كورنەكتى كومپوزيتور اسەت بەيسەۋوۆتىڭ اقىن كاكىمبەك سالىقوۆتىڭ ولەڭىنە جازىلعان «ءبىر تاماشا ءان ءۇشىن» اتتى انىندە «حان دا وتەر, حازىرەت تە وتەر, ءبىز دە وتەرمىز, ۇرپاققا سالەم ايتىپ ءان قالادى» دەگەن جولدار بار. استانا قالاسى مەملەكەتتىك اكادەميالىق فيلارمونياسى ۇيىمداستىرعان «ۇمىتىلماس اندەر» كونتسەرتىنىڭ مازمۇنىن وسى سوزدەر اشادى.
كونگرەسس-حولدا ءوتىپ, ءابىلاحات ەسپاەۆ, نۇرعيسا تىلەنديەۆ, ءشامشى قالداياقوۆ جانە اسەت بەيسەۋوۆ سىندى قازاق مۋزىكاسى مايتالماندارىنىڭ اندەرىن ءبىر ارناعا توعىستىرعان بۇل كەش اسەتتىڭ اسەم ءاندەرىمەن اشىلىپ, نۇرعيسانىڭ نۇرلى تۋىندىلارىمەن تۇيىندەلدى. كونتسەرتتە باس اياعى وتىزدان استام ءان شىرقالدى. سولاردىڭ كوبىسىن كورەرمەن انشىلەرگە قوسىلىپ ايتتى.
اسەت بەيسەۋوۆتىڭ اندەرى سانالۋان تاقىرىپتاردى قامتيدى. ونىڭ ءان قورجىنىندا تۋعان ەل, جەر تۋرالى, بالالارعا ارنالعان اندەر كوپ كەزدەسەدى. الايدا, حالىققا ونىڭ جۇرەك قىلىن شەرتەتىن ليريكالىق تۋىندىلارى جاقىن دەپ ايتساق, قاتەلەسە قويماسپىز. سول سياقتى كونتسەرتتە كومپوزيتوردىڭ «الدىمنان شىق», «اق گۇلىم» سىندى اندەرى شىرقالىپ, اعا بۋىنعا جالىنداعان جاستىق شاقتارىن ساعىندىردى. «ارمانداستار» ءانى مەكتەپتە بىرگە وقىعان قۇربى-قۇرداستاردى ەسكە الدىردى. ال, اقىن مۇزافار ءالىمباەۆتىڭ سوزىنە جازىلعان «مارالدىم» ءانى تۋعان جەردىڭ قاسيەتىن سەزىندىرگەندەي بولدى.
ءتورت كومپوزيتوردىڭ شىعارماشىلىعىندا دا ەل مەن جەر تۋرالى اندەر جەتىپ ارتىلادى. ماسەلەن, ءشامشى قالداياقوۆتىڭ اندەرىنەن گەوگرافيا ساباعىن وتكىزۋگە بولادى دەگەن قالجىڭ بولسا دا, اقيقاتتان الىس ەمەس ءسوز جۇرت اراسىندا ءجيى ايتىلادى. راسىمەن, ءشامشىنىڭ اندەرىندە قامتىلماعان بايتاق قازاقستانداعى جەر جوق شىعار. قازاق ءۆالسى كورولىنىڭ سونداي تاماشا تۋىندىلاردىڭ ءبىرى – «وتىرارداعى توي» ءانى. بۇل ءاندى بەلگىلى ءانشى باعدات سامەدينوۆا ءوزىنىڭ بيىك رۋحىنا ساي ورىنداپ شىقتى. نۇرعيسا تىلەنديەۆتىڭ «ءوز ەلىم» ءانىن ايتۋ دا بۇل ءانشىنىڭ ەنشىسىنە بۇيىردى.
نۇرعيسانىڭ «سارجايلاۋىن» حالىقتىڭ سۇيىكتى ءانشىسى التىناي جوراباەۆا سالدى. التىناي جۇرتقا ءشامشىنىڭ «ءومىر-وزەن» انىمەن تانىلعانىن ايتا كەتەيىك. سونداي-اق, اقىن ەركەش ءيبراھيمنىڭ سوزىنە جازىلعان «شىنارىم» ءانىن جاڭعىرتقان دا وسى ءانشى. ال ءوزى قازىر قىز ءوسىرىپ وتىرعان التىنايعا «انا تۋرالى جىر» شىعارماسىن سالۋ, ءتىپتى جاراسادى ەكەن.
ءشامشى ءابىلاحات ەسپاەۆتى ساز ونەرىنىڭ سۇلتانى دەپ اتاعان. ءابىلاحاتتىڭ «دوستار» جانە «ۇستازىم» اندەرىن بىلمەيتىن قازاق جوق. بار تىڭدارمانعا جىلى تيەتىن وسى اندەر دە كەشتىڭ ءارىن كىرگىزدى. سونىمەن قاتار بۇل كومپوزيتوردىڭ «اق ساۋلە», «مارجان قىز», «ساعىنىش ەكەن بالا كەز», «قىز قۋ» سىندى شىعارمالارى كورەرمەن قيالىن شارىقتاتتى.
كەشكە قاتىسقان تانىمال ءانشىلەردىڭ قاتارىندا ايگۇل قوسانوۆا دا بولدى. ءداستۇرلى ءانشى بولىپ تانىلعان ايگۇلدى ەستراداعا نۇرعيسانىڭ «قۇستار قايتقاندا» ءانى جەتەلەپ الىپ كەلدى. ءانشى بۇل تۋىندىنى نازىك ليريزممەن ورىنداپ شىقتى.
كورەرمەن بۇل كەشكە كەلىپ, تاماشا دەمالىپ قالدى.
امانعالي قالجانوۆ
