نارازىلىق اكتسيالارىن قارجىلاندىرعان
تانىمال قازاقستاندىق كاسىپكەر, «شىمكەنت پيۆو» سەرىكتەستىگىنىڭ ديرەكتورى توقتار تولەشوۆ جەر رەفورماسىنا قاتىستى ميتينگتەردi قارجىلاندىرعان جانە بيلىكتى كۇشپەن باسىپ الۋعا دايىندىق جۇمىستارىن جۇرگىزگەن. بۇل تۋرالى كەشە باس پروكۋراتۋرادا وتكەن بريفينگ بارىسىندا ۇلتتىق قاۋiپسiزدiك كوميتەتi ءباسپاسوز قىزمەتiنiڭ وكiلi رۋسلان كاراسەۆ مالىمدەدى.
«تەرگەۋدە تولەشوۆ مىرزانىڭ بۇرىن بيلىكتى كۇشپەن باسىپ الۋعا دايىندىق جۇمىستارىن جۇرگىزگەندىگى, وتكەن جىلدان بەرى بەلسەندى ناقتى ارەكەتتەر قولدانعانى تۋرالى تولىق مالىمەتتەر الىندى. ونىڭ جوسپارىندا قاۋىپتى وشاقتاردى باقىلاپ, ەل ىشىندەگى جاعدايدى تۇراقسىزداندىرۋ, نارازىلىق اكتسيالارىن جانە جاپپاي تارتىپسىزدىكتەردى ۇيىمداستىرۋ, سونىڭ اينالاسىندا بالامالى ۇكىمەتتى قالىپتاستىرۋ جانە ارەكەت ەتۋشى بيلىك قۇرىلىمىن وزگەرتۋ قاراستىرىلعان. اتىراۋ, استانا, الماتى, ورال جانە قىزىلوردا قالالارىنداعى جەر رەفورماسىنا قارسى نارازىلىق اكتسيالارىن تولەشوۆ مىرزا بىلتىرعى جىلدىڭ جەلتوقسان ايىندا دايىنداپ, قارجىلاندىرعانى تۋرالى دالەلدەر بار. اتالعان نارازىلىق اكتسيالارىن بۇدان دا ەرتەرەك وتكىزۋ جوسپارلانعانى انىقتالعان. بىراق, تولەشەۆتىڭ تۇتقىندالۋىنا بايلانىستى اكتسيانى وتكىزۋ ۋاقىتىن ۇيىمداستىرۋشىلار وزگەرتكەن. قازىرگى تاڭدا ولاردىڭ كەيبىرەۋلەرى قۇرىقتالعان» دەدى ر.كاراسەۆ.
كوميتەت وكىلىنىڭ ايتۋىنشا, تەرگەۋ ورگاندارى قازاقستاننىڭ باسقا دا وڭىرلەرىندە ۇيىمداستىرىلعان نارازىلىق اكتسيالارىن قارجىلاندىرۋ فاكتىلەرىن قاراعان.
«تولەشەۆ تەرگەۋ يزولياتورىندا بولا تۇرا ەلدەگى قالىپتاسقان جاعدايدى پايدالانىپ, 2016 جىلدىڭ مامىرىندا وڭتۇستىك قازاقستان وبلىسىنىڭ سارىاعاش قالاسىندا جاپپاي تارتىپسىزدىك ۇيىمداستىرۋعا ارەكەتتەنگەن. ءوزىنىڭ جوسپارلارىن ىسكە اسىرۋ ماقساتىندا تولەشوۆ قۇقىق قورعاۋ ورگاندارىنىڭ بۇرىنعى جانە قارۋلى كۇشتەردىڭ جوعارى لاۋازىمدى تۇلعالارى, سونداي-اق, قارۋلى كۇشتەردىڭ كەيبىر باسشىلارى قاتارىنان ماقساتتى تۇردە ءوزىنىڭ جاقتاستارىن ىزدەستىرگەن. تولەشوۆ مىرزا جاسىرعان ورىندارداعى قارۋ-جاراق پەن جارىلعىش زاتتاردى ۇلتتىق قاۋىپسىزدىك كوميتەتى تاركىلەگەن» دەدى ول.