استانادا تامىز ايىنىڭ العاشقى اپتاسىندا قۇبىلمالى اۋا رايى كۇتىلۋدە
كوزدى اشىپ-جۇمعانشا تامىز دا تابالدىرىعىمىزدان اتتادى. تامىلجىعان اۋا رايى بۇل ايدا دا ارقاسىن كورسەتپەيتىن سياقتى.
«قازگيدرومەت» ورتالىعىنىڭ ينجەنەر-سينوپتيگى ايگۇل مىڭجانوۆانىڭ ايتۋىنشا, الداعى ۋاقىتتا استانادا قۇبىلمالى اۋا رايى كۇتىلۋدە. ءتىپتى, مولشەردەن تىس جاۋىن-شاشىن ءتۇسۋى مۇمكىن.
ايدىڭ العاشقى اپتاسىندا اسپان قاباعى كوپ اشىلمايدى. اۋا تەمپەراتۋراسى +25 گرادۋسقا دەيىن كوتەرىلگەنمەن, جاڭبىر ءجيى جاۋادى. ال العاشقى دەكادا اياقتالاردا كۇن كۇرت سۋىتادى. نايزاعاي ويناپ, نوسەر توگۋى ىقتيمال. ايدىڭ ورتا تۇسىندا تەمپەراتۋرا شامامەن +24 گرادۋستىڭ ماڭايىندا تۇراقتايدى.
بۇل ۋاقىتتى حالقىمىز «تارازىنىڭ تۋى» دەپ اتاعان. تارازى تۋسا, تاڭ سالقىندايدى. ءدال وسى كەزدەن باستاپ قوڭىر كۇزدىڭ نىشاندارى بايقالادى. تامىزدىڭ سوڭى قايتادان جاڭبىرلى كۇندەرگە ۇلاسادى دەپ كۇتىلۋدە.