استانادا ەل تاۋەلسىزدىگىنىڭ 25 جىلدىعىنا ارنالعان كيوكۋشينكاي-كان كاراتەدەن بالالار, ءجاسوسپىرىمدەر, قىزدار, يۋنيورلار, ەرلەر جانە ايەلدەر اراسىندا «Kazakhstan Open» ءتۋرنيرى ءوتتى. «داۋلەت» سپورت كەشەنىندە ۇيىمداستىرىلعان حالىقارالىق سايىسقا رەسپۋبليكانىڭ بارلىق وڭىرلەرىنەن جانە رەسەي, بەلارۋس, قىرعىزستان ەلدەرىنەن 500-گە جۋىق كاراتەشىلەر قاتىستى.
ءتۋرنيردىڭ اشىلۋ سالتاناتىندا ءسوز سويلەگەن مادەنيەت جانە سپورت ءمينيسترى ارىستانبەك مۇحامەديۇلى كوپشىلىكتى كاراتەنىڭ 2020 جىلى وتەتىن جازعى وليمپيادا ويىندارىنىڭ باعدارلاماسىنا ەنۋىمەن قۇتتىقتادى. ول بۇل تاريحي ۋاقيعانىڭ كاراتەنىڭ ءتۇپ-توركىنى جاپونيادان باستالاتىنىندا ۇلكەن ءمان جاتقانىن ايتتى. سونداق-اق, بۇل سپورتتىڭ ەلىمىزدە جاقسى دامىپ كەلە جاتقانىن, سوندىقتان الداعى دۇنيەجۇزىلىك ءدۇبىرلى دودادا وتاندىق سپورتشىلاردان كوپ ءۇمىت كۇتەتىنىن اتاپ ءوتتى.
سونىمەن قاتار, رەسپۋبليكالىق كيوكۋشينكاي-كان كاراتە فەدەراتسياسىنىڭ پرەزيدەنتى, قر پارلامەنت ءماجىلىسىنىڭ دەپۋتاتى ومارحان وكسىكباەۆ پەن سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ ءسوز الىپ, قاتىسۋشىلارعا ساتتىلىك تىلەدى.
وسى تۋرنير بارىسىندا ۇزدىك كاراتەشىلەر ماراپاتتالىپ, ولارعا كۋبوك, مەدال, ديپلوم تابىستالدى. بيىل وڭىرلىك جانە حالىقارالىق بىرىنشىلىكتەردە ۇلتتىق قۇراما مەدالدار سانى جاعىنان رەكوردتىق كورسەتكىشكە جەتكەن. ونىڭ ىشىندە ازيانىڭ ءابسوليۋتتى چەمپيوندارى بولعان نيكيتا گاراس پەن الەمگۇل سابىرحاننىڭ ۇلەسىن ەرەكشە اتاۋعا بولادى.
ورىنبەك وتەمۇرات
