ماسكەۋ قالاسىندا 29 قاراشا-6 جەلتوقسان كۇندەرى «زولوتوي ۆيتياز» اتتى XIII حالىقارالىق تەاتر فورۋمى وتەدى. وعان استانا قالاسى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ۆ.ەجوۆتىڭ «تىراۋلاپ ۇشقان تىرنالار» اتتى ليريكالىق دراماسىمەن قاتىسادى. قويىلىم رەجيسسەرى – قازاقستاننىڭ حالىق ءارتىسى, پروفەسسور تالعات تەمەنوۆ. قازاق تىلىنە اۋدارعان – بەلگىلى تەاتر سىنشىسى, مەملەكەتتىك سىيلىقتىڭ يەگەرى, پروفەسسور اشىربەك سىعاي.
بيىل ۇلى جەڭىستىڭ 70 جىلدىعىنا وراي ساحنالانعان ليريكالىق درامادا قازاق سولداتى پەرنەبەك بورانباەۆ پەن نەمىس قىزى ينگانىڭ اراسىنداعى ماحاببات حيكاياسى جونىندە باياندالادى. باستى رولدەردى تەاتردىڭ جاس اكتەرى ءابىلمانسۇر سەرىكوۆ پەن جاس اكتريساسى اقمارال تاناباەۆا سومدايدى. سونداي-اق, كورەرمەن قازاقستاننىڭ حالىق ءارتىسى تىلەكتەس مەيراموۆتى, قازاقستاننىڭ ەڭبەك سىڭىرگەن قايراتكەرلەرى اقىش وماردى, نۇركەن وتەۋىلوۆتى, قر «دارىن» جاستار سىيلىعىنىڭ يەگەرى سىرىم قاشقاباەۆ پەن دارىندى اكتەر قۋاندىق قىستىقباەۆتى كورە الادى.
تەاتر فورۋمىنا رەسەي, قازاقستان, بولگاريا, گرۋزيا مەملەكەتتەرىنەن 24 تەاتر ۇجىمى قاتىسادى. قاللەكي تەاترى ماسكەۋدىڭ رەسەي ارمياسىنىڭ اكادەميالىق تەاترى ساحناسىندا ونەر كورسەتەدى. «تىراۋلاپ ۇشقان تىرنالار» قويىلىمىن بيىل استانادا قوناقتا بولعان رەسەيلىك تەاتر ماماندارى كونستانتين ششەرباكوۆ پەن ولەگ پيۆوۆاروۆ تاماشالاپ, درامانىڭ قويىلۋىنا, اكتەرلەردىڭ ويىنىنا جوعارى باعا بەرگەنىن ايتا كەتۋ كەرەك.
امانعالي قالجانوۆ
