نۇر-سۇلتاندا قالالىق دامۋ اكسەلەراتورى رەسمي تۇردە ىسكە قوسىلدى. جوبانىڭ جۇزەگە اسىرىلۋى 100 كۇنگە كوزدەلگەن. ياعني بەلسەندى, قالا ماسەلەلەرىنە الاڭداۋشىلىق بىلدىرەتىن تۇرعىندار اكىمدىك وكىلدەرىمەن بىرگە قوعامدىق كولىك, پيك جانە سانيتارلىق تازالاۋعا قاتىستى تۇيتكىلدى ماسەلەلەردى بىرلەسىپ شەشەتىن بولادى. قالالىقتار وسى باعىتتاردىڭ ارقايسىسى بويىنشا وزدەرىنىڭ ۇسىنىستارىن ەنگىزىپ, شەشىم شىعارۋعا تولىق قاتىسا الادى.
– ءبىز قالا تۇرعىندارىن كوپتەگەن ماسەلەلەر الاڭداتىپ وتىرعانىن كورىپ وتىرمىز, ولاردىڭ ىشىندە ەڭ وزەكتى 48-ءىن ايقىندادىق. ولاردىڭ 20-سى – بارلىق قالالىقتاردى مازالايتىن ماسەلەلەر. 20 ماسەلەنىڭ ىشىنەن تالقىلاۋ ءۇشىن 3-ەۋىن بەلگىلەپ الدىق, ويتكەنى 100 كۇننىڭ ىشىندە 20 توپتى جيناقتاۋ مۇمكىن ەمەس. ءبىز تۇرعىندارمەن بىرگە وسى ماسەلەلەردىڭ شەشىمىن تابۋعا تىرىساتىن بولامىز. مۇمكىن كەيبىر ماسەلەلەردى تۇرعىندار بۇرىن تالقىلاعان بولىپ, ولار بويىنشا ناقتى ءتيىمدى ۇسىنىستارى بار شىعار, – دەدى نۇر-سۇلتان قالاسى اكىمىنىڭ ورىنباسارى ماليكا بەكتۇروۆا.
وسىعان دەيىن اكسەلەراتور اياسىندا قالالىقتاردان 100 ءوتىنىم جيناقتالدى. ولاردىڭ ارقايسىسىمەن اڭگىمە جۇرگىزىلدى, تۇيىندەمەلەر قاراستىرىلدى. ناتيجەسىندە شامامەن 30 قاتىسۋشى ىرىكتەلىپ, 3 جۇمىس توبىنا ءبولىندى. ولاردىڭ قۇرامىنا اكىمدىكتىڭ, ۆەدومستۆولىق ۇيىمداردىڭ وكىلدەرى كىردى. ءار توپتا 20-25-تەي ادام جيناقتالدى. اكسەلەراتوردى جۇزەگە اسىرۋ تۋرالى حابارلانعان ساتتەن باستاپ دايىندىق جۇمىستارى جۇرگىزىلىپ ۇلگەردى, ونىڭ ناتيجەسى بىرلەسكەن ءۇش توپتىڭ ءبىر ايلىق جۇمىسىنان كورىنەتىن بولادى.
– تۇرعىنداردان سۇراقتار قويىلا باستاعاندىقتان ولارعا باستاپقى اقپارات بەرىلدى, سايكەسىنشە ولار كورسەتكىشتەردى ايقىنداپ ۇلگەردى. بۇگىنگى تانىستىرىلىم شىنايى كورسەتكىشتەردى پىسىقتاۋ ءۇشىن وتكىزىلىپ وتىر, وسى 100 كۇن قۇر تالقىلاۋمەن عانا شەكتەلمەي, ءار ماسەلە بويىنشا ناقتى كورسەتكىشتى ءبىلۋىمىز كەرەك دەگەن ويمەن ۇيىمداستىرىلدى, – دەپ اتاپ ءوتتى ماليكا بەكتۇروۆا. سونىمەن قاتار اكىم ورىنباسارى اكسەلەراتوردىڭ بيۋدجەتى جوق ەكەنىن العا تارتتى. مەملەكەتتىك قىزمەتكەر ءۇشىن بۇل جۇمىسىنىڭ ءبىر بولىگى بولسا, قوعامدىق وكىلدەر ءۇشىن قالاعا پايداسىن تيگىزۋ نيەتى. كەزدەسۋلەر Seedspace Nur-Sultan الاڭىندا اپتا سايىن وتكىزىلەدى. ال جۇزەگە اسىرىلعان ناتيجەلەر www.nursultansmartaccelerator.com رەسمي سايتىندا جانە Smart Astana موبيلدىك قولدانباسىندا جاريالانىپ وتىراتىن بولادى.
