«ءتىل تازالىعى – بارشاعا ورتاق ءىس» اتتى جوبا اياسىندا ەلوردالىق تىلدەردى دامىتۋ جانە ارحيۆ ءىسى باسقارماسى مەن استانا قالالىق كاسىپكەرلەر پالاتاسىنىڭ باسشىلارى ىنتىماقتاستىق تۋرالى مەموراندۋمعا قول قويدى.
بۇل قۇجات شەڭبەرىندە مەملەكەتتىك ءتىل ساياساتىن كاسىپكەرلەر اراسىندا ناسيحاتتاۋ, زاڭ تالاپتارىن ءتۇسىندىرۋ, ادىستەمەلىك كومەك كورسەتۋ سەكىلدى ءىس-شارالار كوزدەلگەن.
– قازىرگى كۇندە ەلوردادا ءجۇز مىڭعا جۋىق شاعىن جانە ورتا بيزنەس نىساندارى بار. وكىنىشكە قاراي, وسى نىسانداردا قازاق تىلىندە جازىلعان اقپاراتتىق ماتەريالداردىڭ نۇسقالارىندا قاتە كوپ كەزدەسەدى. شىن مانىندە, زاڭ نەگىزىندە, قالالىق ءماسليحاتتىڭ شەشىمى بويىنشا كاسىپكەرلەردىڭ اقپاراتتىق ماتەريالدارىنىڭ ءماتىنى ءبىزدىڭ باسقارمانىڭ كەلىسىمىمەن جازىلۋ كەرەك. بىراق بۇل تالاپ ورىندالا بەرمەيدى. سودان كاسىپكەرلەر ءماتىندى قاتە جازىپ, كەيىن ونى تۇزەپ, ەكى شىعىنعا باتادى. سوندىقتان بۇل جاعداي قايتالانباۋ ءۇشىن وسى ءىس-شارانى قولعا الىپ وتىرمىز, – دەپ اتاپ ءوتتى قابىلدانعان قۇجاتتىڭ ماڭىزدىلىعىنا توقتالعان تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ساكەن ەسىركەپ.
