استانا اكىمى باقىت سۇلتانوۆ «Bi-Group» كومپانياسىنىڭ قۇرىلىس نىساندارى مەن بەيبىتشىلىك جانە كەلىسىم سارايىندا بولىپ, ولاردىڭ قىزمەتىمەن تانىستى.
الدىمەن ەلوردا باسشىسى «BI-Group» كومپانياسى سالىپ جاتقان بىرقاتار قۇرىلىس نىسانىندا بولدى. كومپانيانىڭ باسقارما توراعاسى امانگەلدى وماروۆ بىلتىر كومپانيا 800 مىڭ شارشى مەتر نەمەسە بۇكىل ەلىمىز بويىنشا 7 204 جاڭا پاتەردى پايدالانۋعا بەرگەنىن, جالپى سوڭعى ءۇش جىلدا كومپانيا قۇرىلىستى تاپسىرۋ مەرزىمىن 30 پايىزعا دەيىن قىسقارتقانىن ءمالىم ەتتى.
قالا اكىمى بارىپ كورگەن «پرەمەرا» كوپ قاباتتى تۇرعىن ءۇيى كوركەم ساۋلەتىمەن ەرەكشەلەنەدى. قازىر مۇنداعى 700 پاتەردىڭ ءبارى ساتىلىپ, ادامدار قونىستانىپ جاتىر. بۇل كەشەندە قالدىق پەن قوقىس جاڭا جۇيەمەن جينالادى. كومپانيا وتكەن اپتادا «Avenue 5» تۇرعىن ءۇي كەشەنىن دە پايدالانۋعا بەردى. وسى ءۇيدىڭ ءبىر ەرەكشەلىگى – تۇرعىندارى ءۇشىن قوناقتاردى قابىلداۋعا ارنالعان ۇلكەن بولمە بار. مۇنى وسى ءۇيدىڭ كەز كەلگەن تۇرعىنى پايدالانا الادى. بۇل بولمە نىساننىڭ ءبىرىنشى قاباتىندا ورنالاسقان. وندا شاعىن وتىرىستار وتكىزۋگە بولادى.
سونداي-اق 940 پاتەرلى «BI City Seoul» كەشەنىن شىن مانىندە «اقىلدى ءۇي» دەپ اتاۋعا بولادى. بۇل ۇيگە كىرۋ ءۇشىن ەشقانداي كىلت قاجەت ەمەس. ەسىكتەرى تۇرعىندى تانۋ جۇيەسى ارقىلى اشىلادى. بۇعان جەكە كولىگىڭىزدىڭ مالىمەتتەرىن ەنگىزسەڭىز, پاركينگتىڭ ەسىگى دە بىردەن قوسىلادى. بوتەن ادامدار بۇل ۇيگە كىرە المايدى. ءۇيدىڭ اۋلاسى كورەي ستيلىندەگى لاندشافتىق ديزاينمەن بەزەندىرىلگەن.
ەلوردا باسشىسى «BI-Group» كومپانياسى ەنگىزىپ جاتقان ۇزدىك جوبالاردى ناسيحاتتاۋ قاجەتتىگىن ايتا كەلىپ, قۇرىلىسشىلاردىڭ ۇسىنىستارىن قولداپ, ونى جۇزەگە اسىرۋ ءۇشىن ساۋلەت, قالا قۇرىلىسى جانە جەر قاتىناستارى باسقارماسىنا نۇسقاۋ بەردى.
قالياقپار ۇسەمحانۇلى
