تالاپتى جاندى تاعدىر دا جاسىتا المايدى

كەيدە قول-اياعى ساۋ, دەنساۋلىعى جاقسى ادامداردىڭ قولىنان كەلمەگەن ءىستى مۇمكىندىگى شەكتەۋلى ازاماتتار دوڭگەلەتە اينالدىرىپ, ءوز جانىن باعۋمەن قاتار, قوعامعا دا ۇلەسىن قوسىپ, توڭىرەگىنە ۇلگى كورسەتىپ جاتادى. سونداي ازاماتتىڭ ءبىرى – حالىق­ارالىق اقپاراتتىق تەحنولوگيالار مەكتەبىنىڭ نەگىزىن قالاۋشى, ماركەتينگ جانە IT سالاسىنىڭ مامانى ءامىر سۇلەيمەنوۆ.بۇل كۇندە IT سالاسىنداعى جاس مامان رەتىندە تانىمال بولعان ءامىر سۇلەيمەنوۆتىڭ تالابى مەن تالانتى, تالعامى مەن تاعدىرى تۇستاستارىنان وزگەشە. جاستايىنان فيزيكا جانە ماتەماتيكا پاندەرىنە اۋەس بولعان ءامىر كوپتەگەن وليمپيادالارعا قاتىسىپ, سان مارتە باس جۇلدەنى جەڭىپ الىپتى. الايدا ەڭ سوڭعى رەت بايان­اۋىلدا وتەتىن حالىقارالىق وليمپياداعا قاتىسقالى بارا جاتقان جولدا, ويلاماعان جەردەن جول اپاتىنا ۇشىراپتى. سول كۇننەن باستاپ ءامىردىڭ تاعدىرى دا, تاڭداۋى دا وزگەرىپتى. «كۇردەلى وتادان كەيىن قاتەردەن قۇتىلدىم. الايدا مەنىڭ الدىمدا «ەندى نە ىستەۋىم كەرەك, تاعدىردىڭ سالعانىنا كونىپ, مۇگەدەكپىن دەپ جاتا بەرۋىم كەرەك پە, جوق تاعى دا تالماي تالپىنۋىم قاجەت پە؟» دەگەن ۇلكەن تاڭداۋ تۇردى. سوڭىندا بويىمدا جانىم باردا تالماي تالپىنام دەپ شەشتىم دە, قاشىقتىقتان وقۋدىڭ جانە جۇمىس ىستەۋدىڭ مۇمكىندىكتەرىن ىزدەدىم. سەبەبى ول كەزدە كوپتەگەن ءبىلىم بەرۋ ورىندارىنىڭ عيماراتتارىندا ليفت جوق جانە ولار مۇمكىندىگى شەكتەۋ­لى ادامداردىڭ پايدالانۋىنا ىڭعايسىز ەدى. وقىپ جۇرگەن كەزىمدە IT سالاسى مەنى قاتتى قىزىقتىرعان بولاتىن. جول اپاتىنان كەيىن بوس ۋاقىتىم كوپ بولدى. كۇندىز-ءتۇنى كومپيۋتەرمەن الىسىپ, IT سالاسىنىڭ قىر-سىرىنا ءۇڭىلدىم. ونلاين كۋرستارعا قاتىسىپ, باعدارلامالاۋ ءتىلى مەن ءتاسىلىن Google, Samsung, Cisco كۋرستارىندا يگەرىپ, سەرتيفيكات الدىم» دەيدى ءامىر ءوزىنىڭ IT سالاسىنا ارالاسۋ بارىسىنا ايالداعاندا.
