سىرتقى جارناماعا كىم جاۋاپتى

قالالىق قوعامدىق كەڭەس وتىرىسىندا كەڭەس مۇشەسى, «نۇر وتان» پارتياسىنىڭ استانا قالالىق فيليالى توراعاسىنىڭ ورىنباسارى ۆلاديسلاۆ سەرگەەۆ زاڭسىز سىرتقى جارنامالىق اقپارات ماسەلەسىن كوتەردى.

«وسىدان ەكى اي بۇرىن ءدال وسىنداي وتىرىستا مۇنى تالقىلاپ, ۇسىنىستاردى جەت­كىزگەنبىز. ساۋلەت, قالا قۇ­رى­لىسى جانە جەر قاتىناستارى باسقارماسىنىڭ باسشىسى باقتىباي تايتاليەۆ بۇل ءما­سەلەنى جوندەيمىن دەپ ۋادە بەردى. الايدا «باياعى جارتاس – ءبىر جارتاس». ءبىز بەرگەن ۇسىنىستار نەگە ورىندالمايدى؟ بىرىنشىدەن, قالا كەلبەتىنە نۇقسان كەلمەۋى ءتيىس. زاڭسىز جارنامالىق اقپاراتتى بايقاعان حالىق قايدا حابارلاسۋ كەرەكتىگىن ءبىلۋى كەرەك. «نۇر وتان» پارتياسى قالالىق فيليالىنىڭ قوعامدىق قابىلداۋىنا كەلەتىن جۇرت اتالمىش ماسەلە بويىنشا ارىزدارىن ايتادى. ولاردىڭ ايتۋىنشا, اكىمدىك, ساۋلەت, قالا قۇرىلىسى جانە جەر قاتىناستارى باسقارماسى, «109» قىزمەتى اراسىندا سابىلىپ ءجۇرىپ, ناقتى جاۋاپ الا المايدى» دەدى ول.
ونىڭ ايتۋىنشا, زاڭعا با­عىناتىن كاسىپكەرلەرگە جارنامانى ورنالاستىرۋ مەحانيزمىن جەڭىلدەتۋ قاجەت. سەبەبى بىرەسە تىلدەردى دامىتۋ جانە ارحيۆ ءىسى باسقارماسى بەكىتپەيدى نەمەسە ساۋلەت, قالا قۇرىلىسى جانە جەر قاتىناستارى باسقارماسى جارنامانىڭ ءتۇسىن دۇرىس ەمەس دەيدى. ونى قولداعان قالالىق قوعامدىق كەڭەستىڭ توراعاسى سانسىزباي ەسىلوۆ باقتىباي تايتاليەۆتىڭ اتىنا حات دا­يىنداۋدى تاپسىردى.
كەڭەس مۇشەلەرى الدىندا بايانداما جاساعان ساۋلەت, قالا قۇرىلىسى جانە جەر قاتىناستارى باسقارماسى باسشىسىنىڭ ورىنباسارى گۇلجان كيۆەنوۆا وسىنداي تۇيتكىلدىڭ بارلىعىن مويىندادى. «بۇگىنگى تاڭدا بىزبەن كەلىسىلمەگەن جارنامانى ىلۋگە رۇقسات بەرمەيمىز. بۇل ماسەلە بويىنشا اۋدانداردىڭ اكىمدىكتەرى, مەملەكەتتىك كىرىستەر دەپارتامەنتىمەن بىرلەسىپ جۇمىس ىستەپ وتىرمىز. نەگىزى, ءتيىستى ەرەجە بار. ماسەلە كاسىپكەرلەردىڭ سول ەرەجەگە باعىنۋىندا بوپ تۇر» دەدى باسقارما باسشىسىنىڭ ورىنباسارى.
ۆلاديسلاۆ سەرگەەۆ بولسا اتالمىش ماسەلە بويىنشا ءالى دە جۇمىس ىستەۋ كەرەكتىگىن جەتكىزىپ, مۇنى باسقارمامەن بىرلەسىپ شەشۋگە شاقىردى. قورىتىندىسىندا قوعامدىق كەڭەس مۇشەلەرى باسقارما باسشىسىنان جازباشا جاۋاپتى كۇتىپ, بولمايتىن بولسا, كەڭەس جۇمىسىنىڭ جوسپارىنا تۇزەتۋ ەنگىزىپ, باقتىباي تايتاليەۆ­تىڭ ەسەبىن تىڭداۋدى ۇيعاردى.

امانعالي قالجانوۆ