نۇر-سۇلتان قالاسىنىڭ رەسپۋبليكانىڭ جالپى ىشكى ونىمىندەگى ۇلەسى 10,7 پايىزدى قۇرايدى. قالا ەكونوميكاسىنا تارتىلعان ينۆەستيتسيا كولەمى – 811,5 ملرد تەڭگە. بۇل وتكەن جىلمەن سالىستىرعاندا 14 پايىزعا جوعارى. قالانىڭ قوعامدىق كەڭەسىنىڭ وتىرىسىندا ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆ وسىلاي دەپ باياندادى. اتالعان جيىندا ەلوردانىڭ 2021-2023 جىلدارعا ارنالعان بيۋدجەتى جوباسى تالقىلاندى.
بايانداماشىنىڭ مالىمدەۋىنشە, جاقىن جىلدارى باس قالادا 12 ينۆەستيتسيالىق جوبانى جۇزەگە اسىرىپ, يندۋستريالدى پارك اۋماعىندا 900-دەن استام جۇمىس ورنىن قۇرۋ جوسپارلانىپ وتىر. جالپى بيىلعى 10 ايدىڭ قورىتىندىسى بويىنشا وندىرىلگەن ونەركاسىپ ءونىمى 800 ملرد تەڭگەنى قۇرادى. بىلتىرعى سايكەس كەزەڭمەن سالىستىرعاندا, بۇل 3,6 پايىزعا جوعارى.
– وسى جىلدىڭ باسىنان 2 ملن شارشى مەتردەن استام تۇرعىن ءۇي پايدالانۋعا بەرىلدى. بۇل وتكەن جىلمەن سالىستىرعاندا 54,6 پايىزعا كوپ. جالپى 2023 جىلعا دەيىن 7 ملن شارشى مەتر تۇرعىن ءۇيدى تاپسىرۋ جوسپارلانعان, – دەدى ق.ماڭقاراەۆ.
ونىڭ ايتۋىنشا, 2020 جىلدىڭ ءۇشىنشى توقسانىنىڭ قورىتىندىسى بويىنشا قالاداعى جۇمىسسىزدىق دەڭگەيى 4,7 پايىزدى قۇرادى. «جۇمىسپەن قامتۋدىڭ جول كارتاسى» مەملەكەتتىك باعدارلاماسى جىل سايىن 23 مىڭ جۇمىس ورنىن قۇرۋعا مۇمكىندىك بەرەدى. بۇل جۇمىس ورىندارى, نەگىزىنەن, ەكونوميكانىڭ سەرۆيستىك سەكتورىندا اشىلماق.
ق.ماڭقاراەۆ الداعى جىلدارعا قالا باسقارمالارى مەن اۋدانداردىڭ اكىمدىكتەرىنە بيۋدجەتتەن قانشا قارجى, قانداي جۇمىستارعا بولىنگەنىن بايانداي كەلە, ءار توقسان سايىن بيۋدجەت ناقتىلاناتىنىن ايتىپ ءوتتى. قوعامدىق كەڭەس مۇشەلەرىنىڭ ساۋالدارىنا جاۋاپ بەردى. ال سۇراقتار از بولماعانىن ايتا كەتۋ كەرەك. بۇل ساۋالدارعا باسقا باسقارمالاردىڭ باسشىلارىنا دا جاۋاپ بەرۋگە تۋرا كەلدى.
قوعامدىق كەڭەس مۇشەسى مۇحتار ەركەتاەۆ وسى جىلعى بيۋدجەت قانشالىقتى يگەرىلگەنىن سۇرادى. قارجى باسقارماسىنىڭ باسشىسى ءالىبي جۇماەۆتىڭ مالىمدەۋىنشە, وسى ۋاقىتقا دەيىن يگەرۋ كورسەتكىشى 82,2 پايىزدى قۇرايدى.
