كەشە 1 ماۋسىم – حالىقارالىق بالالاردى قورعاۋ كۇنى استانادا ايرىقشا مەرەكەلەندى. بالالار قالادا ەمىن-ەركىن ءجۇرىپ, قىدىرۋى ءۇشىن استانا اكىمدىگى بۇل كۇنى وقۋشىلارعا قوعامدىق كولىكتەردە تەگىن ءجۇرۋ مۇمكىندىگىن جاسادى.
بيىل استانانىڭ 20 جىلدىق مەرەيتويى اتالىپ وتپەك. جيىرما جىلدا ەلوردانىڭ قانشالىق گۇلدەنىپ, قالاي كوركەيگەنىن كورىپ, سەزىنسىن دەگەن ماقساتتا استانا قالاسىنىڭ تۇرعىندارى مەن قوناقتارى ءۇشىن ارنايى «Red Bus» ەكى قاباتتى ەكسكۋرسيالىق اۆتوبۋسى دايىندالىپتى. 1 ماۋسىمنان باستاپ وسى اۆتوبۋسپەن كەز كەلگەن ادام قالادا تەگىن ساياحاتتاي الادى. «MEGA Silk Way» جانە «AiLand» (وكەاناريۋم) ويىن-ساۋىق ورتالىعىنان باستاپ قالانىڭ بارلىق كورىكتى جەرلەرىنە الىپ باراتىن اۆتوبۋس ءۇش كۇن بويى قىزمەت ەتپەك.
حالىقارالىق بالالاردى قورعاۋ كۇنىنە وراي ۇيىمداستىرىلعان توسىنسىي مۇنىمەن بىتكەن جوق. «سەنىڭ جاڭا قىرىڭ» رەسپۋبليكالىق چەللەندجىن قولداۋ ماقساتىندا قر تۇڭعىش پرەزيدەنتى قورىنىڭ فۋتبول كومانداسىنىڭ ويىنشىلارى بالالار ءۇيىنىڭ تاربيەلەنۋشىلەرىنە ارنالعان فۋتبول بويىنشا جاتتىعۋلار مەن شەبەرلىك ساباقتارىن وتكىزدى.
بالالار مەرەكەسىنىڭ كوڭىلدى وتۋىنە جەكەلەگەن ۇيىمدار دا اتسالىستى. ماسەلەن, «ايالا» قايىرىمدىلىق قورى ق.مۇڭايتپاسوۆ اتىنداعى وليمپيادالىق رەزەرۆتىك سپورت مەكتەپ-ينتەرناتىنىڭ 54 وقۋشىسىن تەپلوحودپەن ەسىل وزەنىندە جانە استانانىڭ كورىكتى جەرلەرىندە قىدىرتىپ, ارنايى جايىلعان داستارقاننان تاماقتاندىردى.
سول سەكىلدى بۇل كۇنى «نۇر الەم» – «بولاشاق ەنەرگياسى» مۇراجايى 17 جاسقا دەيىنگى بالالار ءۇشىن شارا جاريالاپ, ولاردىڭ مۇراجايعا تەگىن كىرۋىنە جول اشتى.
قالاداعى ساياباقتار مەن الاڭدار دا بالالاردىڭ مەرەكە ورداسىنا اينالدى. ماسەلەن, «عاشىقتار» ساياباعىندا تاڭعى 10.30-دان باستاپ بۇلدىرشىندەرگە ارنالعان ويىن-ساۋىق باعدارلامالارى قويىلىپ, بالالارعا تەگىن بالمۇزداق, شىرىندار ۇسىنىلدى. ۇيىمداستىرۋشىلاردىڭ ايتۋىنشا, بۇل كۇنى بالالارعا 4000 بالمۇزداق پەن 3000 ءتاتتى شىرىن ۇلەستىرىلگەن.
