استاناداعى ۇلتتىق اكادەميالىق كىتاپحانادا بەلگىلى تەاتر جانە كينو رەجيسسەرى, قازاقستاننىڭ حالىق ءارتىسى تالعات تەمەنوۆتىڭ فوتوالبومى تانىستىرىلدى.
اتالمىش كىتاپ «ونەر» باسپاسىنان «قازاق ونەرىنىڭ قايراتكەرلەرى» ايدارىمەن جارىق كوردى. فوتوالبومدا كورنەكتى تۇلعانىڭ ءومىر بەلەستەرى قامتىلدى. اتاپ ايتقاندا, «بالداۋرەن – بالالىق كۇندەر», «تەاتر – مەنىڭ ءومىرىم», «كينوعۇمىر», «عاسىر ءوتىپ بارادى», «كەڭ دۇنيە, ەسىگىڭدى اش, مەن كەلەمىن…» جانە «وتباسىم – التىن بۇلاعىم» اتتى بولىمدەرىندە سايراپ تۇر.
وندا «ماحاببات بەكەتى», «ادامدار اراسىنداعى بولتىرىك», قىزعىش قۇس» سەكىلدى كينوتۋىندىلاردىڭ, «تىراۋلاپ ۇشقان تىرنالار» سىندى سپەكتاكلدەردىڭ فوتوسۋرەتتەرى دە ەنگىزىلگەن.
«سپەكتاكلدەر كۇندەردىڭ-كۇنىندە ساحنادان تۇسەدى. كينولار دا ۇمىتىلادى. ال بۇل كىتاپ حالىقتىڭ جادىندا قالادى. اسىرەسە, كينودا, سپەكتاكلدە ويناعان اكتەرلەردى ەسكە تۇسىرەدى. بۇل مەنىڭ شىعارماشىلىعىمنىڭ عۇمىرناماسى, تاريحى, باسقاشا ايتقاندا, مەنىڭ ءومىرىم. تىلىمىزدە «سۋرەتتەر سويلەيدى» دەگەن تىركەس بار, فوتوالبوم ناقتى سونىڭ ايعاعى» دەيدى رەجيسسەر كىتاپتى شىعارۋداعى ماقساتى جونىندە.
