«قازانات» اتشابارىندا «رۋحاني جاڭعىرۋ» باعدارلاماسى اياسىندا تەڭگە ىلۋدەن ءىى ازيا چەمپيوناتى مەن اۋدارىسپاقتان ءىىى ازيا چەمپيوناتى جالاۋىن كوتەردى. بايراقتى باسەكەنىڭ اشىلۋ سالتاناتىنا يۋنەسكو-نىڭ ءداستۇرلى سپورتتار مەن ويىندار كوميتەتىنىڭ ءتوراعاسى حاليل احمەد حان, ۇلتتىق سپورت ءتۇرلەرى قاۋىمداستىعىنىڭ پرەزيدەنتى بەكبولات تىلەۋحان, ەنەرگەتيكا ءمينيسترى قانات بوزىمباەۆ سەكىلدى بىرقاتار لاۋازىمدى تۇلعالار قاتىستى.
تەڭگە ىلۋگە قازاقستان, موڭعوليا, وزبەكستان, التاي رەسپۋبليكاسى, اۋعانستان, قىرعىزستان, قىتاي, تاجىكستان, تۇركيا, جيىنى 9 مەملەكەتتىڭ سپورتشىلارى قاتىسۋدا. ەلىمىزدىڭ نامىسىن بۇل سايىستا ءىى ازيا چەمپيوناتىنا ىرىكتەۋ جارىسىنا ۇزدىك تانىلعان سپورتشى, بىلتىر وسى سپورت تۇرىندە رەكوردتى جاڭارتقان ماعجان ساپاربەك پەن عالىمجان ءىزجانوۆ سىندى شىمىر جىگىتتەر قورعاپ جاتىر.
«تەڭگە ىلۋدەن وسى ازيا چەمپيوناتىندا رەكوردتىق كورسەتكىش جاڭارۋى مۇمكىن. بىرەرەر جىل بۇرىن ەڭ ۇزدىك كورسەتكىش 14 سەكۋند بولاتىن. مۇنى ءالىحان باشىمباەۆ جاسادى. ودان سوڭ 13 سەكۋند بولدى. بۇل ۇزدىك تەڭگە ءىلۋشىمىز عالىمجان ءىزجانوۆتىڭ رەكوردى ەدى. وتكەن جىلى تەڭگە ءىلۋ سپورتىندا الدىنا قارا سالماي تۇرعان جاس سپورتشىمىز ماعجان ساپاربەك قىزىلوردا وبلىسىندا وتكەن ۇلتتىق سپورت فەستيۆالىندە رەكوردتىق كورسەتكىشتى 11 سەكۋندقا ءتۇسىردى. ەندى مىنا ازيا چەمپيوناتىنا قاتىساتىن 9 مەملەكەت سپورتشىلارى اراسىندا مىقتى دايىندىقپەن كەلە جاتقان سپورتشىلار از ەمەس. سوندىقتان, وسى جولى دا جاڭا رەكوردتىق كورسەتكىشتەرگە كۋا بولۋىمىز ىقتيمال» دەدى تەڭگە ىلۋدەن ۇلتتىق قۇرامانىڭ اعا جاتتىقتىرۋشىسى نۇركەن بايبوريەۆ.
