سۋدىڭ قاۋپى سەيىلدى
وتكەن سەنبىدە استانادا قالىڭ نوسەر جاۋىپ, كوپتەگەن كوشەلەردى سۋ باسىپ قالدى. ءدال سول كۇنى قالالىق كوممۋنالدىق قىزمەتكەرلەرى تاۋلىك بويى كوشەلەر مەن جولدارداعى سۋدى سورۋ جۇمىستارىمەن اينالىستى.
دالىرەك ايتقاندا, باس قالاداعى اتالعان جۇمىستارعا 70-تەن استام تەحنيكا تارتىلدى. سونىڭ ىشىندە الماتى اۋدانىنان – 26, سارىارقا اۋدانىنان – 17, ەسىل اۋدانىنان – 29 ماشينا بولىنگەن.
تابيعاتتىڭ توسىن مىنەزى تەك قانا ەلوردادا عانا ەمەس, ەلىمىزدىڭ باسقا ايماقتارىندا دا ورىن العان. ايتالىق, قوستانايدىڭ رەسەيمەن شەكارالاس اۋداندارىندا مۇزدى بۇرشاق جاۋىپ, كولىك جۇرگىزۋشىلەر جول بويىنداعى قوزعالىستى توقتاتۋعا ءماجبۇر بولعان. ال رەسەيدىڭ كەيبىر ولكەسىندە كادىمگىدەي قار جاۋعان.
راسىندا, قازگيدرومەت قىزمەتكەرلەرى «ماۋسىم ايىنىڭ باسىندا ەلىمىزدىڭ باسىم بولىگىندە اتموسفەرالىق فرونتالدى ءبولىكتەردىڭ وتۋىنە بايلانىستى كەي جەرلەردە جاڭبىر جاۋىپ, نايزاعاي بولادى, جەل كۇشەيەدى» دەپ ايتقان ەدى. سول اينا-قاتەسىز كەلدى. سينوپتيكتەردىڭ بولجامىنشا, 7 ماۋسىمدا كۇندىز +25…+27°س ىستىق, تۇندە +13…+15°س جىلى بولماق. سونداي-اق, كۇن الا بۇلتتانىپ, وتكىنشى جاڭبىر جاۋىپ, كۇن كۇركىرەيدى دەپ كۇتىلۋدە.