«استانا» كونتسەرت زالىندا «رۋحاني جاڭعىرۋ» باعدارلاماسى جانە استانانىڭ 20 جىلدىعى اياسىندا قازاقستان حالقى تىلدەرى كۇنىنە ارنالعان «مەنىڭ ءتىلىم – ۇلى دالا رۋحى» اتتى حح قالالىق ءتىل فەستيۆالى ءوتتى. شارا بارىسىندا مەملەكەتتىك ءتىلدى دامىتۋعا ۇلەس قوسىپ جۇرگەن بىرنەشە مەكەمەگە استانا اكىمدىگىنىڭ «TIL TUGYRY – 2018» ماراپاتى تاپسىرىلدى.
– قازىر استانادا ءبىر ميلليوننان استام حالىق تۇرادى. ونىڭ 80-نەن استام پايىزى مەملەكەتتىك تىلدە سويلەپ, جازادى. تاۋەلسىزدىگىمىزدىڭ ارقاسىندا وسىعان جەتىپ وتىرمىز. ەلوردادا قانشاما ۇلت بار. انگليا, اقش-تىڭ ءتىلى اعىلشىن بولسا, ءبىزدىڭ ورتاق ءتىلىمىز – مەملەكەتتىك ءتىل – قازاق ءتىلى, – دەدى فەستيۆالدى ۇيىمداستىرۋشى تاراپىنان قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى تىلەۋعالي قىشقاشباەۆ.
اتالمىش باسقارمانىڭ مالىمەتىنشە, وسى جىلى سالالىق مەكەمە قىزمەتكەرلەرى مەن قالا تۇرعىندارىنا, جيىنى 1500 ادامعا مەملەكەتتىك ءتىلدى وقىتۋدىڭ تەگىن كۋرستارى جۇرگىزىلىپ جاتىر. بيىل 100-دەن استام مەملەكەتتىك قىزمەتكەر اعىلشىن ءتىلى كۋرستارىنان ءوتتى. بۇگىندەرى استانادا 1054 كوشەگە اتاۋلار بەرىلدى. جالپى 1997 جىلدان 853 كوشەنىڭ اتاۋى اۋىستىرىلدى.
ۇستىمىزدەگى جىلى باسقارما جانىنان قۇرىلعان ەرىكتىلەر توبى «تىلگە قولداۋ» جۇمىس توبىمەن بىرلەسىپ, «ساۋاتتى جارناما – قالا كوركى» اكتسياسى شەڭبەرىڭدە 14 داڭعىلعا, 85 كوشەگە رەيد جۇرگىزدى. قورىتىندىسىندا زاڭعا سايكەس كەلمەيتىن 300-دەن استام جارناما الىنىپ تاستالىپ, تۇزەتىلمەگەن 60-تان اسا سىرتقى جارناما بويىنشا ءتيىستى ورىندارعا حات جولداندى. جالپى 2018 جىلى 2 مىڭنان استام جوبا ەسكيزدەرى ساراپتامادان ءوتىپ, ونىڭ 800-گە جۋىعى تۇزەتىلدى.
الەۋمەتتىك زەرتتەۋ وسى جىلى استانادا مەملەكەتتىك ءتىلدى مەڭگەرگەن حالىقتىڭ ۇلەسى 89 پايىزعا جەتكەنىن كورسەتتى. قازاق ءتىلىن مەڭگەرگەن وزگە ەتنوستاردىڭ ۇلەسى 27 پايىزدى قۇرادى. جاۋاپ بەرۋشىلەردىڭ 95 پايىزى ءوزارا قاتىناس ءتىلى رەتىندە قازاق ءتىلىن تاڭدادى.
«TIL TUGYRY – 2018» ماراپاتىمەن رەسپۋبليكالىق «قازبىلىم» ورتالىعى, ۇلى وتان سوعىسى مۇگەدەكتەرىنىڭ ورتالىق-كلينيكالىق گوسپيتالى, استانانىڭ ستاتيستيكا دەپارتامەنتى, «Qazaq Gourmet» مەيرامحاناسى, ۇلتتىق قاۋىپسىزدىك كوميتەتىنىڭ شەكارا قىزمەتى, «باقوردا» مەديا توبى, كولىك جانە كوممۋنيكاتسيا كوللەدجى ماراپاتتالدى.
سالتاناتتى شارادا تورەعالي تورەالى, اسەم ومار, نينا مويسەەۆا, تاتيانا كيم سىندى انشىلەر, «الاشۇلى» توبى, «سارىارقا» حالىق مۋزىكا ءانسامبلى, «شالقىما» حالىق بي ءانسامبلى جينالعان قاۋىمنىڭ كوڭىلىن كوتەردى.
