استانادا شىمىلدىعىن تۇرگەن كورنەكتى تەاتر سىنشىسى, قازاقستاننىڭ ەڭبەك سىڭىرگەن ونەر قايراتكەرى, مەملەكەتتىك سىيلىقتىڭ يەگەرى اشىربەك سىعايدىڭ تۋعانىنا 70 جىل تولۋىنا ارنالعان قازاقستان دراما تەاترلارىنىڭ XXV رەسپۋبليكالىق فەستيۆالى باعدارلاماسىنداعى سپەكتاكلدەردى كورەرمەندەر 13 قىركۇيەككە دەيىن تاماشالاي الادى.
«جاستار» تەاترىندا وتكەن فەستيۆالدىڭ اشىلۋ سالتاناتىندا ءسوز العان بەلگىلى اقىن, قازاقستان جازۋشىلار وداعى باسقارماسىنىڭ توراعاسى نۇرلان ورازالين تەاتر سىنشىسىنىڭ اسىل بەينەسىن ەسكە الدى. شارانىڭ باسى-قاسىنان اشىربەك سىعايدىڭ جارى كۇلاش دۋلاتبەكقىزى دا تابىلدى.
«اشىربەك ونەر دەسە ىشكەن اسىن جەرگە قوياتىن. ال تەاتر ونەرىنە, ءتىپتى ەرەكشە قارايتىن. قازاقستاننىڭ بارلىق تەاترلارىن بەس ساۋساعىنداي ءبىلدى دەپ ايتسام, ول ارتىق ەمەس. تەاترلاردىڭ تاريحىن تارقاتىپ, سپەكتاكلدەردىڭ پرەمەراسى قاشان وتكەنىن, ولاردى قويعان رەجيسسەردىڭ, اكتەر-اكتريسالاردىڭ اتى-جوندەرى – ءبارى كوكىرەگىندە سايراپ تۇراتىن. ارىپتەستەرى ونى «ءتىرى ەنتسيكلوپەديا» دەپ اتايتىن» دەيدى سىنشىنىڭ جارى.
فەستيۆال «جاستار» تەاترىنىڭ رەپەرتۋارىنداعى قازاقستاننىڭ ەڭبەك سىڭىرگەن قايراتكەرى نۇرقانات جاقىپباي ساحنالاعان ت.احمەتجاننىڭ «سۇلۋ مەن سۋرەتشى» نوكتيۋرنىمەن اشىلدى.
اشىربەك سىعاي ءومىرىنىڭ سوڭعى جىلدارى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى ديرەكتورىنىڭ كەڭەسشىسى بولدى. كەيىنگى شاكىرتتەرىمەن بىرگە «قاللەكي تەاترى» اتتى ەڭبەكتى دە جازىپ كەتتى. مىنە, وسى ونەر ۇجىمى ەكىنشى كۇنى كورەرمەندەرگە ش.ايتماتوۆتىڭ «بوراندى بەكەت» رومانى جانە «ءجاميلا» پوۆەسى جەلىسىمەن قازاقستاننىڭ حالىق ءارتىسى تالعات تەمەنوۆ ينستسەنيروۆكاسىمەن ساحنالانعان «اققۋدىڭ كوز جاسى» سپەكتاكلىن ۇسىندى.
وسى قويىلىمدارمەن قاتار فەستيۆال باعدارلاماسىنا ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنداعى م. گوركيدىڭ «شىڭىراۋ» دراماسى (رەجيسسەرى دانيار بازارقۇل), م. وتەمىسۇلى اتىنداعى اتىراۋ وبلىستىق قازاق دراما تەاترىنداعى ر. وتارباەۆتىڭ «باس» سپەكتاكلى (جانات تەلتاەۆ), شىعىس قازاقستان وبلىستىق «داريعا-اي» جاستار تەاترىنداعى ۋ. شەكسپيردىڭ «ءىىى ريچارد» تراگەدياسى (دينا جۇماباەۆا), رەسپۋبليكالىق اكادەميالىق نەمىس دراما تەاترىنداعى ن. گوگولدىڭ «رەۆيزور» سپەكتاكلى, اقمولا وبلىستىق ورىس دراما تەاترىنداعى ن. سادۋردىڭ «پاننوچكا» سپەكتاكلى جانە «جاس ساحنا» تەاترى رەپەرتۋارىنداعى ت.دجيۋدجەنوگلۋدىڭ «كوشكىن» سپەكتاكلى ەنگىزىلدى. فەستيۆالدىڭ جابىلۋ جانە ماراپاتتاۋ سالتاناتى ەرتەڭ «استانا-بالەت» تەاترىندا وتەدى.
امانعالي قالجانوۆ
