تازالىق شاراسى باستالادى
«استانا – تازا جانە قاۋىپسىز قالا» اكتسياسىنىڭ اياسىندا قالانى سانيتارلىق تازالاۋ, اباتتاندىرۋ جانە كوگالداندىرۋ شارالارىنا قاتىستى قالا اكىمىنىڭ ورىنباسارى ارمان تۇرلىبەك بىرقاتار جۇمىس جوسپارىن ۇسىندى.
جوسپار بويىنشا الداعى ەكى ايدا ەكولوگيالىق ناۋقانداردى وتكىزۋ ۇسىنىلدى. «26 ناۋرىز بەن 26 مامىر ارالىعىندا قالانى سانيتارلىق تازالاۋ, اباتتاندىرۋ جانە كوگالداندىرۋ بويىنشا «استانا – تازا جانە قاۋىپسىز قالا» جالپى قالالىق اكتسياسىن جاريالاۋدى, ەكولوگيالىق شارا اياسىندا 20 ءساۋىر مەن 11 مامىر ارالىعىندا جالپى قالالىق سەنبىلىكتەردى وتكىزۋدى ۇسىنامىن» دەدى ارمان تۇرلىبەك. اكتسيا اياسىندا اۋدان اكىمدەرى قوقىستى تازالاۋ, گۇلزارلار مەن كوگالداردى رەتكە كەلتىرۋ, شاعىن ساۋلەت فورمالارى مەن قورشاۋلاردى جوندەۋ جانە سىرلاۋ, اۋداندار اۋماقتارىن كوگالداندىرۋ جۇمىستارىن ءجۇرگىزۋى ءتيىس. سونداي-اق ول قالا تۇرعىندارىنىڭ بارلىق اۋلالار مەن الاڭداردى تازارتۋ جۇمىستارىنا تارتۋ قاجەتتىگى ايتىلدى. ەكولوگيالىق ناۋقان اياسىندا جولداردى جوندەۋ, جول بەلگىلەرىن جاڭارتۋ, جاياۋ ءجۇرگىنشىلەرگە ارنالعان جولدار مەن جەراستى وتكەلدەرىن جۋ شارالارى جۇرگىزىلەدى دەپ جوسپارلانۋدا. شاعىن جانە ورتا بيزنەس يەلەرى دە اباتتاندىرۋ شارالارىنا اتسالىسادى.