ەسىل اۋدانىنىڭ اكىمى تولەگەن زاكاريانوۆ بۇرناعى كۇنى «ۇركەر» تۇرعىن الابىنىڭ تۇرعىندارىمەن, ال كەشە «استانا-رەك» اق كومپانياسىنىڭ ۇجىمىمەن جۇزدەسىپ, ەسەپ بەرۋ جيىنىن وتكىزدى.
«ۇركەر» تۇرعىن الابىنداعى جيىنعا 250-دەن اسا تۇرعىن قاتىستى. اۋدان اكىمىنىڭ اتقارىلعان جۇمىستار جايلى بايانداماسىن تىڭداعان سوڭ ولار اتالمىش تۇرعىن الاپتاعى اباتتاندىرۋ, كوشە جارىعى مەن جول, ينجەنەرلىك جەلىلەرگە, سۋ قۇبىرلارىنا قاتىستى ماسەلەلەردى كوتەردى. ءوز كەزەگىندە ۇكىلى ىبىراي كوشەسىنىڭ تۇرعىنى اسقار سەيسەنباي:
– وسىندا كوشىپ كەلگەنىمىزگە 2 جىلدان استى. بىراق ءالى دە شەشىمىن كۇتكەن بىرقاتار ماسەلەمىز بار. مىسالى, تىركەۋگە ءالى وتىرا الماي ءجۇرمىز. بۇل – ءبىر. سودان سوڭ «سۋدىڭ دا سۇراۋى بار» دەيدى. پايدالانىپ جاتقان سۋىمىزدىڭ شىعىنىن تولەيىك دەسەك, «استانا سۋ ارناسىنان» ازىرگە ەشكىم كەلىپ تەكسەرىپ, قاداعالاپ جاتقان جوق. ودان كەيىن قوعامدىق كولىك ماسەلەسى تاعى بار. اۆتوبۋس بىزگە ءبىراز الىستاۋ توقتايدى. ونىڭ ءجۇرۋ كەستەسىن ءبىزدىڭ كوشەگە قاراي تىم قۇرىعاندا ءبىر ايالداماعا ۇزارتساڭىزدار جاقسى بولار ەدى. 1-2-سىنىپتا وقيتىن نەمەرەلەرىمىز بار, ودان بولەك, ءوزىمىز سياقتى قاريالار دا كوپ تۇرادى ول جاقتا. سوندىقتان ءجۇرىپ-تۇرۋىمىزعا ىڭعايلى بولۋى ءۇشىن وسىنداي جاعداي جاساۋدى ەسكەرسەڭىزدەر ەكەن, – دەگەن ءوتىنىشىن ءبىلدىردى.
وسى باعىتتا جۇمىستار جۇرگىزىلىپ جاتقانىن, بۇل ماسەلەلەردى ءوزىنىڭ باقىلاۋىندا ۇستايتىنىن ايتقان اكىم اتالمىش سۇراقتارعا وسى ەسەپتىك كەزدەسۋدەن كەيىن 4 كۇننەن سوڭ ناقتى جاۋاپ بەرەتىنىن جەتكىزدى.
ال تۇرعىنداردىڭ ماسەلەلەرىن قۇزىرلى ورگاندارعا جەتكىزىپ, تۇيتكىلدەردىڭ ءتۇيىنىن شەشۋگە اتسالىسۋدى وزدەرىنە مىندەت سانايتىنىن ايتقان «ۇركەر» تۇرعىن الابىنىڭ قوعامدىق كەڭەس ءتورايىمى راشيدا تاشەنوۆا دا اتالمىش تۇرعىن الاپتاعى بىرقاتار ماسەلەنىڭ باسىن اشتى.
– تۇرعىندار اكىمدىككە نەمەسە باسقا دا قۇزىرلى ورگاندارعا دەر كەزىندە حابارلاسا الماعان ۋاقىتتا بىزگە جۇگىنەدى. جالپى, «ۇركەر» تۇرعىن الابىنىڭ شىعىس جاعىندا كوشە اتاۋلارى كورسەتىلمەگەن. سودان كەيىن ينجەنەرلىك جەلىلەردە قانداي دا ءبىر اپاتتىق جاعداي ورىن السا, «شىعىس ۇركەردە» سۋ دا, ەلەكتر جارىعى دا تۇتاستاي ءسونىپ قالادى. قاشان جوندەلگەنشە ءوشىپ تۇرادى. ولاي دۇرىس ەمەس قوي. نەگە جوندەۋ جۇرگىزىلگەندە جەلىلەردىڭ بەلگىلى ءبىر بولشەگى عانا ءوشىرىلىپ, اپات بولماعان باسقا بولىكتەرى قوسۋلى تۇرمايدى؟ – دەدى ول.
جيىن بارىسىندا اۋدان اكىمىنە بۇدان دا باسقا كوپتەگەن ساۋالدار قويىلدى. بارلىق سۇراققا رەت-رەتىمەن جاۋاپ قاتقان تولەگەن زاكاريانوۆ ماسەلەلەردىڭ نازاردان تىس قالمايتىنىن ايتتى.
ال «استانا-رەك» اق ۇجىمىمەن جۇزدەسۋ كەزىندە اۋدان باسشىسى ءوزىنىڭ بايانداماسىنان سوڭ اتالمىش كومپانيا قىزمەتكەرلەرىن تولعاندىرعان ساۋالدارعا جاۋاپ بەردى. سۇراقتاردىڭ دەنى اۆتوبۋس قوزعالىسى مەن جىلى ايالداما, جاڭا ۇيلەردىڭ اۋلاسىن اباتتاندىرۋ, كىرمە جولداردى جوندەۋ, سۋ تارتۋ سياقتى ماسەلەلەر تۇرعىسىندا ءوربىدى.
