ەلوردادا كوپبالالى انالارعا ارنالعان قولدانبالى ونەر مەن قولونەر شەبەرلىگىن تەگىن وقىتۋ سەمينارىنا قاتىسۋشىلاردى ماراپاتتاۋ ءراسىمى ءوتتى. شارا بارىسىندا نۇر-سۇلتان قالاسى اكىمىنىڭ ورىنباسارى ەرلان كاناليموۆ انالارعا 50 تىگىن ماشيناسىن تاپسىردى.
اتالمىش سەميناردى تانىمال ەتنوديزاينەر ىرزا تۇرسىنزادا باستاعان وسى سالانىڭ كاسىبي ماماندارى جۇرگىزدى.
– «اسىل انا» جوباسى بىرنەشە كەزەڭنەن تۇرادى. ونىڭ ارقايسىسى انالاردىڭ الەۋەتىن جان-جاقتى اشۋعا باعىتتالدى. سەمينار كەزىندە كوپبالالى انالار ارنايى تاپسىرمالاردى ورىنداپ, بوس ورىندار جارمەڭكەسىنە قاتىستى. قالا كۇنى مەرەكەسى قارساڭىندا «اسىل انا» بايقاۋى وتەدى. وعان شەبەرلىك ساباعىنان وتكەن كوپبالالى انالار قاتىسادى. ولار قاجەتتى ماتەريالدارمەن, تىگىن ماشينالارىمەن قامتاماسىز ەتىلەتىن بولادى. بايقاۋعا انالار ءوز قولدارىمەن جاسالعان بۇيىمدارىن ۇسىنىپ, بۇل بۇيىمداردىڭ بارلىعى ارنايى ۇلكەن كورمەگە قويىلادى. جەڭىمپازدار ديپلومدارمەن جانە جوبانى قولداعان مەتسەناتتار, دەمەۋشىلەر تاعايىنداعان باعالى سىيلىقتارمەن ماراپاتتالادى, – دەدى ە.كاناليموۆ.
ونىڭ ايتۋىنشا, جوبانىڭ سوڭعى كەزەڭىندە «اسىل انا» كوپبالالى انالاردى قولداۋ ورتالىعىن قۇرۋ جوسپارلانىپ وتىر. وندا انالارعا قۇقىقتىق, پسيحولوگيالىق, كاسىبي كەڭەستەر بەرىلەدى. ورتالىقتىڭ تاعى ءبىر ەرەكشە قىزمەتى انالارعا جۇمىسقا تۇرۋعا كومەكتەسەدى. بۇعان قوسا, انالاردىڭ بالا كۇتۋىنە ىڭعايلى بولۋى ءۇشىن شاعىن بالاباقشا ۇيىمداستىرىلاتىن بولادى.
