29 قىركۇيەكتە استانا قالاسى ءماسليحاتىنىڭ كەزەكتى سەسسياسى وتەدى. وندا نەگىزگى ماسەلە رەتىندە ەلوردادا توتەنشە جاعدايلاردىڭ الدىن الۋ جانە ولاردى جويۋ جونىندەگى جۇيەلى شارالاردى قولدانۋ ماسەلەلەرى قارالادى. سەسسيانىڭ الدىندا دەپۋتاتتار قالالىق توتەنشە جاعدايلار دەپارتامەنتى نىساندارىندا كوشپەلى وتىرىس وتكىزدى.
ءماسليحات توراعاسى ەرلان كاناليموۆ باستاعان دەپۋتاتتار جەدەل-قۇتقارۋ جاساعى بازاسىنىڭ قۇرىلىس الاڭىنا باردى. نىساندى سالۋ 2019 جىلى باستالىپ, ءبىراز ۋاقىتتان كەيىن قارجىلاندىرۋدىڭ بولماۋىنان قۇرىلىسى توقتاپ قالدى. قۇتقارۋشىلاردىڭ ايتۋىنشا, نىسان قالاعا اسا قاجەت. مۇنداي بولىمشە تۇران داڭعىلىندا ورنالاسقان. بىراق ارنايى تەحنيكاعا ارنالعان جىلى بوكستار جوق.
جوبا بويىنشا اكىمشىلىك عيماراتتى, وقشاۋلانعان گاراجداردى, قويمالاردى, قىزمەتتىك يتتەرگە ارنالعان تالىمباقتاردى, ىزدەستىرۋ يتتەرىن دايارلاۋعا جانە ۇيرەتۋگە ارنالعان الاڭداردى, وقۋ-جاتتىعۋ پوليگونى جانە قالاعا باقىلاۋ-وتكىزۋ بەكەتىن سالۋ كوزدەلگەن. ەرلان كاناليموۆتىڭ ايتۋىنشا, ءماسليحاتتىڭ قولداۋىمەن كينولوگيالىق ورتالىقتى اشۋ ماسەلەسى شەشىلدى, ال قۇرىلىسى توقتاپ قالعان جەدەل-قۇتقارۋ ستانساسىنىڭ باسقا عيماراتتارىنا قاتىستى جوبالاۋ-سمەتالىق قۇجاتتاماسىنا بيىل تۇزەتۋ ەنگىزۋ جوسپارلانعان.
دەپۋتاتتار جوندەۋدى قاجەت ەتەتىن ەكى ءورت ءسوندىرۋ بەكەتىنە دە باردى. بۇل نىساندار وتكەن عاسىردىڭ 80-جىلدارى سالىنعان. كوشپەلى وتىرىستا نىساندار جاعدايىمەن قاتار قالالىق توتەنشە جاعدايلار دەپارتامەنتى قىزمەتكەرلەرىن باسپانامەن قامتاماسىز ەتۋ, بالالارىن بالاباقشاعا ورنالاستىرۋ, جالاقىلارىن كوتەرۋ سىندى وزەكتى ماسەلەلەر تالقىلاندى. بۇل ماسەلەلەر قالالىق ءماسليحاتتىڭ الداعى كەزەكتى سەسسياسىندا قارالادى.
كوشپەلى وتىرىستىڭ قورىتىندىسى رەتىندە قالالىق ءماسليحات دەپۋتاتتارىنا «جەتى بوشكە» تۇرعىن ءۇي كەشەنى ماڭايىندا وتكىزىلگەن ءورت-تاكتيكالىق وقۋ-جاتتىعۋلارى كورسەتىلدى. قۇتقارۋشىلاردىڭ ايتۋىنشا, بۇل تۇرعىن ءۇي كەشەنىندە ءورت ءجيى بولادى. سوندىقتان وقۋ-جاتتىعۋلارى حالىق اراسىندا قاۋىپسىزدىك مادەنيەتىن قالىپتاستىرۋعا جانە نىعايتۋعا, توتەنشە جاعدايلار تۋىنداعان كەزدەگى ءىس-ارەكەتتەر تۋرالى تۇرعىنداردىڭ ساۋاتىن ارتتىرۋعا, قۇتقارۋشىلاردىڭ ءورت سوندىرۋدەگى ءىس-قيمىلدارىن جانە قالانىڭ تىرشىلىكتى قامتاماسىز ەتۋ قىزمەتتەرىمەن ءوزارا بايلانىسىن پىسىقتاۋىنا باعىتتالعان.
جاتتىعۋلارعا دەپارتامەنتتىڭ بولىمشەلەرى, سونىڭ ىشىندە 12 تەحنيكا جانە جەكە قۇرامنىڭ 40 ادامى, جول-پاترۋلدىك قىزمەتى, قالالىق جەدەل مەديتسينالىق جاردەم ستانساسى, «ارەك» اق اپاتتىق قىزمەتى قاتىستى. جالپى جىل باسىنان بەرى استانالىق قۇتقارۋشىلار 250-دەن استام جوسپارلى وقۋ-جاتتىعۋ وتكىزدى.
