باقىت سۇلتانوۆ بەيبىتشىلىك جانە كەلىسىم سارايىندا بولىپ, ەرەكشە عيماراتتىڭ جۇمىسىمەن تانىستى.
الداعى ۋاقىتتا بۇل عيماراتتىڭ ىشكى كورىنىسى جاڭا مازمۇنعا يە بولماق. بۇل وزگەرىستىڭ قالايشا جاسالاتىنى جونىندە قالا باسشىسىنا «قۇلانشى» زاماناۋي ونەر ورتالىعىنىڭ جەتەكشىسى لەيلا ماحات تانىستىردى. «ءبىز نىساندى جاڭا ەنەرگيامەن تولىقتىرۋدى جوسپارلاپ وتىرمىز. مۇندا ساۋلەتشى نورمان فوستەر ويلاپ تاپقان ستيلگە سايكەس كەلەتىن بارلىق بولمەلەردىڭ ادەمى, جايلى بولۋىن قالايمىز. سونىمەن بىرگە وسىندا وتەتىن مادەني باعدارلامالاردىڭ ۇيلەسىمدىلىگىنە دە ماڭىز بەرىلەتىن بولادى» دەدى ول. سونداي-اق اتالعان سارايدا كوۆوركينگ ورتالىعىن قۇرۋ جوسپارلانىپ وتىرعانى ءمالىم بولدى.
مۇنىمەن قوسا, قالا اكىمدىگى پرەزيدەنتتىك ساياباقتى قايتا جاڭارتۋدى جوبالاپ وتىر. «ءبىز جوبانى جۇزەگە اسىراتىن اۆتوردى انىقتادىق. ساياباق قۇرىلىمىنا «ەنتسيكلوپەديا ساياباق», «ەجەلگى ونەر جانە تەحنولوگيالار مۇراجايى» سىندى تولىقتىرۋلار ەنگىزىلەدى. اۆتورلار كەستە دايىنداپ, قۇرىلىس ەكى كەزەڭگە ءبولىنىپ جۇرگىزىلەدى. ساياباق پەن وعان ىرگەلەس اۋماقتار جاڭارتىلادى» دەدى ساۋلەت, قالا قۇرىلىسى جانە جەر قاتىناستارى باسقارماسىنىڭ باسشىسى باقتىباي تايتاليەۆ.
ەلوردا باسشىسى بەيبىتشىلىك جانە كەلىسىم سارايىنىڭ ىشكى وزگەرىستەرى بويىنشا ۇسىنىلعان جوبانى قولداپ, جاۋاپتى ماماندارعا عيماراتقا تولىق تەحنيكالىق ساراپتاما جۇرگىزۋدى تاپسىردى.