حالىقارالىق دارەجەدەگى ديپلومعا يە بولعاننان كە­يىن ءامىردى جۇمىسقا شاقىر­عان ورىندار دا كوبەيىپتى. الايدا ءامىردىڭ تاڭداۋى 20 كومپا­نيا­نىڭ اراسىنان رەسەيدىڭ IT كومپانياسىنا ءتۇسىپتى. وسى ارادا ءوز جۇمىسىن web باعدارلاماسىن ازىرلەۋشى بولۋدان باستاعان ول قاشىقتىقتان جۇمىس ىستەۋ ارقىلى تمد كولەمىندە كوپتەگەن جوبالاردى ازىرلەۋ جۇمىستارىنا اتسالىسىپتى.
بىراق ءوز ماقساتىنا جەتكەنىمەن, كوزى اشىق, كوكىرەگى وياۋ ءامىردى تولعاندىراتىن ماسەلەلەر دە از ەمەس ەدى. سونىڭ ءبىرى – مۇمكىندىگى شەكتەۋلى جانداردىڭ جاعدايى. ولاردىڭ كوبى ەڭبەككە جارامدى بولسا دا, جۇمىس ىستەۋگە مۇمكىندىگى جوقتىعى ونى كوپ ويعا سالاتىن. «ەلىمىزدە 600 مىڭنان اسا مۇمكىندىگى شەكتەۋلى ازامات بار, ولاردىڭ 439 مىڭى ەڭبەككە جارامدى, ءبىلىمى, جۇمىس تاجىريبەسى بار بولسا دا, جاردەماقىعا سۇيەنىپ كۇن كورۋگە ءماجبۇر. قازاقستاندا مۇگەدەكتەردىڭ مەملەكەتتەن الاتىن قارجىسى 54 مىڭ تەڭگە شاماسىندا. بۇل ولاردىڭ باستاپ­قى دەڭگەيدەگى قاجەتىن وتەۋگە جەتپەگەن سوڭ, باسقا ەشتەڭەگە مويىن بۇرا المايدى. ەلىمىزدە بايقالاتىن تاعى ءبىر قۇبىلىس – دەنساۋلىعىنان اقاۋ بايقالعان ازاماتتاردان بولەك, وعان كۇتىم جاسايتىن وتباسىنىڭ تاعى ءبىر مۇشەسى جۇمىسىنان قوسا ايى­رىلىپ, قوعامنان قول ۇزەدى. بالاسى ءارتۇرلى اۋىر سىرقاتقا شالدىققان انالار بالامنىڭ كۇتىمى, ەمى دەپ ۇيدە وتىرادى. دەمەك, مۇمكىندىگى شەكتەۋلى جانداردى قوعامدىق جۇمىسقا تارتۋ ولاردىڭ تابىس تابۋىنا مۇمكىندىك بەرىپ قانا قويماي, وزدەرىن قوعامنىڭ ءبىر مۇشەسى رەتىندە سەزىنۋىنە دە ءتيىمدى» دەپ تەرەڭ ءبىر تىنىستاپ العان ءامىر حالىقارالىق اقپاراتتىق تەحنولوگيالار مەكتەبىن اشۋداعى ماقساتى دا سول مۇمكىندىگى شەكتەۋلى جاندارعا ءۇمىت سىيلاپ, شابىت بەرۋ ەكەنىن ايتتى.
ءامىردىڭ IT سالاسىنداعى ارتىق­شىلىعى مەن ءبىلىم الۋ جولىنداعى تالپىنىسى تۇتاس قوعامنىڭ نازارىن اۋداردى. سونىڭ ناتيجەسىندە ءامىردىڭ مەكتەپ اشۋ جوسپارى قر ەڭبەك جانە حالىقتى الەۋمەتتىك قورعاۋ مينيسترلىگى تاراپىنان قولداۋ تاپتى. سونىمەن 2018 جىلى تسيفر­لى وقىتۋ جوباسى باستاۋ الىپ, ءوز تيىمدىلىگىن كورسەتتى. سەبەبى ول تمد ەلدەرى كولەمىندە اشىلعان العاشقى الەۋمەتتىك مەكتەپ ەدى. مۇمكىندىگى شەكتەۋ­لى ازاماتتاردى, كوپبالالى انالاردى, جۇمىسسىز­داردى, مۇگەدەك بالا تاربيەلەپ وتىرعان انالاردى تەگىن وقىتۋ ماقساتىندا اشىلعان بۇل مەكتەپتە قازىر SMM مەنەدجەرلەرى, SEO ماماندىعى, كونتەكستى جارناما, JAVA ازىرلەۋشىلەر, باعدارلامالاۋ جانە ءموبيلدى قوسىمشالاردى ازىرلەۋ ماماندىقتارى بويىنشا وقىتۋ ءجۇرىپ جاتىر. بۇل ماماندىقتاردى ەلىمىزدىڭ كەز كەلگەن جەرىندە وتىرىپ-اق قاشىقتىقتان وقۋعا بولادى.
