ەلباسى ءوزىنىڭ «بولاشاققا باعدار: رۋحاني جاڭعىرۋ» اتتى ماقالاسىندا «بولاشاقتا ۇلتتىڭ تابىستى بولۋى ونىڭ تابيعي بايلىعىمەن ەمەس, ادامدارىنىڭ باسەكەلىك قابىلەتىمەن ايقىندالادى» دەي كەلە, ءاربىر قازاقستاندىقتىڭ بويىندا بولۋى كەرەك قاسيەتتەردىڭ قاتارىنا كوپتىلدىلىكتى كىرگىزدى.
تانىمال عۇلاما, ءابۋ-ناسىر ءال-فارابي ومىرىندە 76 ۇلتتىڭ ءتىلىن بىلگەن. ۇلى اباي ورىس-قازاق تىلدەرىمەن قاتار پارسى, اراب تىلدەرىن دە مەڭگەرگەن. بۇگىندە ولاردىڭ ۇرپاعى, ياعني, زاماناۋي قازاقستاندىقتار دا كەمىندە ءۇش تىلدە ەركىن سويلەپ, جازا الادى.
كوپ تىلدىلىك ناتيجەسىندە ناقتى قانداي ارتىقشىلىقتارعا يە بولامىز؟ ەڭ اۋەلى, باسەكەگە قابىلەتتىلىككە قول جەتكىزەمىز. وزگە ەلدىڭ ءتىلىن ۇيرەنۋ ارقىلى ءار ادام كەز كەلگەن شەتەلدىك ورتانى جاتىرقاماي, جالپى اقپاراتتىق قوعامعا وڭاي بەيىمدەلەدى. اعىلشىن جانە ورىس تىلدەرىن ۇيرەنۋ باسقا ەلدە تاجىريبە الماسۋعا, تانىمدىق كوزقاراستى قالىپتاستىرۋعا, باسقا ۇلت وكىلدەرىمەن قارىم-قاتىناس ورناتۋعا مۇمكىندىك تۋعىزادى. ەكىنشىدەن, مەكتەپتە وقۋ پاندەرىن ەكى نەمەسە ودان دا كوپ تىلدەردە اۋدارماسىز وقىتۋعا قول جەتكىزەمىز. ۇشىنشىدەن, ەڭبەك نارىعىندا جوعارى سۇرانىسقا يە بولامىز.
ەلىمىزدە كوپتىلدىلىكتى, ونىڭ ىشىندە ۇشتىلدىلىك ساياساتىن قولداۋعا ارنالعان كوپتەگەن باستاما بوي كوتەرۋدە. ماسەلەن, سولاردىڭ ءبىرى رەتىندە بىلتىرعى English For Jastar جوباسىن ايتۋعا بولادى. ەكى ايعا سوزىلعان بۇل جوبانىڭ ماقساتى قازاقستانداعى 84 اۋىلدىق ايماقتاعى 7 مىڭداي وقۋشىعا اعىلشىن ءتىلىن ۇيرەتۋ ەدى. جوباعا ەرىكتى رەتىندە حالىقارالىق «بولاشاق» باعدارلاماسى بويىنشا شەتەلدە ءبىلىم الىپ كەلگەن جاستار, اعىلشىن ءتىلىن جوعارى دەڭگەيدە بىلەتىن ازاماتتار جانە اعىلشىن ءتىلى ءپانىنىڭ مۇعالىمدەرى قاتىسىپ, شاكىرتتەرگە تەگىن ءبىلىم بەردى.
سونداي-اق «بولاشاق» كورپوراتيۆتى قورىنىڭ قولداۋىمەن Social Lift پلاتفورماسىندا جۇزەگە اسقان Open English جوباسى دا ءوزىنىڭ تيىمدىلىگىن دالەلدەگەن باستامالاردىڭ ءبىرى بولدى. جوبانىڭ ساراپتامالىق توبى كەمبريدجدىك كەت جانە رەت ەمتيحاندارى نەگىزىندە وقۋشىلارعا ارنالعان 3-مودۋلدىك وقۋ باعدارلاماسىن جانە وقىتۋدىڭ ءتيىمدى ادىستەرى مەن كوۋچينگ تاسىلدەرىنەن تۇراتىن اعىلشىن ءتىلى وقىتۋشى-ۆولونتەرلەردى دايارلاۋدىڭ قارقىندى كۋرستارىن ازىرلەدى. جوبا كومانداسىنا وقىتۋشى-ۆولونتەرلەر مەن جاتتىقتىرۋشىلار رەتىندە نازارباەۆ زياتكەرلىك مەكتەپتەرى مەن نازارباەۆ ۋنيۆەرسيتەتىنىڭ, ەلوردالىق جوعارى وقۋ ورىندارىنىڭ شەت تىلدەر كافەدرالارى ستۋدەنتتەرى مەن تۇلەكتەرى, اعىلشىن ءپانىنىڭ وقىتۋشىلارى كىردى.
وسى سەكىلدى يگىلىكتى باستامالار الداعى ۋاقىتتا دا ءوز جالعاسىن تاپسا, نۇر ۇستىنە نۇر بولار ەدى.
نايما نۇرالىقىزى,
قارجى اكادەمياسىنىڭ ستۋدەنتى
