– رەپەرتۋارىڭىزدا قازاقپەن قاتار, قىرعىز, قاراقالپاق, ورىس, ءتۇركىمەن حالىقتارىنىڭ ءاندەرى بار. باسقا ۇلتتىڭ ءانىن ورىنداۋعا نەگە قۇمار بولدىڭىز؟
دينارا
– كىشكەنتاي كەزىمدە وتە پىسىق بولدىم. تاشكەنتتەن پوشتا ارقىلى باتىر, لۋيزا زاكيروۆتاردىڭ انتاباقتارىن الدىرتىپ, سولاردىڭ اۋەندەرىن ۇيرەنەتىنمىن. بولگاريانىڭ ليلي يۆانوۆا دەگەن ەسترادا جۇلدىزى بولعان. سونىڭ اندەرىن ورىنداعاندى جاقسى كورەتىنمىن. ولاردى قانشالىقتى, دۇرىس ايتىپ جاتقانىمدى, ارينە, ءبىلمەيتىنمىن. ايتەۋىر, الگى ارتىسكە وزىمشە ەلىكتەپ ىڭىلداپ جۇرەتىنمىن. ءسويتىپ, ساحناعا الىپ شىقتىم.
– بۇگىنگى تىرشىلىگىڭىز جايىندا ايتىپ بەرسەڭىز… شاكىرتتەرىڭىز بار ما؟
ماقسات
– بۇگىنگى ومىرىمە كوڭىلىم تولادى. ءوزىمنىڭ سۇيىكتى ىسىممەن اينالىسىپ جۇرگەنىم ءۇشىن تاعدىرىما جانە وتباسىما ريزامىن.
ايتۋلى ءىس-شارالارعا شاقىرىلىپ تۇرامىن. ارنايى وقۋ ورنىندا ساباق بەرمەسەم دە, شاكىرتتەرىم بار. كومەك سۇراپ كەلگەن تالانتتى جاستاردىڭ بەتىن قايتارعان ەمەسپىن, ۇنەمى اقىل-كەڭەسىمدى ايتىپ وتىرامىن.
– قوعامدا ورىن الىپ جاتقان قانداي ماسەلەگە الاڭداۋلىسىز؟
ميراس
– ادام ەسەيگەن سوڭ, كوڭىلشەك بوپ كەتەدى ەكەن. تۋعان جەرىم نارىنقولعا بارعان سايىن ول ءوڭىردىڭ جاداپ-جۇدەپ كەتكەنىن كورىپ كوڭىلىم قۇلازيدى. وسى جەردىڭ جاعدايى جاقسارسا ەكەن دەيمىن.
– كەيىنگى تولقىننان قاي ءانشىنى ءسۇيىپ تىڭدايسىز؟
لاۋرا
– قازىرگى انشىلەردىڭ كوبىسى ۇنايدى. بۇگىندە ساحنادا ىزدەنىمپاز, ەڭبەكقور انشىلەر كوپ. وعان قوسا, ولاردىڭ وزدەرىن تانىتۋىنا مۇمكىندىگى زور. ءبىر قىزىعى, ءبىزدىڭ كەزىمىزدە حالىققا تانىلۋ وتە قيىن بولاتىن. ول ۋاقىتتا تەلەۆيدەنيە مۇمكىندىگى شەكتەۋلى ەدى. قازىرگى جاس انشىلەر قورىقپاي-اق سالتاناتتى سارايلاردا كونتسەرتتەرىن بەرىپ جاتادى. سوعان تاڭعالامىن.
– كەزىندە ءسىز شىرقاعان «بالا عاشىق» ءانىن مەيرامبەك بەسپاەۆ ورىنداپ ءجۇر. قازىرگى نۇسقاسىنا كوڭىلىڭىز تولا ما؟
جازيرا
– مەيرامبەك قاي ءاندى ورىنداسا دا, كورەرمەندەرىنە جەتكىزە بىلەدى. ۇزدىككەن ءۇنى جانىڭدى باۋرايدى. حالىق ءارتىسى نۇكەتاي مىشباەۆا اپامىز: «ءبىزدىڭ سۇلۋشاش ساحنادا شوشاڭدامايدى» دەۋشى ەدى. سول سياقتى مەيرامبەك تە ءوزىن بىرقالىپتى ۇستايدى. كىشكەنتايىنان ساحنانى كورىپ وسكەن بالا عوي.
– قازىر انشىلەردىڭ كومپيۋتەرلەنگەن داۋىستارىن ءبىر-بىرىنەن اجىراتا المايمىز. ءسىزدىڭ داۋىسىڭىز نەسىمەن ەرەكشە؟
جامال, قالا تۇرعىنى
– ماقتانعانىم ەمەس, داۋىسىمنىڭ وزگەشەلىگى بار. سول سياقتى نۇرعالي ءنۇسىپجانوۆ, ماقپال ءجۇنىسوۆا, بيبىگۇل تولەگەنوۆا, روزا رىمباەۆا سىندى ساحنا ساڭلاقتارىنىڭ داۋىستارى سازدى, كوڭىلگە قونىمدى. اندەرىن تىڭداساڭ, كادىمگىدەي دەمالىپ قالاسىڭ.
– كوگىلدىر ەكرانداعى ءتۇرلى باعدارلامالارعا كىلەڭ جاس انشىلەر شاقىرىلادى. سوندا اعا بۋىن وكىلدەرىنە ۇسىنىس ايتىلماي ما؟
ورالبەك, قالا تۇرعىنى
– بۇل سۇراقتى بىزگە ەمەس, تەلەۆيدەنيە سالاسىنداعىلارعا قويۋ كەرەك. ماسەلەن, كەڭەس وداعىنان كەلە جاتقان ءۇلكەندەردى, مىنا ءبىزدى قوسىپ باعدارلاما دايىنداسا, كەيىنگى ۇرپاققا ماعىنالى انمەن ۇلكەن تاربيە كورسەتۋگە بولادى. ايتپەسە, كومپيۋتەرمەن جازىلعان «ءسۇيدىم, كۇيدىم» دەپ سىبىرلاپ-كۇبىرلەپ توي دەڭگەيىندە كونتسەرت بەرەدى. ساحنا دەگەن – كيەلى دۇنيە. حالىقتى ونەرىمەن تاڭعالدىراتىن تالعامدى, كاسىبي دەڭگەيدى قاجەت ەتەدى.
– تويعا شاقىرىلىپ تۇراسىز با؟
اقان
– ءيا, تويعا بارىپ تۇرامىن. حالىق ارقاشان ىستىق ىقىلاسپەن قارسى الادى.
– استانالىقتارعا ارناپ كونتسەرت بەرەسىز بە؟
تامارا
– ەلوردالىقتارعا ارناپ, جاڭا جىل قارساڭىندا كونتسەرت بەرمەكشىمىن. قازىر سوعان مىقتاپ دايىندالىپ جاتىرمىن.
– استانا تۇرعىندارىنا تىلەگىڭىز…
– كورەرمەندەرىمىز باي, باقۋاتتى تىرلىك كەشسە, بەيبىتشىلىك باياندى بولسا دەيمىن!
ەركەجان ساتىمبەك