ستاتيستيكا بويىنشا SMM مار­كەتينگى ماماندىعى بو­يىنشا وقىتۋ اقش-تا 10 جىل­دىڭ الدىندا, ەۋروپادا 7 جىل بۇرىن جۇزەگە اسىرىلعان. «اقش-تا 20 ملن ستۋدەنتتىڭ ۇشتەن ءبىر بولىگى ونلاين فورماتىندا وقيدى. ءبىزدىڭ ەلدە دە قاشىقتىقتان وقىتۋدىڭ مۇمكىندىگىن كەڭەيتۋ كەرەك. اسىرەسە, بۇل مۇمكىندىگى شەكتەۋلى جاندار ءۇشىن وتە قاجەتتى» دەپ ءامىر قاشىقتىقتان وقىتۋدىڭ قاجەتتىلىگىن دە اتاپ ءوتتى.
2018 جىلدىڭ 28 جەلتوقسانىندا قر ەڭبەك جانە حالىقتى الەۋمەتتىك قورعاۋ مينيسترلىگىنىڭ قولداۋىندا, بۇۇ دامۋ باعدارلاماسى مەن ءامىر سۇلەيمەنوۆتىڭ حالىقارالىق اقپاراتتىق تەحنولوگيالار مەكتەبى اراسىندا كەلىسىمگە قول قويىلدى. وسى كەلىسىمگە سايكەس, مۇمكىندىگى شەكتەۋ­لى جانداردىڭ ءبىلىم الۋىنا گرانتتار بەرۋ قاراستىرىلعان. قازىرگى تاڭدا بۇل ءبىلىم بەرۋ ورنىنان 100-گە جۋىق ادام ءبىلىم الىپ, ونىڭ 80 پايىزى جۇمىسقا ورنالاسقان. 200-گە جۋىق ادام كەڭەس الىپ, ءوز مۇمكىندىگىن اشۋدىڭ جولىن تاپقان. اتاپ ايتقاندا, اتالعان وقۋ ورنىنان ءبىلىم العان ءار 10 ادامنىڭ 8-ءى ءوز بەتىنشە اقشا تابا باستاعان نەمەسە جۇمىسقا ورنالاسقان.
وتكەن ايدا «بيزنەستىڭ جول كارتاسى-2020» باعدارلاماسى بويىنشا ءامىردىڭ الداعى ماقساتتارىن جۇزەگە اسىرۋىنا قولداۋ كورسەتۋ ماقساتىندا مەملەكەتتەن 3 ميلليون تەڭگە قارجى ءبولىندى. «مەملەكەت تاراپىنان كورسەتىلگەن بۇل قولداۋ ءبىزدىڭ جۇمىسىمىزعا تىڭ سەرپىن بەرەدى دەپ ويلايمىن. سەبەبى ءبىز بۇل قارجىعا كومپيۋتەر, فوتواپپارات سياقتى بەينەباياندى ساباقتار جاساۋعا, وقىتۋعا قاجەتتى قۇرال-جابدىقتاردى ساتىپ الامىز. تۇرمانىمىز تۇگەل بولسا, قاشىقتىقتان وقىتۋ ساپاسى ارتا تۇسەدى» دەدى ءامىر.