تەرەڭنەن تارتادى
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «كاۋسار» مادەنيتانىمدىق بىرلەستىگىنىڭ ۇيىمداستىرۋىمەن قر ەڭبەك سىڭىرگەن قايراتكەرى, حالىقارالىق «الاش» سىيلىعىنىڭ لاۋرەاتى, اقىن نازىكەن الپامىسقىزىمەن «سىرلى ءسوز» اتتى ادەبي كەزدەسۋ كەشى ءوتتى.
ادەبي شارانى كومەيىنە بۇلبۇل قونعان دارىندى ءانشى كەنجەعالي مىرجىقباي اسەرلى جۇرگىزىپ وتىردى. بۇعان دەيىن دە بۇل شاڭىراقتا تالانتتى تۇلعا حالقىمىزدىڭ اردا ازاماتتارىمەن كەزدەسۋ وتكىزىپ, ەمەن-جارقىن اڭگىمە وربىتكەن ەدى. اقىن اپامىزبەن وتكەن كەش تە سولاردىڭ جۇعىمدى جالعاسى بولدى.
ەل اراسىندا باتىرلار مەن اقىندار مەكەنى اتانعان الماتى وبلىسىنىڭ جامبىل اۋدانىندا ومىرگە كەلگەن نازىكەن الپامىسقىزى جاستايىنان ولەڭگە عاشىق بولىپ وسەدى. ورتا مەكتەپتى التىن مەدالمەن اياقتاپ, قازاق مەملەكەتتىك ۋنيۆەرسيتەتىن قىزىل ديپلوممەن بىتىرەدى. ودان شىعانداپ, ماسكەۋدەگى م.لومونوسوۆ اتىنداعى مەملەكەتتىك ۋنيۆەرسيتەتىنىڭ ەكونوميكا
فاكۋلتەتىنىڭ اسپيرانتۋراسىن ۇزدىك تامامدايدى. ومىردە باسقا سالانىڭ قۇرىعىن ۇستاسا دا, پوەزيانى ەشقاشان جانىنان قالدىرماعان. بارلىق سىرىن سوعان توگىپ وتىرعان. سودان با, اقىن ولەڭدەرىنەن نازىك مۇڭ مەن ساعىنىش توعىز تاسپالى قامشىداي ءورىلىپ وتىرادى.
– العاشقى توپتاماسىمەن-اق پوەزيا الەمىنە ۇلكەن دايىندىقپەن, ەڭ باستىسى, زور ماحابباتپەن كەلگەن نازىكەن اقىن سودان بەرى ءوسۋ, ورلەۋ ۇستىندە. ونىڭ تاقىرىپ اياسى دا بارىنشا كەڭ. بىردە تۇمار حانىمعا اينالىپ ەل نامىسىن جىرتسا, ەندى بىردە ءلۇپ-ءلۇپ سوققان جۇرەگىن الاقانىڭىزعا سالىپ بەرەدى. ەڭ باستىسى, ول نەنى جىرلاسا دا, ويدى جاداعاي ايتا سالمايدى, اركىم ءوز زەردەسىنەن وتكىزەتىندەي تەرەڭنەن تارتادى. جان سارايىنىڭ ەسىگىن الدىڭنان ايقارا اشادى. وندايدا ءسىز دە بار ىقىلاسىڭىزبەن اقىننىڭ شۋاقتى ساتتەرىنە ورتاقتاسىپ, كوڭىلى جابىرقاۋ تارتسا, بىرگە مۇڭداناسىز, – دەدى شارا بارىسىندا ءسوز العان جازۋشى جۇماگۇل سولتى.
بەلگىلى عالىم سەرىك نەگيموۆ اقىننىڭ جىرلارىنان مىسال كەلتىرىپ, دالەلمەن سويلەدى. نازىكەن اپانىڭ ءشاكىرتى, پروفەسسور سەرىك ماقىش ۇستازىنا اقجارما تىلەگىن ايتتى.
كەنجەعالي مىرجىقباي اقىننىڭ «اسەتكە» دەگەن ولەڭىن جاتقا وقىپ, ايگىلى اسەتتىڭ اندەرىن توگىلدىرىپ ورىن-
دادى. ءمۇسىلىم بازارباەۆ, حاميت ەرعاليەۆ جانە قادىر مىرزا ءالى سەكىلدى اۋزى دۋالى تۇلعالاردىڭ اقىن تۋرالى ايتقان پىكىرلەرىن جۇرتشىلىققا وقىپ بەردى.
نازىكەن الپامىسقىزىنىڭ ءوزى دە جينالعاندارعا سىرلى, مۇڭلى جىرلارىن وقىدى. جاستاردىڭ قويعان سۇراقتارىنا جاۋاپ بەردى. «بۇل كۇن مەنىڭ ومىرىمدە ەشقاشان ۇمىتىلمايدى. تاماشا جۇزدەسۋ بولدى. ءاردايىم جۇرتپەن, جاستارمەن كەزدەسكەندى اڭساپ جۇرەمىن. وسىنداي پاراساتتى كەش ۇيىمداستىرعان ازاماتتارعا العىسىمدى
بىلدىرەمىن» دەدى اقىن.
شارا سوڭىندا ۋنيۆەرسيتەت پرورەكتورى ديحان قامزابەكۇلى كەش يەسىنە ريزاشىلىعىن ءبىلدىرىپ, ونى «كۇلتەگىن» مەدالىمەن ماراپاتتادى.
ازامات ەسەنجول