بۇگىن ەلوردالىق مەكتەپ بىتىرۋشىلەر ۇبت تاپسىرادى. وسىعان وراي, قالالىق ءبىلىم باسقارماسىنىڭ جالپى ورتا ءبىلىم بەرۋ ءبولىمىنىڭ باسشىسى بوتاگوز جۇنىسوۆامەن جولىعىپ, اڭگىمەلەسكەن ەدىك.
– سىندارلى سىناققا بيىل قانشا تۇلەك قاتىسقالى وتىر؟
– بيىلعى وقۋ جىلىندا مەكتەپ بىتىرگەلى وتىرعان 4407 تۇلەكتىڭ 3554-ءى ۇلتتىق بىرىڭعاي تەستىلەۋگە قاتىسادى.
ۇلتتىق بىرىڭعاي تەستىلەۋ جىلداعى ءداستۇر بويىنشا 2, 4, 6 ماۋسىم كۇندەرى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە جانە 3, 5 ماۋسىم كۇندەرى قازاق گۋمانيتارلىق زاڭ ۋنيۆەرسيتەتىندە وتەدى.
– تەستىلەۋ اشىق ءارى جاريالى تۇردە ءوتۋ ءۇشىن ۇبت پۋنكتتەرى دايىن با؟
– ءيا, تەست تاپسىرۋعا دايىندىق كەزەڭىندە جوعارى سىنىپ وقۋشىلارىنىڭ دا, اتا-انالاردىڭ دا قاتتى مازاسىزداناتىنى بەلگىلى. ويتكەنى, ءجاسوسپىرىمنىڭ بولاشاق ءومىرى, كاسىبي ءبىلىم الۋ دەڭگەيى, ءتىپتى, ونىڭ كەلەشەگى جانە الەۋمەتتىك جەتىستىگى دە ۇبت ناتيجەسىنە تىكەلەي قاتىستى. بۇل زور پسيحولوگيالىق كۇش تۋدىرادى, سترەستىك جاعدايعا الىپ كەلەدى. ال مۇنىڭ ءبارى سىناق تاپسىرۋ ساپاسىنا اسەر ەتپەۋى ءتيىس. وسىعان بايلانىستى ۇلتتىق بىرىڭعاي تەستىلەۋدىڭ اشىق ءارى جاريالى تۇردە ءوتۋى ءۇشىن بارلىق تەستىلەۋ پۋنكتتەر قاجەتتى زاتتارمەن جاراقتاندىرىلدى. قالا اكىمىنىڭ ورىنباسارى ە.امانشاەۆتىڭ, باسقا دا باسقارما باسشىلارىنىڭ قاتىسۋىمەن وتكىزىلگەن كوشپەلى ءماجىلىستىڭ ناتيجەسىندە بۇگىندە بارلىق پۋنكتتەر جۇمىس ىستەۋگە ساقاداي ساي.
– بيىلعى تەستىلەۋدى وتكىزۋ تارتىبىندە وزگەرىستەر بار ما؟
– ۇبت-نىڭ جالپى وتكىزىلۋ فورماتى وزگەرىسسىز قالىپ وتىر. بيىل تۇلەكتەردىڭ تەستىلەۋ بارىسىندا ءتارتىپ بۇزۋشىلىقتارعا جول بەرىپ, باسقا دا ءارتۇرلى سەبەپتەرمەن اۋديتوريادان شىعارىلۋىنا كوبىرەك كوڭىل بولىنەتىن بولادى. وسىعان وراي, مەكتەپ پەن وبلىستاردىڭ رەيتينگىن ەسەپتەۋ بارىسىندا ورتاشا ۇپاي سانا عانا ەمەس, تەستىلەۋگە قانشا بالانىڭ قاتىسقانى دا, ياعني, ءارتۇرلى سەبەپتەرمەن تەستىلەۋ تاپسىرۋدان بوساتىلعان بالالاردىڭ سانى جانە تەستىلەۋگە قاتىسقانداردىڭ سانى ەسكەرىلەتىن بولادى. سونداي-اق, ءبىلىم مينيسترلىگىنىڭ «ۇبت وتكىزۋ ءتارتىبى تۋرالى» ەرەجەسىنىڭ 48-تارماعىنا وزگەرىس ەنگىزىلدى. بۇل رەتتە جالپى ءبىلىم بەرۋ پاندەرى بويىنشا اتتەستاتقا مەكتەپ ءبىتىرۋشىنىڭ جىلدىق باعاسى ەسكەرىلە وتىرىپ, ورتاشا اريفمەتيكالىق باعا قويىلادى. اتتەستاتتاعى باعا وزگەرگەنىمەن, سەرتيفيكات سول كۇيىندە قالادى.
ۇلتتىق بىرىڭعاي تەستىلەۋ بەس ءپان بويىنشا, ياعني, وقۋ تىلىنە قاراي قازاق ءتىلى نەمەسە ورىس ءتىلى, ماتەماتيكا, قازاقستان تاريحى جانە تاڭداۋ پاندەرىنەن قابىلدانادى. تەست تاپسىرمالارىنىڭ بارلىعى مەكتەپ باعدارلاماسىنا نەگىزدەلىپ قۇراستىرىلادى.
2015 جىلدان ۇبت-نى جاقسارتۋ شارالى قولدانىلۋدا, ياعني, تەستىلەۋ بارىسىندا ءادىل تۇردە تاپسىرۋعا ىنتالانىپ, سىبايلاس جەمقورلىق سحەماسىن, تىيىم سالىنعان زاتتاردى پايدالانباۋ ماقساتىندا, اتتەستاتتارعا ۇبت ناتيجەسى بويىنشا ورتااريفمەتيكالىق باعا مەن جىلدىق باعا قويىلادى. تۇلەكتەردىڭ ادال باعالارى عانا ۇبت كەزىندە نولدىك ناتيجە كورسەتپەۋىنە جانە اعىمداعى جىلدا جوعارى وقۋ ورىندارىنا تۇسپەي قالۋىنان قۇتقارادى.
گۇلبارشىن وكەشقىزى