العاشقى بولىپ ءسوز العان 220/110 كۆ قوسالقى ستانسا قىزمەتىنىڭ اعا شەبەرى قاستاي بايسالدين ۇجىمدارىنىڭ وتە ۇلكەن ەكەنىن, جۇمىستان 40-50 ادامنىڭ ءبىر باعىتقا قاراي قايتاتىندارىن تىلگە تيەك ەتىپ, وزدەرىنىڭ №44 اۆتوبۋستى ۇزاق ۋاقىت كۇتەتىندەرىن, سونىمەن قاتار, قىستىڭ كۇندەرى جىلى ايالدامانىڭ قاجەت ەكەنىن ايتتى.
جالپى, اتالمىش اۋدان توڭىرەگىندە 300-دەن اسا ايالدامانىڭ 17-ءسى جابىق تۇردە ەكەنىن ايتقان تولەگەن زاكاريانوۆ ينۆەستورلار ەسەبىنەن قالادا تاعى 50 جىلى ايالداما سالىنسا, سونىڭ 25-ءسى ەسىل اۋدانىندا ورناتىلاتىنىن جەتكىزدى. ال «استانا-رەك» كومپانياسىنىڭ ماڭىنا جىلى ايالداما ورناتۋ جونىندە ول ءوزىنىڭ بىرنەشە نۇسقاسىن ۇسىندى.
– ينۆەستورلار قۇيعان قارجىسىن وتەۋ ءۇشىن ايالدامانى ورناتۋدا وزدەرىنە ىڭعايلى ورىندى قاراستىرادى. ماسەلەن, جاقىندا «جاعالاۋ» تۇرعىن الابىندا زاماناۋي ايالدامانىڭ ورناتىلعانىن بىلەسىزدەر. وندا ساۋدا-ساتتىق الاڭى مەن اجەتحانا قاراستىرىلىپ, جولاۋشىلارعا بارىنشا جاعداي جاسالعان. دەگەنمەن ءبىز تۇرعىنداردىڭ ءوتىنىشىن ەسكەرە وتىرىپ, كەيبىر ورىنداردى ءوزىمىز دە ينۆەستورلارعا ۇسىنىپ كورەمىز. دەيتۇرعانمەن, «استانا-رەك» كومپانياسىنىڭ ءوز جاعدايى دا جامان ەمەس. قاجەت بولسا, قاراماعىنداعى جۇمىسشىلار ءۇشىن ءبىر جىلى ايالداما سالىپ بەرەدى دەپ ويلايمىن. بۇل تۋرالى كومپانيا باسشىلىعىمەن قوسىمشا سويلەسەتىن بولامىز, – دەدى
ت.زاكاريانوۆ.
ال ءوز كەزەگىندە «استانا-رەك» اق مەملەكەتتىك ساتىپ الۋ ءبولىمىنىڭ باستىعى گۇلسانا مۇحامەدياروۆا پايدالانىلۋعا بەرىلگەنىنە كوپ بولا قويماعان «ەنەرگەتيك» تۇرعىن ءۇي كەشەنى تۋرالى ءسوز قوزعادى. ونىڭ ايتۋىنشا, جىبەك جولى جانە ە-246 كوشەلەرىنىڭ قيىلىسىنداعى
بۇل تۇرعىن ءۇيدىڭ بالالار الاڭى جايسىز. ونىمەن قوسا, اۋلاعا كىرەتىن جولداردى جوندەۋ قاجەت كورىنەدى. سول سياقتى اينالاسىندا قۇرىلىس ءجۇرىپ جاتقاندىقتان, ازداعان جەل سوقسا «ەنەرگەتيك» تۇرعىندارىن شاڭعا بوكتىرەدى ەكەن.
كەزەگى كەلگەندە ءسوز العان اتالمىش كومپانيانىڭ دامۋ قىزمەتىنىڭ جەتەكشى ينجەنەرى ايدىن الىمقۇلوۆا قايىم مۇحامەدحانوۆ كوشەسىندەگى سۋمەن جابدىقتاۋ جۇمىسىنىڭ قالاي ءجۇرىپ جاتقانىن سۇرادى.
اتالمىش كوشە بويىنداعى تۇرعىن ۇيلەرگە سۋدىڭ 10 اقپانعا دەيىن بەرىلەتىنىن كەسىپ ايتقان اۋدان اكىمى «ەنەرگەتيك» تۇرعىن ءۇي كەشەنىنىڭ ماسەلەلەرى رەت-رەتىمەن جوسپار بويىنشا شەشىلەتىنىن جەتكىزدى.
– تۇرعىنداردىڭ كوبى باسپانالى بولۋعا اسىعىپ, وعان قول جەتكىزگەن سوڭ جاڭا پاتەرگە تەزىرەك كوشىپ بارۋعا تىرىسادى. ودان كەيىن قونىس تويىن تويلاۋمەن ءبىراز ۋاقىت وتەدى. سودان 10 كۇننەن كەيىن عانا ولار سۋ, جارىق, اۋلا جونىندە جاڭادان سالىنعان تۇرعىن ءۇيدىڭ ماسەلەسىن ايتىپ, ءار نارسەگە كوڭىلدەرى تولماي, شاعىمدانا باستايدى. سونىڭ ءبارىن قونىستانباس بۇرىن, الدىن الا جاساتىپ الۋدى ويلاستىرعان ءجون بولار ەدى, – دەدى ول.
