كوكتەم لەبى ءبىلىندى. قار كوبەسى سوگىلىپ, قىردىڭ توبەسى كورىندى. بىراق قىس اياقتالىپ, كۇن جىلىنسا بولدى, اسىرەسە, قالانىڭ شەتكى اۋداندارى مەن اۋىل-ايماق تۇرعىندارى قىزىل سۋدان قاۋىپتەنەتىنى جاسىرىن ەمەس. بۇل تۇرعىدا قالالىق اكىمدىكتە وتكەن اپپاراتتىق كەڭەستە اۋدان اكىمدەرى تاسقىن سۋعا قارسى قانداي شارالاردىڭ قابىلدانىپ جاتقانىن باياندادى.
سارىارقا اۋدانىنىڭ ورتالىق كوشەلەرىنىڭ جاياۋ جۇرگىنشى جولى قاردان تولىق تازارتىلعان. اتاپ ايتقاندا, سارىارقا, رەسپۋبليكا, اباي, جەڭىس داڭعىلدارى مەن كەنەسارى, مامبەتوۆ, وماروۆ, رىسقۇلوۆ, سەيفۋللين, بيگەلدينوۆ, بەيسەكوۆا, كوسشىعۇلۇلى, اقان سەرى كوشەلەرىنىڭ بويى, تەمىر جول ۆوكزالى مەن ساپارجايعا جاقىن ورنالاسقان كوشەلەر, «اگروقالاشىق», «كوكتال-1», «كوكتال-2» تۇرعىن الاپتارىنىڭ ورتالىق كوشەلەرى, تىلەنديەۆ داڭعىلىنىڭ سول جاعىنداعى قار قالا سىرتىنا شىعارىلىپتى. قىستىڭ سوڭعى كۇنى, 28 اقپاندا سەنبىلىك وتكىزىلىپ, 100 ستۋدەنت زەينەتكەرلەر مەن مۇمكىندىگى شەكتەۋلى جاندار, كوپبالالى وتباسىلار تۇراتىن اۋلالارداعى قاردى تازالاعان ەكەن.
ال الماتى اۋدانىنداعى 76 الەۋمەتتىك نىساننان قار شىعارۋ جۇمىستارى جۇرگىزىلىپ, بۇگىندە ولاردىڭ 65-دە جۇمىس اياقتالىپتى. قالعان 11 نىسانداعى جۇمىس 10 ناۋرىزعا دەيىن اياقتالاتىن كورىنەدى. قازىرگى ۋاقىتتا ۇزىندىعى 9 420 مەترلىك ارىق جەلىلەرىن قار مەن مۇز قۇرساۋىنان تازالاۋ جۇمىستارى جۇرگىزىلىپ جاتىر ەكەن. سۋ تاسقىنى بولعان جاعدايدا الماتى اۋدانى بويىنشا 45 سۋسورعىش كولىك جۇمىلدىرىلماق.
بايقوڭىر اۋدانىندا دا سۋ تاسقىنىنا قارسى جەدەل ءىس-شارالار جۇرگىزىلىپ جاتىر ەكەن. شۇعىل ارەكەت ەتۋ ماقساتىندا جەكە سەكتوردان قار شىعارىلىپ, ارىقتار مەن جاۋىن-شاشىن سۋىن قابىلدايتىن كارىز جۇيەسى تازالانىپ, 3000 تەكشە مەتر ۇگىندىتاس پەن 400 قاپ قۇم دايىندالىپتى. بۇگىنگە دەيىن قاردىڭ 90 720 تەكشە مەترى پوليگونعا شىعارىلعان. كوپبالالى جانە الەۋمەتتىك جاعىنان از قامتىلعان وتباسىلاردىڭ ۇيلەرىنەن قار شىعارۋ جۇمىسى قىزۋ ءجۇرىپ جاتقان كورىنەدى. بۇل ناۋقان 15 ناۋرىزعا دەيىن جالعاسپاق. سونىمەن قاتار سۋ تاسقىنىنا قارسى جەدەل ارەكەت ەتەتىن اۋداندىق كوميسسيا شتابى قۇرىلىپ, تابيعي اپات بولعان جاعدايدا ازاماتتاردىڭ قاۋىپسىزدىگى قالا جانە اۋدان باسشىلىعىنىڭ نازارىندا بولماق.
ەسىل اۋدانى بويىنشا سۋ باسۋ قاۋپى جوعارى 11 ورىن انىقتالعان ەكەن. ونىڭ قاتارىندا بىرقاتار تۇرعىن الابى دا بار. سۋ تاسقىنىن بولدىرماۋ ماقساتىندا 27 ارنايى تەحنيكا جۇمىلدىرىلىپ, مەكتەپتەر مەن بالاباقشالار اۋلالارىنان قار قالا سىرتىنا شىعارىلۋدا. قازىرگى ۋاقىتتا 26 بالاباقشانىڭ 20, 18 مەكتەپتىڭ 9-نىڭ اۋلاسى تولىق تازارتىلىپتى. سول سياقتى «م-1» جانە «م-2» كوپىرلەر اراسىندا ورنالاسقان نوسەرلى كارىزدەردى قاردان, مۇزدان, قوقىستان تازارتۋ جۇمىستارى دا اياقتالعان. بۇل باعىتتاعى جۇمىستار ءالى دە جالعاسپاق.
