وتكەن سەنبىدە استانا قالاسى ىشكى ىستەر دەپارتامەنتى باسشىلىعىنىڭ جانە جەكە قۇرامىنىڭ قاتىسۋىمەن قازاقستان پوليتسياسى كۇنىنە وراي ۆەلوشەرۋ ءوتتى. بىلتىر قولعا الىنعان يگى شارا بيىل دا جالعاسىن تاۋىپ, تاڭمەن تالاسا ۆەلوسيپەد ەرشىگىنە وتىرعان 500-دەن استام ءتارتىپ ساقشىلارى مەن ونىڭ بالالارى استانا كوشەلەرىن ارالادى.
ۆەلوسيپەدشىلەر «اتامەكەن» ەتنوكەشەنىنەن «قازاق ەلى» مونۋمەنتىنە دەيىن 7 شاقىرىم جولدى ءجۇرىپ ءوتتى. ىشكى ىستەر ورگانىنىڭ ارداگەرلەرى دە بۇل شارادان تىس قالمادى. جاس ارىپتەستەرىنەن قالماي, قاجىرلىلىق تانىتقاننىڭ ءبىرى – ارداگەرلەر كەڭەسىنىڭ توراعاسى, 75 جاستاعى ەسىم تانابەرگەنوۆ. شەرۋگە قاتىسۋشىلاردىڭ جول قاۋىپسىزدىگى قامتاماسىز ەتىلىپ, جول پوليتسياسى قىزمەتكەرلەرىنىڭ ەكيپاجى مەن موتوتسيكلشىلەر ەسكورتى جول سىلتەپ, الىپ ءجۇردى.
ەستەرىڭىزگە سالا كەتسەك, وسىدان 22 جىل بۇرىن 1992 جىلدىڭ 23 ماۋسىمىندا «قازاقستان رەسپۋبليكاسىنىڭ ىشكى ىستەر ورگاندارى» تۋرالى العاشقى زاڭ قابىلدانعان بولاتىن. سول سەبەپتى, 23 ماۋسىم – قازاقستان پوليتسياسى كۇنى بولىپ بەلگىلەندى. الداعى كۇندەردە دە استانادا پوليتسيا كۇنىنە وراي وسى سالانىڭ ۇزدىك ماماندارى ماراپاتتالىپ, ءتۇرلى شارالار وتەدى.
ايجان قاسىموۆا
