5 قازاننان باستاپ مەكتەپتەر ەرەكشە ءتارتىپ بويىنشا جاپپاي تەكسەرىلەدى. بۇل تۋرالى قر پرەمەر-ءمينيسترىنىڭ ورىنباسارى ەرالى توعجانوۆ ءمالىم ەتتى.
ۆەدومستۆوارالىق كوميسسيانىڭ وتىرىسىندا ەلىمىزدەگى جالپى ءبىلىم بەرەتىن مەكتەپتەردە سانيتارلىق نورمالاردىڭ ساقتالۋى تالقىلاندى.
قر دەنساۋلىق ساقتاۋ ءمينيسترىنىڭ ورىنباسارى – ەلىمىزدىڭ باس سانيتارلىق دارىگەرى ەرلان قياسوۆ وقۋ جىلىنىڭ باسىنان بەرى مەكتەپتەردە جۇرگىزىلگەن تەكسەرۋ مونيتورينگىنىڭ قورىتىندىسىن باياندادى. تەكسەرۋ ناتيجەسىندە 697 مەكتەپتىڭ 134-ىندە سانيتارلىق نورمالار بۇزىلعانى انىقتالعان. بۇل رەتتە بۇزىلعان نورمالاردىڭ نەگىزگى بولىگى اۋىلدىق مەكتەپتەردە تىركەلگەن. سونداي-اق كوپتەگەن مەكتەپتەردە پايدالانىلعان جەكە قورعانىس قۇرالدارىن جيناۋعا جانە جويۋعا ارنالعان ارنايى قوقىس جاشىكتەرىنىڭ جانە مەكتەپ ىشىندە ءجۇرۋ كەزىندە اراقاشىقتىقتى ساقتاۋدى قامتاماسىز ەتەتىن بەلگىلەردىڭ بولماعانى انىقتالدى. قىزمەتكەرلەردىڭ بەتپەردە رەجيمىن ساقتاماۋ فاكتىلەرى بار. ەلىمىزدەگى 15 مەكتەپتىڭ كىرەبەرىسىندە ارا قاشىقتىقتى ساقتاۋدى قامتاماسىز ەتۋ بەلگىلەرى جوق. ونىڭ ىشىندە نۇر-سۇلتان, الماتى قالالارى, اقمولا, پاۆلودار, جامبىل, ماڭعىستاۋ, سقو جانە قاراعاندى وبلىستارىنىڭ ءبىلىم بەرۋ ۇيىمدارى بار. جيىن قورىتىندىسى بويىنشا پرەمەر-ءمينيستردىڭ ورىنباسارى اكىمدەرگە وسىنداي قاتەلىكتەردى جويىپ, ەسكەرتپەلەردى نەگىزىگە الىپ, شارالار قابىلداۋدى تاپسىردى. بيىل وقۋ جىلىنىڭ ەكىنشى توقسانىندا مەكتەپتەردىڭ قىزمەتىن قايتا باستاۋ ءۇشىن مۇقياتتىلىقتىڭ اسا قاجەت ەكەنىن كورسەتتى. 2-توقساندا قالىپتى رەجيمدە وقىتۋ تۋرالى شەشىم قابىلداۋ كەزىندە مەكتەپتەردىڭ دايىندىق جاعدايى, ازىرلىگى جان-جاقتى ەسكەرىلەتىن بولادى. سول سەبەپتى 5 قازاننان باستاپ جالپى ءبىلىم بەرۋ مەكتەپتەرىن ەرەكشە ءتارتىپ بويىنشا جاپپاي تەكسەرۋ جۇمىستارىنىڭ باستالاتىنىن اتاپ ءوتۋ قاجەت.
