تۇرىك كىتاپ سورەلەرى تاعى ءبىر قازاق رومانىمەن تولىقتى. انكارادا بەلگىلى جازۋشى, دراماتۋرگ جولتاي ءالماشۇلىنىڭ «ماحاببات جانە وشپەندىلىك» تۋىندىسىنىڭ تۇرىك تىلىندەگى نۇسقاسى تانىستىرىلدى.
مازمۇندى ءىس-شاراعا تۇركسوي-دىڭ باس حاتشىسى, قىرعىز حالىق جازۋشىسى سۇلتان راەۆ, دۇنيەجۇزى قازاقتارى قاۋىمداستىعىنىڭ تۇركياداعى وكىلى ەرجان ءۋايىس, تۇرىك ءتىلى مەن ادەبيەتىنىڭ پروفەسسورى, اكادەميك ورحان سويلەمەز, سونداعى قازاق دياسپوراسىنىڭ وكىلدەرى مەن تۇرىك زيالىلارى قاتىستى.
قازاقتىڭ قارا دومالاق بالاسىنىڭ شەتەلدەگى قايشىلىققا تولى ءومىرى باياندالاتىن روماننىڭ قۇندىلىعى مول. بۇل تۋرالى سۇلتان راەۆ اتاپ, جازۋشىنىڭ ەڭبەكقورلىعى مەن ىزدەنىمپازدىعىن اتادى.
ەۋرازيا جازۋشىلار وداعىنىڭ توراعاسى ياكۋب ومەرۇعۇلى, پروفەسسور ورحان سويلەمەز, قازاق ەلشىسىنىڭ ورىنباسارى مەرەي مۇقاجان قۇتتىقتاۋ ءسوز سويلەدى.
– جاھاندانۋ ۋاقىتىندا اۋقىمدى تاقىرىپتى قامتىعان رومانداردى شىعارۋ ماڭىزدى. ال مۇنداي تاقىرىپتا قالام تارتاتىن جازۋشىلار وتە از. «ماحاببات جانە وشپەندىلىك» رومانىندا گلوبالدى فونمەن قازاقتىڭ رۋحى مەن مادەنيەتى جاقسى بەرىلگەن, – دەپ اتادى ياكۋب ومەرۇعۇلى.
جولتاي جۇمات ءسوز الىپ, وسىدان 30 جىل بۇرىن الماتىدا تۇركسوي ۇيىمىنىڭ قۇرىلتايىنا ۇلەس قوسقانىن, ەندى حالىقارالىق ۇيىمنىڭ 30 جىلدىعى اياسىندا تۇركيادا ەكىنشى كىتابىنىڭ تۇساۋكەسەرى ءوتىپ جاتقانىنا قۋانىشتى ەكەنىن جەتكىزىپ, قازاق جەرىندە ءومىر سۇرگەن تۇركى الەمىنىڭ ايتۋلى تۇلعاسى ءال-فارابي مەن قوجا احمەت ياساۋي تۋرالى جازعان تۋىندىلارىنا توقتالدى.
– تۇركيادا 85 ميلليون قانداسىمىز تۇرادى. انادولى ەلى – ەۋروپانىڭ قاقپاسى. سوندىقتان شىعارمالارىمىزدى مۇمكىندىگىنشە تۇرىك باۋىرلارعا تانىستىرىپ, دارىپتەۋىمىز كەرەك. الداعى ۋاقىتتا تۇرىك تىلىنە اۋدارىلعان شىعارمالار اعىلشىن, فرانتسۋز تىلىندە شىعىپ جاتسا, جالعىز مەنىڭ عانا ەمەس, قازاقتىڭ مارتەبەسى دەپ ويلايمىن, – دەدى جازۋشى جولتاي ءالماشۇلى.
جولتاي جۇماتتىڭ 40-قا جۋىق كىتابى باسپا كوردى. «ويانعان ۇرپاق», «جەتىم جۇلدىزدار», «كۇلكى مەن كوز جاسى» روماندارىنىڭ قازاق ادەبيەتىندەگى ورنى بيىك. «قاراتاۋدىڭ قاھارى» قىسقا رومانى دا قازاق وقىرماندارىنىڭ جوعارى باعاسىن الدى.
