استانادا تاۋەلسىزدىكتىڭ 25 جىلدىعىنا ارنالعان بليتس بويىنشا شاحمات ءتۋرنيرى ءوتتى. بالالار مەن جاسوسپىرىمدەر اراسىندا وتكەن دودانىڭ سالتاناتتى اشىلۋىنا استانا قالاسىنىڭ اكىمى اسەت يسەكەشەۆ, حالىقارالىق شاحمات فەدەراتسياسىنىڭ پرەزيدەنتى كيرسان يليۋمجينوۆ جانە شاحماتتان الەم چەمپيونى, حالىقارالىق دارەجەدەگى گروسسمەيستەر اناتولي كارپوۆ قاتىستى.
اشىلۋ سالتاناتىندا ءسوز العان قالا باسشىسى اسەت يسەكەشەۆ الىستان ات ارىلتىپ كەلگەن قۇرمەتتى قوناقتارعا ريزاشىلىعىن ءبىلدىرىپ, مەرەيلى كۇننىڭ قارساڭىندا ۇيىمداستىرىلعان بۇل دودانىڭ ماڭىزدى ەكەنىن اتاپ ءوتتى.
– تاۋەلسىزدىكتىڭ تويى كەزىندە ءتۇرلى يگى ءىس-شارالار وتكىزىلىپ جاتىر. سونىڭ ىشىندە بۇگىنگى شاحمات ءتۋرنيرىن دە اتاۋعا بولادى. وسىنداي كۇنى اناتولي كارپوۆ سەكىلدى ايگىلى گروسسمەيستەردىڭ ورتامىزدان تابىلۋى جاس شاحماتشىلاردى جىگەرلەندىرىپ, جەڭىسكە تالپىندىرادى. ارامىزدا دارمەن سادۋاقاسوۆ, دينارا سادۋاقاسوۆا سياقتى دارىندى استانالىق شاحماتشىلار وتىر. جاقىندا دينارانىڭ ەلوردادا شەبەرلىك مەكتەبى اشىلدى, – دەدى استانا اكىمى.
اناتولي كارپوۆ جينالعان جۇرتتى قازاقستان تاۋەلسىزدىگىنىڭ 25 جىلدىعىمەن قۇتتىقتاپ, وسى ۋاقىت ارالىعىندا بۇل ەلدە شاحماتتىڭ جاقسى دامىعانىن, تالاي گروسسمەيستەرلەر تاربيەلەنگەنىن, مىقتى مەكتەپتەر قالىپتاسقانىن ايتىپ, استانانىڭ ەلوردا بولىپ, العاش ىرگەتاسى قالانعان ساتتەرىن ەسىنە الدى.
اتالمىش وي جارىسىنا 90-عا جۋىق بالا قاتىسۋعا نيەت ءبىلدىردى. ولار جالپى 6 سانات بويىنشا سىنعا تۇسەدى. دۋماندى دودا رەتىندە ءوتىپ جاتقان شارانىڭ جەڭىمپازدارىنا تەلەديدار, Apple سمارتفوندارى مەن سمارتساعاتتارى سياقتى سىيلىقتار تابىستالادى.
ورىنبەك وتەمۇرات
