الدىڭعى كۇنى استانا ورمانىنىڭ وڭ جاق قاناتىنان تۋرا ساسكە تۇستە قويۋ ءتۇتىن بۇرق ەتە قالدى. قۋراعان اعاشتاردىڭ قىزىل جالىنى لەزدە كۇش الىپ, اينالاسىن جالماپ كەلە جاتقان. سول كەزدە دابىل بويىنشا اتقا قونعان استانا قالاسىنىڭ توتەنشە جاعدايلار دەپارتامەنتىنىڭ ءورت سوندىرۋشىلەرى وقيعا ورنىنا جەدەل جەتىپ, ءتىلسىز جاۋمەن ارپالىسقا ءتۇستى.
ورمانداعى وقۋ-جاتتىعۋ
بۇل ارناۋلى قىزمەتتىڭ ادەتتەگى وقۋ-جاتتىعۋى بولاتىن. ارنايى شاراعا تەك توتەنشە جاعدايلار دەپارتامەنتىنىڭ ماماندارى عانا ەمەس, «جاسىل ايماق» رمك, «زەلەنستروي» اق, «استانا سۋ ارناسى» مكك, استانا ورمانىنىڭ قىزمەتكەرلەرى دە تارتىلدى. سوندىقتان بۇل جولعى وقۋ-جاتتىعۋدا بىرنەشە قىزمەتتىڭ بىرلەسىپ ارەكەت ەتە بىلۋىنە جەتە ءمان بەرىلدى.
استانا قالالىق توتەنشە جاعدايلار دەپارتامەنتىنىڭ باسشىسى بارات دۇزاقباەۆ وتىزعا جۋىق ارنايى تەحنيكا مەن مامانداردىڭ دايىندىعىن ءوزى تەكسەرىپ شىققاننان كەيىن جاتتىعۋ باستالدى. ورمان شەتىندە شارتتى تۇردە باستالعان ءورت وقيعاسىندا ءتيىستى قىزمەتتەردىڭ تەحنيكالارى مەن ادام كۇشىن رەتىمەن جۇمىلدىرا ءبىلۋ شەبەرلىگى سىنعا ءتۇستى. كەلەسى كەزەكتە اينالاسىنا جاقىنداۋ مۇمكىن ەمەس ىرىلەۋ شارتتى ءورت وقيعاسىنا ك-32 تىكۇشاعى جۇمىلدىرىلدى. اۋەگە شاپشاڭ كوتەرىلگەن تىكۇشاق اۋەلى ءورت اۋماعىنا جەدەل بارلاۋ جۇرگىزدى دە, سودان سوڭ ءتيىستى جەرگە ۇشىپ بارىپ, اۋقىمى توننالىق سۋ سىياتىن ۇلكەن قۇتىنى ءىلىپ الىپ, كوككە قايتا كوتەرىلدى. سوسىن ارنايى تەحنيكالاردىڭ جاقىنداۋىنا مۇمكىندىك بولماي تۇرعان ءورت اۋماعى ۇستىنەن ۇشىپ, توبەسىنەن قۇتىداعى سۋدى اقتارىپ ءوتتى. جالىن ءسال باسەڭدەگەندە, دايىن تۇرعان ماماندار مەن تەحنيكالار دا ىسكە كىرىستى. ءسويتىپ, ورمان شەتىندە الدەكىمدەردىڭ لاقتىرىپ كەتكەن تەمەكى تۇقىلىنان شىققان ءورت جارتى ساعاتتىڭ اينالاسىندا ءسوندىرىلدى.
وقۋ-جاتتىعۋ بارىسىن ءجىتى قاداعالاعان بارات دۇزاقباەۆ باستاعان ساراپشى توپ مامانداردىڭ شارتتى ءورت وقيعاسى بارىسىنداعى ءىس-ارەكەتىن جوعارى باعالادى.
