جاز – سۋعا شومىلۋ ماۋسىمى. سوندىقتان ساقتىق شارالارىن دا بىلە جۇرگەن ارتىق بولمايدى.
جاڭبىرلى جازدا جاقسى جىلىنىپ ءۇلگەرمەگەن سۋ قويمالارى تامىزدا ءبارىبىر بىرتىندەپ سالقىنداي باستايدى. ويتكەنى, تامىز ايىندا كۇننىڭ ۇزاقتىعى 1,5 ساعاتقا قىسقاردى. ۇزاق تۇندە ءبىرشاما سالقىنداپ قالعان سۋ كۇندىزگى قىسقا ۋاقىتتا جىلىنىپ ۇلگەرمەيدى. سول سەبەپتى سۋعا شومىلۋعا سالقىنعا ءبىرشاما شىنىققان ادامدار بارعانى دۇرىس. بايقاساڭىزدار, تامىزدا دا سۋعا كەتۋشىلەر ماۋسىم ايىنداعىداي كوپ بولادى. ونىڭ سەبەبى, ماۋسىم ايىندا دا كۇن شىجىپ تۇرۋى مۇمكىن, بىراق وزەن, كولدەردەگى سۋلار ءالى جىلىنىپ ۇلگەرمەيدى. تامىز ايىندا دا سونداي جاعداي, ساقتىقتى ۇمىتقان سۋعا جۇزۋشىلەر قاۋىپتى جاعدايعا ۇشىراپ قالادى.
توتەنشە جاعدايلار كوميتەتى ورتالىق ايماقتىق اەروموبيلدى جەدەل قۇتقارۋ جاساعىنىڭ قىزمەتكەرى تامارا زۋەۆا سۋعا ءتۇسۋ كەزىندە مىناداي شارالاردى ساقتاۋدى ەسكەرتەدى:· اۋا رايى جەلسىز, اشىق كۇندەرى عانا اۋا تەمپەراتۋراسى 23 گرادۋس, سۋدىڭ تەمپەراتۋراسى 18 گرادۋستان جوعارى بولعان كەزدە شومىلعان ءجون. ال بالالار مەن دەنساۋلىعى ناشار ادامدار ءۇشىن اۋادا 25 گرادۋس, سۋدا 20-22 گرادۋس جىلى بولعانى دۇرىس.
· ارنايى جابدىقتالعان جەرلەردە شومىلعان الدەقايدا قاۋىپسىز. سەبەبى, قيىن جاعدايعا تاپ بولساڭىز, بىلىكتى مامانداردىڭ كومەگىنە جۇگىنۋىڭىزگە بولادى. قايعىلى جاعدايلاردىڭ 99 پايىزى قۇتقارۋشىلار جۇمىس ىستەمەيتىن وزەن, كولدەردە ورىن الىپ جاتادى.
· سۋدا شەكتەۋلى مولشەر بەلگىسىنەن اسقانشا جۇزۋگە بولمايدى.
· ۇزاق ۋاقىت كۇنگە قىزدىرىنعان سوڭ نەمەسە اۋىر جۇمىستان كەيىن سۋعا بىردەن سەكىرۋگە بولمايدى. ويتكەنى, تەمپەراتۋرانىڭ جەدەل اۋىسۋى ادامدى ەستەن تاندىرىپ جىبەرۋى مۇمكىن.
· سۋدا ابدەن تونعانشا ءجۇرۋ قاۋىپتى.
· سۋ جاعاسىنا بالانى قاراۋسىز قالدىرۋ دا قاۋىپتى, ءتىپتى وتە تايىز سۋدىڭ وزىنە بالا قۇلاپ قالسا, تۇنشىعىپ قالۋى مۇمكىن.
· سۋعا الكوگولدى ىشىمدىك ءىشىپ نەمەسە ەسىرتكىگە ەلتىپ الىپ ءتۇسۋ دە ۇلكەن قاۋىپتىڭ كوزى سانالادى. قايعىلى جاعدايلاردىڭ تەڭ جارتىسى وسىنداي سەبەپتەردىڭ سالدارىنان ورىن الىپ جاتادى.
· ەگەر ءسىز سۋدا كەلەڭسىز جاعدايعا تاپ بولساڭىز, ۇرەيگە بوي الدىرماڭىز, شاما كەلگەنشە سابىرلىلىق پەن سالقىنقاندىلىقتى ساقتاساڭىز – امان قالۋىڭىزعا كەپىلدىك مول. توتەنشە جاعدايلارعا كۋا بولىپ جاتساڭىز, 122 قۇتقارۋ تەلەفونىنا قوڭىراۋ شالىڭىز.
