31 مامىر – اشارشىلىق جانە ساياسي قۋعىن-سۇرگىن قۇرباندارىن ەسكە الۋ كۇنىنە وراي استانالىقتار اشارشىلىق قۇرباندارىنىڭ ەسكەرتكىش-مونۋمەنتىنىڭ الدىنا جينالدى.
قۇربان بولعانداردى ءبىر مينۋتتىق ۇنسىزدىكپەن ەسكە العان استانا اكىمى اسەت يسەكەشەۆ باستاعان جەرگىلىكتى بيلىك وكىلدەرى مەن ءماسليحات دەپۋتاتتارى, زيالى قاۋىم مەن ءتۇرلى ۇكىمەتتىك ەمەس ۇيىمداردىڭ وكىلدەرى, ساياسي قۋعىن-سۇرگىن قۇرباندارىنىڭ ۇرپاقتارى جانە قالا تۇرعىندارى ەسكەرتكىش الدىنا گۇل شوقتارىن قويدى.
– اتام حايرەتدين بولعانباەۆ الاش ارىستارىمەن – ءاليحان بوكەيحان, احمەت بايتۇرسىنۇلى, مىرجاقىپ دۋلاتوۆتارمەن بىرگە قازاق حالقىنىڭ قامى ءۇشىن جانكەشتى قىزمەت اتقارىپ, اقمولا وبلىسىنداعى اشارشىلىقپەن كۇرەسكەن. الىستاعى اۋىلداردا اشتىقتان قىرىلىپ جاتقان ادامداردىڭ ىشىنەن ءتىرى قالعاندارىن اقمولاعا اكەلىپ, ولاردى امان الىپ قالۋ ءۇشىن جۇمىس جاساعان. وسى جاقتا بالالار ءۇيىن اشتىرىپ, قورعالجىن, اتباسار اۋداندارىندا مەكتەپ, اۋرۋحانا سالدىرعان. سودان اتامىز دا سولاقاي ساياساتتىڭ قۇرىعىنا ىلىگىپ, 1937 جىلى جازىقسىز اتىلعان, – دەيدى اتاسى جايلى زەينەتكەر جامبىل كامەلوۆ.
ايتا كەتۋ كەرەك, وسى كۇنى تۇسكە دەيىن الاشتانۋشى عالىمدار ستۋدەنت-جاستارمەن بىرگە اقمول كەنتىندەگى «الجير» مۇراجايىنا بارىپ, قۇربان بولعانداردىڭ رۋحىنا تاعزىم ەتىپ قايتتى.