– بۇگىنگى شاراعا ءبىزدىڭ دەپارتامەنتتەن 27 ارنايى تەحنيكا مەن جەكە قۇرامنىڭ 65 قىزمەتكەرى جۇمىلدىرىلعان بولاتىن. ولار وقيعا بارىسىندا وزگە دە سالالىق قىزمەتتەرمەن بىرلەسىپ, ساۋاتتى ارەكەت ەتە ءبىلدى. مۇنداي وقۋ-جاتتىعۋلاردىڭ دالا ورتتەرىن جەدەل اۋىزدىقتاۋعا ۇلكەن سەپتىگىن تيگىزەرى ءسوزسىز. سىزدەرگە قىزمەت بارىسىندا تەك قانا ساتتىلىك تىلەيمىن! – دەدى ب.دۇزاقباەۆ.
جىل باسىنان 149 ءورت سوندىرىلگەن
استانا قالالىق توتەنشە جاعدايلار دەپارتامەنتى ءورت ءسوندىرۋ جانە اپاتتىق-قۇتقارۋ جۇمىستارىنىڭ باسشىسى مارعۇلان امانباەۆتىڭ ايتۋىنشا, ەلوردا اۋماعىنداعى دالالىق جەرلەردە, ساياجاي القاپتارىندا جىل باسىنان بەرى 149 ورت وقيعاسى بولىپتى. دەگەنمەن, ارنايى مامانداردىڭ جەدەل ءىس-ارەكەتى ارقاسىندا ءتىلسىز جاۋ بىردەن اۋىزدىقتالىپ وتىرعان.
– ورايى كەلگەندە ايتا كەتەيىك, ەلباسىمىزدىڭ تىكەلەي باستاماسىمەن بوي كوتەرگەن استانا ورمانى ءبىزدىڭ ايرىقشا نازارىمىزدا. بۇل ورمان القابىنىڭ اۋماعى بۇگىندە 14 مىڭ گەكتاردى قامتيدى. ال ورمان ىشىندە جالپى سانى 11 ملن تۇپكە جۋىقتايتىن ءتۇرلى اعاشتار وسەدى. قۇدايعا شۇكىر دەپ ايتايىق, ورمان اۋماعىندا ءورت وقيعاسى تىركەلىپ كورگەن جوق. جاز بويى, نەگىزىنەن, دالالىق جەرلەردە عانا ءورت بولدى. قالا ماڭىندا ورنالاسقان ساياجايلاردا دا, وكىنىشكە قاراي, ءورت وقيعاسى ءجيى تىركەلەدى. قىزىل جالىننىڭ 99 پايىزى ادامداردىڭ قاۋىپسىزدىك شارالارىن ساقتاماۋى سالدارىنان بولادى. اسىرەسە, كۇزگى جانە قىسقى مەزگىلدەردە. ويتكەنى, كۇن سالقىنداعاندا, ساياجايدا تۇراتىندار, قالا ماڭىنا قونىستانعاندار ەلەكتر جابدىقتارىن ءجيى قولدانا باستايدى, وتىندى دا كوبىرەك پايدالانادى. سول كەزدە قاۋىپسىزدىك شارالارىنا ءمان بەرمەيدى. ورايى كەلگەندە ايتا كەتەر جاي, بيىل ساياجايلاردا, قالا ماڭىندا ءورت وقيعالارى بۇرىنعى جىلمەن سالىستىرعاندا كوپ بولدى, – دەپ قىنجىلىس ءبىلدىردى مارعۇلان امانباەۆ.
جاز ايلارى – تابيعات اياسىندا دەمالۋعا تاپتىرمايتىن مەزگىل. بىراق دەمالىس كەزىندە توتەنشە جاعدايلار دەپارتامەنتىنىڭ ارنايى ەسكەرتپەلەرىنە قۇلاق اسقان ءجون-اۋ. تەمەكى تۇقىلىن مۇقيات ءسوندىرىپ, سىرىڭكە قالدىقتارىن شاشپاي, جاققان وتىمىزدى دا ابدەن ءوشىرىپ, تازالاپ جۇرسەك, كوپتەگەن قايعىلى وقيعالاردىڭ الدىن الارىمىز ءسوزسىز.
مەڭدوللا شامۇراتوۆ