– بىراق جىلدىڭ اياقتالۋىنا ءالى ءۇش اپتاداي ۋاقىت بار. سوندىقتان ءتيىستى قورىتىندىنى جاساۋ ەرتە. رەسپۋبليكالىق بيۋدجەتتەن بولىنگەن 2,9 ملرد تەڭگە يگەرىلۋى قاجەت, – دەدى ءا.جۇماەۆ.
بيۋدجەتكە «قالانىڭ شەتكى ايماقتارىن دامىتۋ» باعدارلاماسى اتتى ارنايى تارماق ەنگىزىلگەن. بۇل باعدارلامانى جۇزەگە اسىرۋ جايىن م.ەركەتاەۆقا ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ەگجەي-تەگجەيلى ءتۇسىندىردى.
– اتالمىش باعدارلاما وتكەن جىلى ەلباسىنىڭ تاپسىرماسىمەن قولعا الىندى. سوعان سايكەس الماتى, نۇر-سۇلتان, شىمكەنت قالالارى مەن اقمولا وبلىسىنىڭ شەتكى ايماقتارىن دامىتۋعا جىل سايىن رەسپۋبليكالىق بيۋدجەتتەن 7,5 ميلليارد تەڭگەدەن بولىنەدى. بۇل باعدارلامانىڭ جۇزەگە اسىرىلۋىنا ۇلتتىق ەكونوميكا مينيسترلىگى مونيتورينگ جاسايدى. بىزگە كەلسەك, بۇل باعدارلاما بويىنشا تۇرعىن الاپتاردا ينجەنەرلىك جەلىلەر تارتىلىپ, دەنە شىنىقتىرۋ-ساۋىقتىرۋ كەشەندەرى مەن جاتاقحانالار سالىنىپ جاتىر. ماسەلەن, «پريگورودنىي» تۇرعىن الابىندا بىرنەشە جاتاقحانا بوي كوتەردى. سونداي-اق شەتكى ايماقتاردا جولدار سالىندى, – دەدى ق.ماڭقاراەۆ.
«بيۋدجەتكە قاتىسۋ» باعدارلاماسىنا قاتىستى ساۋالعا ول قالانىڭ ءار اۋدانىنا ءار جىلعا 2-3 ملرد تەڭگەدەن بولىنگەنىن ايتا كەلە, اكىمدىكتەر الداعى قاڭتار ايىندا اتالمىش باعدارلاماعا بولىنەتىن قارجى كولەمىن انىقتاۋدى جوسپارلاپ وتىرعانىن جەتكىزدى.
– بيىل بۇل باعدارلاما ءتورت اۋداندا دا جۇزەگە اسىرىلدى. وعان 880 ملن تەڭگە شاماسىندا ءبولىندى. بىلتىر سارىارقا اۋدانىنا عانا 500 ملن بولىنگەن. ءبىز اكىمدىكتەرگە حالىقتىڭ سۇرانىسىنا قاراي وسى باعدارلاماعا كوبىرەك اقشا بولىڭدەر دەپ كەڭەس بەرىپ جاتىرمىز. ولار كوبەيتۋگە تىرىساتىندارىن جەتكىزدى, – دەدى ق.ماڭقاراەۆ.
قوعامدىق كەڭەس مۇشەسى ءاسيما بيمەندينا الداعى جىلدارى جۇزەگە اسىرىلاتىن 12 ينۆەستيتسيالىق جوبا ناقتى قاي باعىتتاردا بولاتىنىن سۇرادى. وعان جاۋاپ بەرگەن ينۆەستيتسيالار جانە كاسىپكەرلىكتى دامىتۋ باسقارماسىنىڭ وكىلى بيىل بلوكتاردان تۇرعىن ءۇي تۇرعىزۋ كومبيناتى, برۋسچاتكا شىعارۋ زاۋىتى سياقتى جوبالار ىسكە اسىرىلىپ جاتقانىن ايتتى.
