ەلوردادا 4-5 ماۋسىمدا ايتۋلى مۋزىكالىق مەرەكە وتەدى. بەيسەنبى كۇنى «استانا-ارەنا» ستاديونىنىڭ الدىندا رەسەيدىڭ جانە قازاقستاننىڭ تانىمال انشىلەرىنىڭ قاتىسۋىمەن ۇلكەن كونتسەرت, ال جۇما كۇنى ستاديون عيماراتىندا «مۋز-تۆ – 2015. گراۆيتاتسيا» سىيلىعىن تاپسىرۋ ءراسىمى ۇيىمداستىرىلادى.
اتالمىش ءراسىم تاريحى 2003 جىلدان باستاۋ الادى. سودان بەرى ماسكەۋ قالاسىنداعى «وليمپيسكي» سپورت كەشەنىندە ءوتىپ كەلە جاتقان بۇل شارا بيىل تۇڭعىش رەت قازاقستاننىڭ باس قالاسىندا ۇيىمداستىرىلادى. وعان كورشى ەلدەن بەلگىلى مۋزىكانتتار, سپورتشىلار, مادەنيەت سالاسىنىڭ مايتالماندارى جينالادى. جالپى العاندا, ەلورداعا قاراپايىم كورەرمەندەردى قوسقاندا مىڭعا جۋىق قوناق كەلەدى.
«ۇزدىك ورىنداۋشى (ەر ادام)» اتالىمىندا فيليپپ كيركوروۆ, ديما بيلان, سەرگەي لازارەۆ, گريگوري لەپس پەن ۆالەري مەلادزە سىندى انشىلەر توپقا ءتۇسىپ وتىر. ال, ۇزدىك ءانشى ايەل اتانۋ ءۇشىن اني لوراك, نيۋشا, پولينا گاگارينا, ۆەرا برەجنەۆا مەن ەلكا باسەكەلەسەدى. مۋزىكالىق توپتاردىڭ اراسىندا «باندەروس», رەسەي ەستراسىندا ءوزىن مويىنداتقان «ا-ستۋديو», «ديسكوتەكا اۆاريا», «گرادۋسى» مەن «سەرەبرو» ۇجىمدارى قايسى مىقتى ەكەنىن انىقتايدى. انسۇيەر قاۋىم وزگە دە اتالىمداردا ونەر دوداسىنا كىرگەن بەلگىلى توپتار مەن انشىلەردى كورە الادى.
بارلىعى ون بەس اتالىمنىڭ اراسىنا بيىل العاشقى مارتە «ۇزدىك قازاقستاندىق جىل ءارتىسى» اتالىمى قوسىلىپ وتىر. بۇل اتاقتى يەلەنۋ ءۇشىن بىلتىر «Turkvision» بايقاۋىنا قاتىسىپ, ەلىمىزدىڭ مەرەيىن اسىرعان جانار دۇعالوۆا, سوڭىنان تالاي شۋ مەن دۋدى ەرتسە دە, شىعارماشىلىعىن ورگە جۇزدىرگەن قايرات نۇرتاس, باسقا انشىلەرىمىزگە قاراعاندا بوي-تۇلعاسى ەرەك نۇرلان ابدۋللين, كارىگە دە, جاسقا دا سۇيكىمدى «مۋزارت» توبى جانە سوڭعى جىلدارى ەسترادا كوگىندە جۇلدىزى جانعان ءالي وقاپوۆ باق سىنايدى.
ەندى از-كەم وسى قازاقستاندىق جۇلدىزدارعا توقتالايىق. جانار دۇعالوۆا بالا كەزىندە ءوزى قاتىسقان «ءانشى بالاپان» بايقاۋىنان قاناتتاندى. بوي جەتكەندە پروديۋسەر بايان ەسەنتاەۆانىڭ نازارىنا ىلىگىپ, «كەشيۋ» توبىنا شاقىرىلدى. توپتان كەتكەننەن سوڭ جەكە شىعارماشىلىعىنا دەن قويدى. انشىلىگىمەن قاتار كومپوزيتورلىق جانە اقىندىق قىرلارى بار. بۇل جاعىنان ناعاشىسى بەلگىلى اقىن يران عايىپقا تارتقانداي. ەڭ ۇلكەن جەڭىسكە, اتاپ كورسەتكەنىمىزدەي, «Turkvision» بايقاۋىندا جەتتى.
نۇرلان ءابدۋللينىڭ ساحنادا جۇرگەنىنە ءبىراز جىلعا جۋىقتادى. ءازىل-قالجىڭعا جاقىن ءانشى وسىدان جيىرما ەكى جىل بۇرىن الماتىدا وتكەن ساتيرا جانە يۋمور بايقاۋىنىڭ لاۋرەاتى اتانعان. انشىلىك ونەرمەن قوسا قايىرىمدىلىقپەن اينالىسادى. ماسەلەن, «پارىز» قايىرىمدىلىق قورىنىڭ پرەزيدەنتى رەتىندە دەنساۋلىعىندا كىناراتى بار بالالار ەمىنە قول ۇشىن سوزىپ وتىرادى.
مەيرامبەك بەسپاەۆ, ساكەن مايعازيەۆ جانە كەنجەبەك ءجانابىلوۆ, بارلىعىن قوسقاندا «مۋزارت» توبىنىڭ رەپەرتۋارىنداعى وتانشىلدىققا شاقىراتىن جانە ليريكالىق اندەردى ەڭكەيگەن قاريا مەن ەڭبەكتەگەن بالاعا دەيىن ءسۇيىپ تىڭدايدى. ولاردىڭ شىعارماشىلىعى جايلى ءبىراز نارسە ايتۋعا بولادى. ءبىر بايقاعانىمىزدى عانا ايتايىق – «مۋزارت» ەلوردادا وتەتىن ايتۋلى مەرەكەلەرگە ارنالعان كونتسەرتتەرگە ۇنەمى قاتىسادى.
قايرات نۇرتاس پەن ءالي وقاپوۆ ءبىر ساحنادا جۇرگەنىمەن قاتار ولارعا ورتاق ءبىر جايت بار. قايرات ءوز اناسى گۇلزيرا ايداربەكوۆانىڭ جەتەلەۋىمەن انشىلىك ونەرگە بەت بۇرسا, ءاليدىڭ اناسى – ەسترادا جۇلدىزى روزا رىمباەۆا. ءاليدىڭ جەتىستىكتەرىن دە كوپشىلىگى اناسىنىڭ تانىمالدىعىمەن بايلانىستىرادى. ءا. وقاپوۆتىڭ ءوزى دە ءوزىن ءانشى ەمەس, مۋزىكانت رەتىندە سەزىنەتىنىن ايتادى.
نە دەسەك تە, «مۋز-تۆ» ارناسىنىڭ باس ديرەكتورى ارمان داۋلەتياروۆتىڭ ايتۋىنشا, مۋزىكا ماماندارىنىڭ تاڭداۋى وسى انشىلەرگە تۇسكەن. ال, «ۇزدىك قازاقستاندىق جىل ءارتىسى» 5 ماۋسىم كۇنى انىقتالادى.
