءبىرى. جالپى اۋدانى 45000 شارشى مەتر بولاتىن ستۋدەنتتىك جاتاقحانا نۇر-سۇلتان قالاسىنداعى ا.بايتۇرسىنۇلى مەن ك.ازىرباەۆ كوشەلەرىنىڭ قيىلىسىندا بوي كوتەرەدى. بەس قاباتتان تۇراتىن 2361 ورىندىق جاتاقحانا ەلىمىزدەگى ستۋدەنتتىك جاتاقحانالار ىشىندەگى ەڭ اۋقىمدىسى. مۇندا ستۋدەنتتەردىڭ جايلى تۇرۋىنا, وقىپ دەمالۋىنا جاعدايلار جاسالادى. دەمالىس ورتالىقتارى, جاتتىعۋ زالدارى, سپورت الاڭدارى مەن دۇكەندەر جەلىسى دە قاراستىرىلعان. قۇنى 7 ملرد تەڭگەدەن استاتىن قۇرىلىس جەكە ينۆەستيتسيالار ەسەبىنەن جۇزەگە اسىرىلادى. مەردىگەر – «MEGASTROI SERVIS» جشس. بۇل كەشەن 2022 جىلى پايدالانۋعا بەرىلەدى دەپ جوسپارلانعان. سالتاناتتى شاراعا قاتىسۋشىلار تاريحي ساتتە 2045 جىلعى ستۋدەنتتەرگە ارناپ جازىلعان وسيەت-حاتتىڭ كۋاسى بولدى. وسيەت-حات ارنايى قۇتىدا ساقتالادى. جاتاقحانانىڭ العاشقى كىرپىشىن قالاۋعا قاتىسقان ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ ەلباسىنىڭ تاپسىرماسى بويىنشا ستۋدەنتتەردى جاتاقحانامەن قامتۋ 3 جىل ىشىندە ورىندالۋ كەرەكتىگىن ايتتى.
– مەردىگەر قۇرىلىس كومپانياسىنا العىس ايتقىم كەلەدى. ينۆەستور رەتىندە ءوز قارجىسىنا 2 جىلدىڭ ىشىندە جاتاقحانانىڭ قۇرلىسىن اياقتاۋعا ۋادە بەردى. بۇل ورىن جوبالانعان كەزدە ستۋدەنتتەردىڭ بولاشاقتا تۇراتىن مەكەنجايىندا بارلىق ىڭعايلى جاعدايلار قاراستارىلادى.
